1 Tele matangua atanu na limo kanda ahete a Paseka, Yesu uezile ku Mbetaniya kuimbo lia Lazalu, uje yasanguile Yesu kuvatsi. 2 Mata uavuaheselele Yesu kulia ca cinguezi kaha na Lazalu uapuile umo uavaje vakele nakulia na Yesu ku mesa. 3 Maliya uambatele kantsazi kakupuisa hakati ka mazi a luengo luacili nakuvuavesa ku viliato via Yesu nakumuhunda ku viliato viendi na vinkambu viendi, kaha njivo yoshe yashulile na luengo luacili lua mazi. 4 Vuno honi Yundasa Sakaliote, umo ua vandongisi vendi (ikeye uje akamuenda vungungu), uahandekele nguendi, 5 "Vika aua mazi a luengo luacili ku va alandesela ha vimbongo via muuaya uaya viakupua vihita vitatu (300) na kuviana ku vihutu?" 6 Uahandekele evi keti ngue uakele nakuniunga vuino vihutu vuno honi muomu uapuile muizi, uakele na cikuama cakuhaka vimbongo muje muakele nakuiva.

7 Yesu uahandekele nguendi, "Eceleni Maliya alinge eci canalingi muomu cinemanena litangua liange liakunjitsinda. 8 Tuhutu mukala navo ntsimbu yoshe, vuno honi yange kumukakala nange ntsimbu yoshe."

9 Muomu civunga ca Vayunda cazivukile nguaco Yesu ali kuje, vezile keti lika muomu ya Yesu vuno honi kuija nakumona Lazalu, uje ivasanguile ku vatsi. 10 Kaha vakuluntu va vasasendote vasinganiekele muakutsihila Lazalu naua. 11 Muomu ya vije vialingiuile kuli ikeye vuingi vua Vayunda va vavianene kaha vatsilielele Yesu.

12 Omo kuacele liamukuavo vantu vavengi vezile ku ciuano ca Paseka kaha vovuile nguavo Yesu na ikeye ali nakuija ku nganda ya Yelusalema. 13 Kaha vambatele mintango ya miti ya mambale na kumushesha oku vatambeka nguavo, "Hosana! Hosana! Uakukuisula uje eja mu lizina lia Muene, Shukulu ua Isaleli!"

14 Kaha Yesu uauanene muna cimulu, kaha ualondeleho nakutumama, ngue muje vacisoneka mu visoneka nguavo,

15 "Keti uteue, yove nganda ya Zioni,

tala, Muene yove ali nakuija

natumama ha muongo ua muna cimulu!"

16 Vandongisi vendi kuvazivukile evi ha kulivanga, vuno honi omo Yesu vamujunduile mu vumpau vuendi, kaha vavulukile nguavo evi viuma vavisonekele hali ikeye kaha vialingiuile kuli ikeye.

17 Civunga cije cakele nendi omo muahinduile Lazalu na kumuhumisa mu cihilo na kumusangula kuvatsi vahanene vukaleho. 18 Omo civunga cevuile nguavo nalingi vimueso kaha vayile nakuliuana nendi. 19 Kaha Vafaliseho vahandekele kuli umo na mukuavo nguavo, "Taleni, mavu oshe ali nakumukava."

20 Hakati kavaje vayile na kulemesa ku ciuano, vamo vapuile Vangelengu. 21 Kaha vezile kuli Filipu uje uahumine ku Mbetesainda ku nganda ya Ngalileya, vahandekele kuli ikeye nguavo, "Muene, tutonda linga tumone Yesu."

22 Filipu uayile nakuleka Anduleo, kaha Anduleo uayile na Filipu nakuleka Yesu. 23 Kaha Yesu uavakumbuluile nguendi, "Ntsimbu inahete linga Muna Muntu vamujundule. 24 Cilivene njimileka nguange, kuvanga nona ya tiliku iuile ha mavu na kutsa, amba ihake vinona viavingi keti ngoconi ikakala likaliayo. 25 Muntu uoshe uje azanga muono uendi aka uzimbalesa, kaha na muntu uoshe uje azinda muono uendi hano ha mavu nalitulikila muono uayaye. 26 Nga uoshe uje anjipangela napande kunjikava, kaha kunjikakala yange, na ngamba yange kukeko kuakakala. Uje anjipangela, na Tate akamusingimika.

27 "Mutima uange uli nakulinienga. Kaha njikahandeka vika, nkuma njikahandeka nguange ‘Tate, njovole ha ntsimbu ino ndi?’ Houe, muomu ha cuma eci njinahete ha ntsimbu eyi. 28 Tate, hana vumpau lizina liove."

Kaha lizi liahumine muilu ngualio, "Njanalihana laja vumpau, kaha njikalihana naua vumpau."

29 Civunga cije cemanene kuje cevuile evi kaha vahandekele nguavo muhiato unalumu. Veka vahandekele nguavo, "Kangelo nahandeka kuli ikeye."

30 Yesu uavakumbuluile nguendi, "Eli lizi lineja muomu yeni, keti yange. 31 Eci cinapu kusompa ca mavu, honi muka kuyula ua hano ha mavu vaka muhumisaho. 32 Nga yange omo vaka njijundula hano ha mavu, vantu voshe vakeja kuli yange." 33 Uahandekele eci kumuesa kutsa cije cakatsilamo.

34 Civunga camukumbuluile nguavo, "Tunevu ku lishiko ngualio Kilistu akayoya miaka yoshe. Nkuma cija vati honi uhandeke nguove Muna Muntu vaka mujundula? Nkuma ou Muna Muntu ikeye iya honi?"

35 Ambahoni Yesu uahandekele kuli vakevo nguendi, "Ceke cikakala neni muka ntsimbu kakandende lika. Endeni oku muli na ceke, linga milima keti imihiane, uje enda mu milima, kekuzivuka kuje ali nakuya. 36 Ha ntsimbu ije mucili na ceke, tsilieleni mu ceke, linga mukapue vana va ceke."

Munima yakuhandeka evi, Yesu uayile nakulishueka. 37 Cipue vene ualingile vimueso viavingi hakati kavo, vuno honi vantuama va Vayunda kuvamutsilielele. 38 Eci capuile kushulisisa lizi liahandekele kananguizi Isaya ngualio:

"Muene, iya natsiliela muzimbu uetu,

nkuma kuli iya livoko lia Muene kuvanalisholuela?"

39 Kaha kuvatsilielele, muomu Isaya naua uahandekele nguendi,

40 "Napuisa mesho avo vupuputua

nakukolesa mitima yavo,

linga mesho avo keti amone,

na mitima yavo keti ivuisise kaha

kuvakatengulukila kuli yange linga njika vakanguise."

41 Isaya uahandekele eci muomu uamuene vumpau vuendi na kuhandeka hali Yesu.

42 Cipue vene ngoco, vamo vantuama va Vayunda vavengi vatsilielele muli ikeye. Vuno honi muomu hakuteua Vafaliseho kuvalitavelele, hakuteua nguavo vakavasheka mu njivo ya malombelo, 43 muomu vazangele kushangazala ca vantu kupulakana kushangazala ca Njambi.

44 Ambahoni Yesu uatambakanene cikuma nguendi, "Uoshe atsiliela muli yange, katsilielele muli yange lika vuno honi muli uje ua njitumine. 45 Kaha uoshe uje amona yange, namono naua na uje ua njitumine. 46 Njineja ngue ceke ha mavu, linga uoshe atsiliela muli yange keti akale mu milima. 47 Kunjikasompo uoshe uje evua mezi ange nakuhona kuaniunga, muomu kunjezile mukusompesa mavu, vuno honi muku ovola. 48 Uje uoshe anjiviana nakuhona kutambula lizi liange vaka musompa, lizi eli njahandeka likelio likamuhisa ha litangua lia mamanusuilo. 49 Muomu kunjahandekele mu nzili yange lika, vuno honi Tate uje uanjitumine ikeye vavenia nanjihana lishiko muje munji kahandekela. 50 Kaha njazivuka nguange lishiko liendi linapu muono uayaye. Vioshe vije njikahandeka, nankuma, njihandeka kuya muje Tate muananjilekelamo."