1 Hanima yevi Yesu ualisholuele naua ikeye vavenia kuli vandongisi vendi ku cisali ca Timbeliase. Ualisholuele ikeye vavenia mu ngila eyi, 2 Simoni Petulu, na Tomasi uje ivatumbuile mpasa, na Natanele uje uahumine ku Kana mu nganda ya Ngalileya, na vana va Zembendeo na vakuavo vandongisi vavali voshe vakele hamo. 3 Simoni Petulu uahandekele kuli vakevo nguendi, "Njilinakuya nakuta vantsi."

Kaha vahandekele kuli ikeye nguavo, "Tuya mumo." Kaha vayile hamo mu vuato, vuno honi vutsiki vuje kuvakuatele cipue intsi umo uahi. 4 Liamukuavo cimene mene, Yesu uemanene ku cikuma ca cisali, vuno honi vandongisi vendi kuvazivukile nguavo Yesu. 5 Kaha Yesu uahandekele kuli vakevo nguendi, "Vavusamba vange, nkuma kumuakuateleko cipue intsi umo ndi?"

Kaha vamutavele nguavo, "Houe."

6 Kaha Yesu uahandekele kuli vakevo nguendi, "Teni vuanda vueni ku cihela ca cilio ca vuato, kaha mukakuata vantsi." Nankuma vatele vuanda vuavo kuje kaha vahonouele cipue kukoka vuje vuanda muomu vantsi vapuile vavengi.

7 Uje ndongisi ivazangele cikuma kuli Yesu uahandekele kuli Petulu nguendi, "Nkumani ikeye Muene!" Omo Simoni Petulu uevuile nguendi uapuile Muene, uazalele vuzalo viendi, muomu uashuluile vuzalo viendi viahelu, kaha uakovelele mu mema. 8 Vuno honi vandongisi veka vakevo vezile mu vuato, vakele nakukoka vuanda vuje vuashulile na vantsi, muomu kuvakele kulahako na ntunda, vuno honi yapuile lika ntunda yakupua matambo cihita (100) 9 Kaha omo vahetele ha ntunda vamuene manungu a tuhia hali na intsi na mbolo. 10 Yesu uahandekele kuli vakevo nguendi, "Neheniko vantsi vamo vamunakuata."

11 Kaha Simoni Petulu uakovelele mu vuato, nakukokela vuanda ku ntunda vuje vuashulile na vantsi vakama cikuma, vantsi vapuile cihita na makumi atanu na vantsi vatatu (153), kaha cipue vene tele vantsi vapuile vavengi, vuno honi vuanda ku vuatavukile. 12 Yesu uahandekele kuli vakevo nguendi, "Ijeni muakulie via kulia via cimene." Kaha naumo uahi ua vandongisi uehuileko nguendi, "Nkuma yove iya?" Muomu vazivukile nguavo Muene. 13 Yesu uezile nakuambata mbolo na kuvahanayo, kaha ualingile cimo vene naua na ku vantsi.

14 Eyi yapuile ntsimbu ya mucitatu ije Yesu ualisholuele kuli vandongisi vendi hanima yakusanguka ku vantsi.

15 Omo vamanusuile kulia via kulia via cimene, kaha Yesu uahandekele kuli Simoni Petulu nguendi, "Simoni muna Yiuano, nkuma uanjizanga kupulakana ava ndi?" Petulu uamukumbuluile nguendi, "Eyo Muene nove uzivuka nguove njakuzanga." Yesu uahandekele kuli ikeye nguendi, "Lisa vana va vampanga vange." 16 Kaha Yesu uahandekele kuli ikeye ntsimbu ya mucivali nguendi, "Simoni muna Yiuano, nkuma uanjizanga ndi?"

Petulu uamukumbuluile nguendi, "Eyo, Muene, nove uzivuka nguove njakuzanga,"

Yesu uahandekele kuli ikeye nguendi, "Niunga vampanga vange." 17 Kaha Yesu uahandekele kuli ikeye ntsimbu ya mucitatu nguendi, "Simoni muna Yiuano, nkuma uanjizanga ndi?"

Petulu uevuile kupihia muomu uamuhuile ntsimbu ya mucitatu nguendi, "Nkuma uanjizanga ndi?" Kaha uahandekele kuli ikeye nguendi, "Muene, nove uzivuka nguove njakuzanga."

Yesu uahandekele kuli ikeye nguendi, "Lisa vampanga vange. 18 Cilivene muavusunga njikuleka nguange omo tele uapuile u kanike, uakele nakulikuta muiva uove mu mbunda nakuya kuoshe kuje ku uatondele. Vuno honi omo ukakuluvala ukolola mavoko ove kaha mukueni akakukuta muiva mu mbunda yove nakukutuala kuje ku utondo." 19 (Mukuhandeka evi, Yesu uahandekele vutsi vuje vuakatsa navuo Petulu vuje vukaneha vumpau kuli Njambi) Kaha Yesu uahandekele kuli Petulu nguendi, "Njikave!"

20 Petulu uatengulukile kaha uamuene uje ndongisi ivazangele cikuma kuli Yesu alinakuvakava, uje ikeye uasindamenene ha ntulo ya Yesu ha ntsimbu ije ivakele nakulia via kulia via cinguezi naua ikeye uje uahandekele nguendi, "Muene, nkuma iya akakuenda vungungu?" 21 Omo Petulu uamumuene, uehuile Yesu nguendi, "Muene, nkuma vika vikalingiua kuli ou yala?"

22 Yesu uahandekele kuli ikeye nguendi, "Nga ku cizango cange akayoya noho njikeja, nkuma evi vikevio vika kuli yove? Njikave!"

23 Kaha muzimbu ou uashandokelele muimbo lioshe, nguavo ou ndongisi ka katsi. Vuno honi Yesu kahandekele kuli ikeye nguendi ka katsi, vuno honi nguendi, "Nga ku cizango cange ngue akayoya noho njikeja, nkuma evi vikevio vika kuli yove?"

24 Ou ikeye ndongisi uje ahandeka vukaleho vua viuma evi vialingiuile na kuvisoneka, kaha tuzivuka nguetu vukaleho vuendi vunapu vua vusunga.

25 Vuno honi kuvili vimo viuma viavingi vikuavo vije Yesu ualingile, nga vioshe va visonekele, njazivuka nguange nga mavu oshe ku asele kuuana cihela cakutulikila mavulu aje avanavisoneka.