1 Kuli uakasingimiko Telefilo,

Mu livulu lia kulivanga Njasonekele hali vije vioshe Yesu ualingile na kulongesa cendi hume hambangelo, 2 nakuheta litangua lije vamutualele muilu, hanima yakuhana vishika kuhitila mu Cimbembesi Uakulela ku tunganda vaje vahanguile. 3 Hanima ya kutsa na kusanguka cendi, ualisholuele ikeye vavenia kuli vakevo mu vingila vije viakele na vukaleho ngeci ikeye alinakuyoya. Ualisholuele kuli vakevo mu matangua akupua makumi auana nakuhandeka via Vumuene vua Njambi. 4 Tele acilinavo, uavashikile nguendi, "Keti vakahume mu Yelusalema vuno honi vaka vandamenene kuje cikulaheso ca Tate. Evi vikevio viahandekele vije vimuevuile kuli yange. 5 Muomu Yiuano ikeye uambuitikile na mema vuno honi ha matangua a mandende lika vakamimbuitika na Cimbembesi Uakulela."

6 Omo tunganda vakele hamo na Yesu, vamuihuile nguavo, "Muene, nkuma ukahiluisila vumuene ku Isaleli ha ntsimbu inovene ndi?"

7 Yesu uavakumbuluile nguendi, "Keti kuli yeni kuzivuka vintsimbu cipue matangua aje Tate anavuahesa kuya ku nzili yendi yakama. 8 Vuno honi mukatambula nzili omo Cimbembesi Uakulela akeja hali yeni, kaha mukapua vakaleho vange mu Yelusalema, na mu Yundeya muoshe na mu Samaliya, naku mamanusuilo a mavu." 9 Omo uamanusuile kuhandeka eci, vamujunduile naku mutuala muilu tele oku vamutalelela, lishelua liamuambatele kaha kuvamumuene naua.

10 Tele vali nakutalelela muilu oku alinakuya, taleni hajevene vamala vavali vaje vazalele via kutoka vemanene kuli vakevo. 11 Vehuile nguavo, "Vamala vaku Ngalileya, nkuma vika munemanena oku muatala muilu? Ou Yesu, uje ivanambata kuli yeni nakumutuala muilu, akeja naua mucifua cimo ngue muje muamumuene aya muilu."

12 Ambahoni tunganda vahilukilile ku Yelusalema omo vahumine ku Munkinda ua Oliveta uje uakala kuyehi na Yelusalema, yapuile ntunda yakupua ngue kilomita imolika. 13 Omo vakovelele mu nganda, kaha vayile ku mulili ua kuilu kuje kuvakele Petulu, na Yiuano, na Yakomba, na Anduleo, na Filipu, na Tomasi, na Mbatolomeo, na Mateu, na Yakomba muna Alufeya, na Simoni Zelote, na Yundasa muna Yakomba. 14 Vakele nakulikunguluila hamolika mukulombela na mutima umo, hamo na vampuevo veka na Maliya vaina ya Yesu hamolika na vamunaina va Yesu.

15 Mu matangua aje Petulu uemanene hakati ka vaka kutsiliela hamolika na civunga cakupua cihita na vantu makumi avali (120) nakuhandeka nguendi, 16 "Vamuanetu, visoneka vinapande vilishulisise muje Cimbembesi Uakulela kuhitila muli Ndaviti uahandekele hali Yundasa, uje uatuamenene vaje vakutile Yesu. 17 Yundasa uapuile umo uetu, muomu vamuhanguile kupua uakuvipangi vietu."

18 (Yundasa ha vimbongo vije viatambuile ku vilinga viendi via vipi, ualandeleho lihia muje muauile na kutsa, uatavukile lizimo na mila yendi yatutulukilile hambanza. 19 Vantu voshe vakele mu Yelusalema vacuvuile, kaha mu muyati uavo vatumbuile lije lihia nguavo Akalundama, "kulumbununa nguavo Lihia lia Maninga.")

20 "Muomu vanacisoneka mu livulu lia Miaso nguavo,

‘Njivo yendi ipue yamupulungua,

keti mukale cipue umo.’

vacisoneka naua nguavo,

‘Muntu ueka akahinge ha vipangi viendi.’

21 Nankuma tuapande kuhangula umo ha vamala vaje vanakala netu ntsimbu yoshe ije Muene Yesu uendanganene netu, 22 kuputukila ku kumbuitika ca Yiuano nakuheta ha litangua lije omo vahumisile Yesu kuli yetu nakumutuala muilu. Ha cuma eci, umo uavo napande kupua mukaleho uetu ku kusanguka cendi.

23 Nankuma, vahanguile vamala vavali, Yosefa uje ivalukile Mbalasambase (naua vamutumbuile nguavo Njasitase) na Maseyase. 24 Ambahoni valombelele nguavo, "Muene, uzivuka mutima ua muntu uoshe. Tumuese hali ava vavali iya uje unahangula, 25 kuambata cihela mu vipangi evi na kupanga vipangi via vunganda vije Yundasa uasezele nakuya ku mutambela uendi." 26 Kaha vavatelele nkela, na nkela yauililile hali Maseyase, nankuma vamupandakanene ku tunganda likumi na umo.