1 Tele Petulu na Yiuano vacili nakuhandeka ku vantu, vamo vasasendote na ntuama ua Njivo ya Njambi na Vasanduki vezile kuli vakevo. 2 Vanienguele cikuma muomu vakele nakulongesa vantu nguavo Yesu nasanguka ku vatsi, eci camuesele ngeci vatsi vakasanguka. 3 Nankuma, vavakuatele nakuvahaka mu kamenga noho liamukuavo, muomu capuile laja cinguezi. 4 Vuno honi vavengi vaje vovuile lizi vatsilielele, kaha vuingi vua vaje vamala vapuile makulukazi atanu (5,000)

5 Liamukuavo vantuama va Vayunda, na vakuluntu, na valongisi va mezi a Lishiko valikunguluilile hamo mu Yelusalema. 6 Valiuanene hamo na Anase Kasasendote Uakama na Kayafase na Yiuano na Elekizanda na voshe vaje vapuile vaka ntanga ya Kasasendote Uakama. 7 Omo vemikile Petulu na Yiuano ku mesho avo vatondele kuzivuka kaha vavehuile nguavo, "Nkuma nzili yeya cipue mu lizina lieya munalingi cuma eci?"

8 Ambahoni Petulu hakushula na Cimbembesi Uakulela, uavakumbuluile nguendi, "Yeni vantuama va vantu na vakuluntu, 9 nga muli nakutuihula lelo ha vilinga viacili vinalingiua kuli yala ou ua cilema na vati muje muanakangukilamo, 10 yeni voshe munapande kuzivuka, na vantu voshe vamu Isaleli vanapande kuzivuka ngeci muntu ou nemana ku mesho eni nakanguka muacili mu lizina lia Yesu Kilistu ua ku Nazaleta, uje imuashukikile ha cilindakano, uje yasanguile Njambi ku vatsi. 11 Ou Yesu ikeye uje visoneka vihandeka nguavio,

‘Livue lije vaka kutunga vavianene,

likelio linapu cisimi ca mumbango caseho cikuma kupulakana vioshe.’

12 Kutuasa kuuana kuovoka muli ueka naua, muomu kukuesi lizina lieka hano ha mavu lianahana Njambi ku vantu litunapande kuovokelamo."

13 Vaka mpunga vakomokele omo vamuene kusimpa ca Petulu na Yiuano muomu vamuene ngeci vapuile vantu vangoco vakuhona kulilongesa, kaha vavanongonuene ngeci vakevo vakele hamo na Yesu. 14 Vuno honi hakumona uje muntu ivakanguisile nemana hamo na Petulu na Yiuano, kuvasele kuhandeka cuma cimo cakuvaluisa naua. 15 Nankuma, vavalekele linga vatuhuke mu njivo ya Mpunga, kaha vaputukile kulihandekesa hakati kavo nguavo, 16 "Nkuma vika tunapande kulinga kuli ava vamala? Muomu muntu uoshe mu Yelusalema nazivuka eci cikomoueso caciha civanalingi, kaha kutuasa kuciviana. 17 Vuno honi kuvindika cuma eci ngeci keti citsimane naua hakati ka vantu, tunanguleni ava vamala linga keti vahandeke naua kuli muntu mu lizina lia Yesu."

18 Nankuma, vavasanene mukati nakuvashika linga keti vahandeke cuma cimo cipue kulongesa naua mu lizina lia Yesu. 19 Vuno honi Petulu na Yiuano vavakumbuluile nguavo, "Yeni vavenia uaneni cuma muka cacili ku mesho a Njambi, kuononoka yeni indi kuononoka Njambi. 20 Muomu kutuasa kuholoka kuhandeka viuma vije vitunamono nevi vitunevu." 21 Hanima yakuvanangula cikuma kaha vavecelele. Vamuene ngeci capuile cacikalu kuvahana kashitiko, muomu vantu voshe vashangazalele Njambi ha vije vialingiuile. 22 Uje yala ivalingilile cikomoueso cakumukanguisa uakele na miaka yakupulakana makumi auana.

23 Omo Petulu na Yiuano vavecelele, vahilukile ku vantu vavo nakuvaleka vije vivahandekele vakuluntu va vasasendote na vantuama kuli vakevo. 24 Omo vaka kutsiliela vovuile viuma evi, voshe vakungulukile hamo nakulombela kuli Njambi nguavo, "Muene Samatanga ua lilu na mavu, na cisali na vioshe vije vilimo! 25 Yove uahandekele na Cimbembesi Uakulela kuhitila muli kukuluila uetu Ndaviti, ngamba yove, omo ikeye uahandekele nguendi,

"‘Nkuma vika ava keti Vayunda vanienguele,

na muomu ya vika vantu vatumba matumbe akuhona seho?

26 Vimiene va hano ha mavu valivuaheselele vualumo vakevo vavenia,

na vaka kusuana valikunguluile hamo

nakuluisa Muene na Kilistu uendi.’

27 Cilivene Helonde na Pontiyu Pilato valikunguluile hamo mu nganda ino hamo na vaje keti Vayunda na vantu Vaisaleli nakuluisa ngamba yove uakulela Yesu, uje iuavuavesele. 28 Valikunguluile nakulinga vioshe vije viuatondele laja na nzili yove na cizango cove linga vikalingiue. 29 Kaha vuavuno, Muene, tala muvali nakutushunguiya, kaha tava linga vangamba vove vambulule lizi liove na kusimpa coshe. 30 Sholola livoko liove mukukanguisa nakulinga vimueso na vikomoueso mu lizina lia Ngamba yove uakulela Yesu."

31 Omo vamanusuile kulombela, cihela cije vakungulukilile caliningangele. Kaha voshe vashulile na Cimbembesi Uakulela nakuambulula lizi lia Njambi nakusimpa.

32 Civunga ca vaka kutsiliela vakele na mutima umolika na viyongola vimolika, naumo uahi uatumbuile viuma viendi vije viafukile kupua viendi, vuno honi valipangezelele vioshe viavo vije vivakele navio. 33 Kaha na nzili yakama tunganda vambuluile vukaleho vua kusanguka ca Muene Yesu, kaha na kavumbi kakama kakele hali vakevo. 34 Kukuakele umo hakati kavo uajenekele cuma, muomu vaje vakele na mehia cipue vinjivo vavilandesele kaha vanehele vimbongo vivatambuile ku viuma vije valandesele 35 nakuvihana kuli tunganda, kaha vavipangezelele ku muntu na muntu kuya kukujeneka cendi.

36 Kaha Yosefa, Kalevi uje uasemukilile mu Sepulasi, uje tunganda vamutumbuile nguavo Mbanambase, kulumbunuka nguavo "Muka kukolesa vakuavo," 37 ualandesele lihia liendi, kaha uanehele vimbongo nakuvihana ku tunganda.