1 Hanima yakulisalesa navo kaha tuajavukilile musinia, kaha tuahetele ku Kose, lia mukuavo tuahetele ku Londese, kaha kuhuma kuje tuahetele ku Patala. 2 Omo tuauanene vuato vuakuya ku Fonisiya, tuakovelele mu vuato kaha tuayile. 3 Omo tuahetele tuamuene Sepulasi, kaha tuajavukilile ku mbuela yaku Siliya kaha tuahetele ku Tile, muomu vuato vuapandele kuhumisa vitenga kuje. 4 Tuakauanene vandongisi kaha tuakakele navo matangua atanu na avali. Kuhitila mu Cimbembesi valekele Paulu nguavo keti aye ku Yelusalema. 5 Omo matangua etu ahuile kuje, tuatualeleleho na vungenzi vuetu, kaha voshe va mala na va mpuevo vavo na vanike, vatusindikiyile hakuhuma mu nganda. Kuje tuakatsikamene ha mavu ku cikuma ca cisali kaha tualombelele. 6 Ambahoni tualisalesele umo namukuavo. Kaha tuayile nakukovela mu vuato, kaha vakevo vahilukile ku membo avo.

7 Tuatualeleho vungenzi vuetu kuhuma ku Tile, kaha tuahetele ku Putolemaise kuje tuamenekele vaka kutsiliela kaha tuatumamene navo litangua limo. 8 Omo kuacele tuayile kaha tuahetele ku Sesaliya, tuakovelele mu njivo ya Filipu uje muka kutuala lizi lia Njambi ku vantu, umo uavaje vatanu na vavali, vaje vavahanguile kupua vakuasi mu Yelusalema. 9 Filipu uakele na vana vendi vauana va vampuevo vakuhona kushomboka vaje vakele nakuambulula vunanguizi. 10 Tuatumamene kuje ha matangua amo, kananguizi ivatumbuile nguavo Angambase uezile kuhuma ku Yundeya. 11 Uezile kuli yetu kaha uambatele muiva ua Paulu, ualikutile ku viliato naku mavoko endi na muiva uje, nakuhandeka nguendi, "Cimbembesi Uakulela nahandeka nguendi, omu mukemo vene muje Vayunda vamu Yelusalema vakakuta vavenia muiva ou nakumuhana kuli vaje keti Vayunda."

12 Omo tuevuile eci, yetu na vakuetu vakele muje tualambelele Paulu linga keti aye ku Yelusalema. 13 Ambahoni Paulu uakumbuluile nguendi, "Nkuma vika muli nakulilila ngacije, muli nakupokola mutima uange? Njalivuahesela laja keti lika kunjikuta vuno honi cipue kukatsila mu Yelusalema muomu ha lizina lia Muene Yesu."

14 Muomu kutuasele kumusindiya, tuaholokele kuluu kaha tuahandekele nguetu, "Cizango ca Muene cilingiue."

15 Hanima ya matangua akukala kuje kaha tualivuaheselele kuya ku Yelusalema. 16 Vamo va vandongisi vaje vahumine ku Sesaliya na vakevo naua vezile netu kaha vatutualele ku njivo ya Manasone ua ku Sepulasi, uje uapuile ndongisi uakulivanga.

17 Omo tuahetele ku Yelusalema, kaha vamuanetu vaka kutsiliela vatutambuile muacili. 18 Omo kuacele Paulu uayile netu hamo nakukamona Yakomba, na vakuluntu va cikungulukilo navakevo kuvakele. 19 Hanima yakuvameneka, Paulu ualumbuniune cimo na cimo ha viuma vije Njambi ualingile kuli vaje keti Vayunda kuhitila mu cipangi cendi. 20 Omo vacivuile, vashangazalele Njambi. Ambahoni vahandekele kuli vakevo nguavo, "Tala, muanetu Paulu, unamono vati muje makulukazi aje a Vayunda muvana tengulukilamo kupua vaka kutsiliela, na muje vati muvana lihanenamo vakevo vavenia voshe ku Lishiko lia Mosesa. 21 Vanavalekesa viove nguavo ulinakulongesa voshe Vayunda vaje vatunga hakati kavaje keti Vayunda linga keti vakave Lishiko lia Mosesa, kaha naua nguove keti valovole vana vavo cipue keti vaniunge futisi ya Vayunda. 22 Cilivene omo vakevua nguavo uneja, nkuma vikahoni vikalingiua? 23 Evi vikevio vitutonda yove linga uvilinge. Kuli vamala vauana kuno vaje vanalisingi. 24 Ya hamo nava vamala vauana ulipandakane navo mu cilika ca kulilelesa, kaha fueta ndando yavo, linga vakatehule ku mitue yavo. Mu ngila eyi vene muntu uoshe akazivuka ngeci vioshe vijevene vanakala nakuhandeka hali yove keti via vusunga, vuno honi yove vavenia uli nakuononoka Lishiko lia Mosesa. 25 Vuno honi hali ava keti Vayunda vaje vanapu vaka kutsiliela, tunatumu mukanda ua kusompa cetu nguetu vahume ku viakulia vije vanakombelela ku tumponia naku maninga naku tusitu vakutikinia nakulihumisa vakevo vavenia ku vupangala."

26 Ambahoni liamukuavo Paulu uayile navaje vamala hanima yakulilelesa, uakovelele mu Njivo ya Njambi navo, nakuvalekesa matangua a kulilelesa muje muakahuila, omo vaka kombelela nkombelo hali umo na umo uavo.

27 Vuno honi omo matangua atanu na avali tele atonda kuhua, Vayunda vaje vahumine ku nganda ya Asiya, vaje vamuene Paulu mu Njivo ya Njambi. Vashongangeyele civunga coshe linga vakuate Paulu. 28 Vatambekele nguavo, "Vamala vaku Isaleli, tukuaseni! Ou ikeye yala uje ali nakulongesa vantu voshe kuoshe linga valuise vantu Vaisaleli, na Lishiko lia Mosesa, na ino Njivo ya Njambi. Kaha honi nanehe naua na Vangelengu mu Njivo ya Njambi linga vajualese eci cihela cakulela." 29 Vahandekele evi muomu vamuene Tolofimase uaku Efeso hamolika na Paulu mu nganda, kaha vasinganiekele nguavo hamo Paulu uamutualele mu Njivo ya Njambi.

30 Kaha citanga eci cashandokelele mu nganda yoshe, kaha vantu voshe vashatukile hamo. Vakuatele Paulu nakumuhumisa mu Njivo ya Njambi, kaha hajevene vashokele vikolo. 31 Cije civunga catondele kutsiha Paulu, kaha lizi lia ile kuli ntuama ua masualale ua Loma ngualio Yelusalema yoshe ili mumpindangano. 32 Hajevene uje ntuama ua masualale uambatele masualale na vantuama va masualale kaha vashatukilile ku civunga. Omo vamuene uje ntuama na masualale, kaha vecelele kupupa Paulu. 33 Kaha ntuama ua masualale uezile kuli Paulu, uamukutile, kaha uavashikile nguendi vamukute na malienge avali. Ambahoni uavehuile nguendi, "Nkuma iya honi ou yala, kaha naua nalingi vika?" 34 Vamo mu civunga vatambekele vimo, vakuavo naua vieka. Kuakele mpindangano yakama kaha uje ntuama ua masualale kovuisisile muacili vika vije vialingiuile, nankuma uavashikile ngeci vatuale Paulu ku vinjivo kuje kuvakakala masualale. 35 Omo Paulu uahetele ha vindendelo, kaha civunga ca tenukile cikuma nankuma valingile uakukakula ku masualale. 36 Civunga cije cavakavele catualeleho kutambeka nguaco, "Mutsiheni!"

37 Omo masualale vatondele kutuala Paulu mu vinjivo muje muakala masualale. Kaha Paulu uahandekele kuli uje ntuama ua masualale nguendi, "Nkuma njasakuhandekako cuma cimo kuli yove ndi?" Uje ntuama ua masualale uakumbuilile nguendi,

"Nkuma uasa kuhandeka Cingelengu ndi?" 38 Nkuma keti yove Kaingito uje ha ntsimbu yakunima uatengulukilile vumuene nakutuamenena vamala vanzita vakupua makulukazi auana (4,000) mu ndinda ndi?

39 Paulu uakumbuluile nguendi, "Yange nji Kayunda, njasemukilile ku Tasisi mu Silisha, mundambo ua nganda yakasingimiko. Njitavese linga njihandeke ku vantu."

40 Kaha uje ntuama ua masualale uamuhanene ntsimbu yakuhandeka, kaha Paulu uemanene ha vindendelo nakuolola livoko liendi linga vantu vaholoke. Omo vantu vaholokele, Paulu uahandekele kulivakevo mu Cihevelu.