1 Ha litangua limo Petulu na Yiuano vayile ku Njivo ya Njambi ha ntsimbu ya kulombela, yapuile ntsimbu ya mucitatu ya mutania. 2 Kuje ku cikolo civatumbuile nguavo Cikolo Cacili ca Njivo ya Njambi, kuakele yala umo uje uapuile cilema hume kukusemuka cendi. Vakele nakumutuala tuala ku cikolo ha litangua na litangua linga alombe vuana ku vantu vaje vakele nakukovela mu vimbalanda via Njivo ya Njambi. 3 Omo uamuene Petulu na Yiuano valinakukovela, uavalombele linga vamuhaneko cimo. 4 Petulu na Yiuano voshe vamutalele ntooma, kaha Petulu uahandekele kuli ikeye nguendi, "Tutale!" 5 Nankuma uavatalele ntooma, uayonguele nguendi hamo vamuhanako cimo. 6 Vuno honi Petulu uahandekele kuli ikeye nguendi, "Kunjesi na Siliva cipue Ngolinde, vuno honi eci njilinaco cikeco cinjikuhana, mu lizina lia Yesu Kilistu uaku Nazaleta imana linga uende." 7 Ambahoni uamukuatele ku livoko liendi lia cilio nakumukatula, hajevene viliato na tutsendengele tuendi viakele na nzili. 8 Uakatukile nakutumbuka kaha uaputukile kuenda, uakovelele hamo navo mu Njivo ya Njambi, uendele nakutumbuzoka na kushangazala Njambi. 9 Vantu voshe vaje vamumuene alinakuenda nakushangazala Njambi, 10 omo vamuzivukele ngeci ikeye uje uakele nakutumama ku cikolo cije civatumbuile nguavo Cikolo Cacili ca Njivo ya Njambi nakulomba vuana, kaha voshe valikomokelele cikuma ha cuma cije calingiuile kuli ikeye.

11 Omo uje yala uakakateyele kuli Petulu na Yiuano, vantu voshe valikomokelele kaha voshe vashatukililile kuli vakevo mu Mbalanda ya Solomoni. 12 Omo Petulu uamuene vaje vantu, uahandekele kuli vakevo nguendi, "Yeni vaka Isaleli, nkuma vikahoni mualikomokela ha cuma eci, cipue nkuma vikahoni mututalela ntooma? Muayongola ngueni eci cinalingiua mu nzili yetu cipue mu vunjambi vuetu mukemo tunendesa ou muntu ndi? 13 Njambi ua Avilahama, na Isake na Yakomba, Njambi ya vakukuluila vetu, ikeye nahana vumpau kuli ngamba yendi Yesu, uje imuahanene kuli vaka kusuana nakumuviana ku mesho a Pilato, cipue Pilato tele ikeye uayonguela kumuecela. 14 Vuno honi yeni muamuvianene Uakulela na Vusunga kaha muashikile Pilato linga amiecelele muhuza na kumihanaye. 15 Kaha muamutsihile uje ikeye Vavenia muono, vuno honi Njambi uamusanguile ku vatsi. Yetu tunapu tuvakaleho ha cuma eci. 16 Mukutsiliela mu lizina lia Yesu, lizina liendi ikeye vavenia likelio liahana ou yala nzili, ou mumona nakuzivuka, nalutsilielo luakuhitila muli Yesu lunamuhana kukanguka kuacili ku mesho eni voshe.

17 "Honi vamuanetu njazivuka nguange vije mualingile kuli Yesu, yeni na vantuama veni muavilingilile kunzimba. 18 Mu ngila eyi vene Njambi uashulisilile vije viahandekele laja kuhitila mu tunanguizi vendi voshe nguendi, Kilistu uendi akayanda. 19 Muomu ya cuma eci tengulukeni, kaha hilukeni kuli Njambi naua ngeci amikonekele ku vipi vieni, 20 Vintsimbu via kuhuima vikahuminina kuli Muene kaha akatuma Kilistu uendi uje yamihanguilile laja ikeye Yesu. 21 Napande kukala muilu noho ntsimbu ikaheta ije Njambi akapuisa viuma vioshe via viha, ngue muje muahandekele laja kuhitila muli tunanguizi vendi va kulela. 22 Muomu Mosesa uahandekele nguendi, ‘Muene Njambi yeni akamitumina kananguizi ngue muje muatumine yange, akapua umo uakuhuma hakati ka vantu veni, mukononoke vioshe vije viakamileka. 23 Uoshe uje kakononoka uje kananguizi vakamuhumisa ku vantu va Njambi naku munongesa.’ 24 Tunanguizi voshe ngue muvana vahandekelamo, kuhuma kuli Samuele na vaje vezile munima yendi, navo naua vambuluile vije vilingiua matangua ano. 25 Mu vatekuluila va tunanguizi nava litavasano lije Njambi uahanene kuli vakukuluila veni ngue muahandekele kuli Avilahama nguendi, ‘Kuhitila muli vatekuluila vove miyati yoshe ya vantu hano ha mavu vaka vakuisula.’ 26 Omo Njambi uajunduile ngamba yendi, uamutumine kuli yeni ha kulivanga, mukumikuisula linga muntu uoshe ahume ku vilinga viendi via vipi."