1 Honi kuakele yala umo lizina liendi Ananiya, na mpueyendi Safila valitavasanene kulandesa mutambela ua vufuko vuavo. 2 Hakulitavasana na mpueyendi uashuekele mutambela ua vufuko, kaha uatualele mutambela umo ua vimbongo kuli tunganda. 3 Ambahoni Petulu uahandekele kuli ikeye nguendi, "Ananiya, nkuma vika unatavela Satana akovele mu mutima uove nakuhandeka makuli kuli Cimbembesi Uakulela hakushueka mutambela ua vimbongo viunatambula hakulandesa lihia? 4 Tele kanda ulilandese, liapuile liove, naua nahanima yakulilandesa, vimbongo viapuile viove. Nkuma vika uayonguela kulinga cuma eci? Ku uakuisile lika vantu vuno honi unakuisa Njambi!" 5 Hajevene omo Ananiya uovuile mezi aua, uauililile ha mavu na kutsa, kaha vantu voshe vaje vuovuile evi vakele na liova. 6 Vakuenje vezile nakuzenga muvila uendi, kaha vamutualele hambanza na kumutsinda.

7 Omo kuahitile vintsimbu vitatu mpueyendi uezile, kazivukile cuma cije calingiuile. 8 Petulu uamuhuile nguendi, "Njileke nga evi vikevio vimbongo vimunalandesele lihia lieni yove na yaliove?" Kaha Safila uamukumbuluile nguendi,

"Eyo, vikevio vene evi."

9 Vuno honi Petulu uahandekele kuli ikeye nguendi, "Nkuma vika yove na yaliove muayongola kueseka Cimbembesi ua Muene? Tala, vamala vaje vanakatsinda yaliove ava vali ku cikolo, vakevo vakutuala nove naua." 10 Hajevene Safila uauililile ha mavu ku viliato via Petulu na kutsa. Omo vaje vakuenje vakovelele vamuuanene natsi, kaha vamutualele nakumutsinda kuyehi na yaliendi. 11 Cikungulukilo coshe na vantu voshe vaje vovuile viuma evi vakele na liova liakama cikuma.

12 Tunganda valingile vimueso na vikomoueso viavingi hakati ka vantu. Kaha vaka kutsiliela voshe vakungulukilile hamo mu Mbalanda ya Solomoni. 13 Cipue vene vantu vavashangazalele cikuma, vuno honi naumo uahi ualipandakanene navo. 14 Vantu vavengi valivuezelele ku civunga cavo, civunga ca vamala na vampuevo vaje vatsilielele kuli Muene. 15 Nankuma, ku vije vivalingile tunganda, vantu vakele nakuneha vaka kuvavala ku vitapalo nakuvalangeka ha mihela na ha vitala tala linga Cimbembe ca Petulu cihite helu lia vamo omo ahita kuyehi navo. 16 Vivunga via vantu vavengi vezile kuhuma ku membo akuzenguluka Yelusalema, vanehele vaka kuvavala na vaje vakele nakuyanda ku vimbembesi via kujuala, kaha voshe vavakanguisile.

17 Ambahoni kasasendote uakama na vakuavo vaje va mu mpunga ya Vasanduki, vovuile cipululu kaha vakele na vutumbe vua kuvaluisa. 18 Vakuatele tunganda nakuvahaka mu kamenga ka civunga. 19 Vuno honi ku vutsiki vujevene kangelo ua Muene uashokoluele vikolo via kamenga, kaha uatuhuisile tunganda hambanza, nakuhandeka kuli vakevo nguendi, 20 "Yeni mukemane mu Njivo ya Njambi nakuleka vantu vioshe via muono ou ua uha." 21 Omo vovuile evi vakovelele mu Njivo ya Njambi cimene mene nakuputuka kulongesa vantu.

Honi omo Kasasendote uakama na vantu vendi vahetele kaha vasanene mpunga hamo na vakuluntu voshe va vantu Vaisaleli, kaha honi vatumine vantu ku kamenga linga vanehe tunganda ku mesho avo. 22 Vuno honi omo vaje vaka kuniunga Njivo ya Njambi vahetele kuje, kuvauanene vaje tunganda mu kamenga, nankuma vahilukile ku Mpunga nakuambulula nguavo, 23 "Omo tuahetele ku kamenga tuauanene kuakupata ngongongo na vaka kuniunga voshe tele vanemana ku vikolo, vuno honi omo tuashokoluele kutuauanenemo muntu cipue umo mukati uahi." 24 Omo vakuluntu va vasasendote na mukuluntu ua vaka kuniunga Njivo ya Njambi vovuile viuma evi, valikomokelele cikuma nguavo cuma muka cinalingiua. 25 Ambahoni yala umo uezile nakuhandeka kuli vakevo nguendi, "Taleni, vaje vamala vamunahakele mu kamenga vali mu Njivo ya Njambi nakulongesa vantu!" 26 Ambahoni, uje mukuluntu ua vaka kuniunga Njivo ya Njambi uayile na vantu vendi mukuambata tunganda. Kuvaka pangesele nzili muomu vovuile liova nguavo hamo vantu vavasha mavue.

27 Omo vanehele tunganda, vavemikile ku mesho a Mpunga. Kaha kasasendote uakama uavehuile nguendi, 28 "Tuamishikile nguetu keti mulongese naua mu lizina lia yala ou, vuno honi yeni munashandola laja vilongesa vieni mu Yelusalema muoshe kaha mutonda naua mutuhake mulonga ua kutsa cendi!"

29 Vuno honi Petulu na tunganda vakuavo vavakumbuluile nguavo, "Tunapande kuononoka cikuma Njambi kupulukana vantu. 30 Njambi ya vakukuluila vetu ikeye uasanguile Yesu ku vatsi, uje imuatsihile mukumushukika ha cilindakano. 31 Njambi uamujunduile nakumutuala ku livoko liendi lia cilio na kumupuisa Ntuama na Muyoyesi linga akahane Isaleli ntsimbu yakutenguluka ngeci vavasambese ku vipi viavo. 32 Tuvakaleho va viuma evi, yetu hamo na Cimbembesi Uakulela uje Njambi nahana kuli vaje vamuononoka."

33 Omo vaje vaka Mpunga vovuile evi, vanienguele cikuma nakutonda linga vatsihe tunganda. 34 Vuno honi umo uavo, uje uapuile Kafaliseo lizina liendi Ngamaliele, uapuile mulongisi ua mezi a Lishiko kaha naua vantu vamusingimikile cikuma, uakatukile nakushika Mpunga linga vacituhule tunganda hambanza muka ntsimbu kakandende lika. 35 Kaha uahandekele ku Mpunga nguendi, "Yeni vakuetu Vaisaleli, zangameni ha viuma evi mulina kulinga kuli ava vamala. 36 Ha vintsimbu via kunima kuasholokele Teundase uje ualipuisile uakama, kaha vamala vakupua vihita viuana (400) valipandakanene nendi. Vuno honi vamutsihile kaha na vaje voshe vamukavele valishandokele, kaha cije civunga cendi cahuile. 37 Munima yendi Yundasa Kangalileya uasholokele ha ntsimbu yakutanda vantu, uakokele civunga cakama vuno honi nendi naua vamutsihile kaha na vaje voshe vamukavele valishandokele. 38 Nankuma, ha cimpande eci njimileka nguange, keti mueseke kulinga cuma cimo hali ava vamala. Veceleni! Nga evi vanayongola nevi vali nakulinga vinahumu ku vantu, kaha vikahua, 39 vuno honi nga vinahumu kuli Njambi, kaha kumuasa kuvahiana. Ha mulonga ou mukaliuana lika muli nakuluisa Njambi!"

Kaha Mpunga yakavele kunangula ca Ngamaliele. 40 Nankuma, vasanene vaje tunganda linga vakovele, vavapupile nakuvashika nguavo keti naua vahandeke mu lizina lia Yesu, kaha vavecelele. 41 Ambahoni omo tunganda vasezele ije Mpunga, vavuahelelele cikuma muomu Njambi uavayonguelele kuyanda nakushauka muomu ha lizina lia Yesu. 42 Kaha ha litangua na litangua vakele nakulongesa nakuambulula Muzimbu Uacili ua Yesu Kilistu mu Njivo ya Njambi na mu vinjivo via vantu.