1 Omo Paulu na Silasi vayile vahitile mu Afipolise na mu Apoloniya, kaha vezile ku Tesalonika, kuje kuakele njivo ya malombelo. 2 Kaha ngue kuya ku cilika cendi Paulu, uayile mu njivo ya malombelo ha matangua atatu a Sapalalo uakele nakuhandeka na vantu via mu mikanda, 3 nakuvalumbunuina visoneka, nakuvamuesa vukaleho vua kuhuma mu visoneka ngeci Kilistu napande kuyanda nakusanguka ku vatsi. Kaha Paulu uahandekele nguendi, "Ou Yesu injihandeka kuli yeni ikeye vene Kilistu." 4 Kaha vamo hakati kavo vatsilielele, valipandakanene na Paulu na Silasi hamo na vampuevo vaje vapuile vantuama na civunga cakama ca Vangelengu vaje vakakulemesa Njambi.

5 Vuno honi Vayunda vakele na cipululu, kaha vakunguluile vamo viendangane va mihuza mu vitapalo, kaha vapangele civunga. Vanehele citanga cakama muje mu nganda yoshe, kaha valuisile njivo ya Njasone mukueseka kuuana Paulu na Silasi linga vavatuale ku civunga ca vantu. 6 Vuno honi omo kuvavauanene, vakokangeyele Njasone na vamo vaka kutsiliela nakuvatuala ku vakuluntu va nganda kaha vatambakanene nguavo, "Ava vamala vananeha vukalu mu cifuti coshe kaha vaneja kuno, 7 kaha Njasone uavatambuile mu njivo yendi. Voshe valinakupokola mashiko a Sezale nakuhandeka nguavo kuli muene ueka naua lizina liendi Yesu." 8 Kaha ha mezi aua vanehele citanga cakama ku civunga na ku vakuluntu va nganda. 9 Kaha vakuluntu va nganda vafuetesele Njasone na vakuavo vimbongo vije viatondekele linga vavecele vaye.

10 Hajevene omo vutsiki vuezile vaka kutsiliela vatumine Paulu na Silasi ku Mbeleya. Omo vahetele kuje vayile mu njivo ya malombelo ya Vayunda. 11 Vayunda vakuje vapuile va ceke kupulakana vaku Tesalonika. Vakele nakuivuilila ku lizi na mitima yakuzituka kaha ha litangua na litangua vakele nakutanda mu visoneka linga vamone vije viahandekele Paulu indi via vusunga. 12 Vuingi vua Vayunda nankuma vatsilielele, kaha na vampuevo vamo vavengi va vakuluntu va Vangelengu na vamala vamo vavengi va Vangelengu vatsilielele navo. 13 Vuno honi omo Vayunda vaku Tesalonika vazivukile nguavo Paulu nambulula lizi lia Njambi mu Mbeleya vayile kuje naku shongangeya civunga. 14 Kaha hajevene vaka kutsiliela vatumine Paulu ku cikuma ca cisali, vuno honi Silasi na Timateo vasalele mu Mbeleya. 15 Kaha vamala vasindikiyile Paulu vayile nendi kuvanga naku Atena kaha vahilukilile ku Mbeleya, Paulu uavashikile nguendi Silasi na Timateo vanapande kumukavangeya vuasi vuasi.

16 Omo tele Paulu uakele nakuvandamena Silasi na Timateo mu Atena, uanienguele cikuma omo uamuene muje mu nganda muashulile tuponia tuatuingi cikuma. 17 Kaha muje mu njivo ya malombelo uahandekele na Vayunda na vaje keti Vayunda vaje vaka kulemesa Njambi, kaha ha litangua na litangua uakele nakuhandeka na vaje vakele nakuliuana navo ku cihela cakulandesela. 18 Vamo vaka kulilongesa vaje vakele nakukavangeya vilongesa via Epikuliu na vilongesa via Sitoike valingile vimpata nendi.

Kaha vamo vamuihuile nguavo, "Nkuma vika atonda kuhandeka ou cilema uakulihalesa?" Veka vahandekele nguavo, "Kumoneka ngue ali nakuhandeka vanjambi veka naua." Vahandekele evi omo Paulu uakele nakuambulula via Yesu na cisangukilo. 19 Vamuambatele nakumutuala ku mpunga ya nganda ya Alapangase nakuhandeka nguavo, "Tutonda kuzivuka eci cuma caciha ci ulinakulongesa. 20 Omo vimo viuma vituli nakuivua uhandeka vinapu viaviha kuli yetu, kaha tutonda kuzivuka muvialumbunukilamo." 21 (Omo vaka Atena voshe na vangenzi vakele muje vatondele kupihisa ntsimbu yavo yoshe mukuhandeka na kuivua viuma viaviha)

22 Ambohoni Paulu uemanene ha lutue lua mpunga ya Alepangase nakuhandeka nguendi, "Yeni vantu vamu Atena, njamono nguange mu vilinga vieni vioshe munapu mu vaka kulemesa. 23 Muomu njakele nakuenda mu nganda yeni nakutala muacili mutambela uje muka lemesela, njauanene ha mutula uasonekele nguavo, ‘Kuli Njambi uje kutuzivuka.’ Cije mukalemesa cipue ku mucizivuka cikeco cije njilinakuambulula kuli yeni lelo. 24 Njambi uje uatangele cifuti na vioshe vije vilimo, uapua Muene ua melu na mavu, kaha kekuyoya mu njivo yakutunga ku mavoko a vantu. 25 Cipue kekutonda linga tumupangele cipue cuma cimo, muomu ikeye akahana muono na mpunzi ije ituhuima na viuma vioshe ku vantu voshe. 26 Kaha uatangele miyati yoshe kuhuma kuli yala umo ngeci vakale ha mavu oshe. Ikeye vavenia uavuahesele laja vintsimbu na vinginga na vihela kuje vaka yoyela. 27 Ualingile eci linga vamutonde, kaha omo vakamutonda hamo vaka muuana. Vuno honi cipue ngoco Njambi kakele kulako netu houe, 28 ngue umo uahandekele nguendi,

‘Muli ikeye mukemo mutuayoyela, mukemuo mutuendela

mukemuo mutuli.’

Ngue muje muihandeka miaso yeni imo nguayo,

‘Netu naua tunapu tuvana vendi.’

29 Kaha hakupua tuvana vendi, kutuapandele kusinganieka nguetu Njambi uapua ngue cifua ca Ngolinde cipue ca Siliva indi cipue livue lia kushonga na vutongue na mana a muntu. 30 Laja Njambi uakele nakutalelela vantu omo kuvamuzivukele, kaha hano honi alinakushika vantu voshe kuoshe linga vatenguluke ku vipi viavo. 31 Muomu nalivuahesela laja litangua lije akasompa cifuti lioshe kuakuhona kahangu kuhitila muli yala uje yanahangula. Kaha ha cuma eci nahana vukaleho ku muntu uoshe hakusangula uje yala ku vatsi!

32 Honi omo vovuile Paulu ahandeka kusanguka ku vatsi, vamo vamushendumuine vuno honi vamo vahandekele nguavo, "Tutonda linga tuvue viuma evi naua kuli yove." 33 Kaha Paulu uasezele cije cikungulukilo. 34 Vuno honi vamo vamala valipandakanene nendi nakupua vaka kutsiliela, hakati kavo umo uapuile Ndiyonisiyase, uapuile umo ua mpunga ya Elepase, na mpuevo umo lizina liendi Ndamalise, navakuavo veka naua.