1 Hanima ya viuma evi, Paulu uahumine ku Atena nakuya ku Kolinte. 2 Kaha kuje ualiuanene na Kayunda ua lizina lia Akuila, uje uasemukilile ku Pontase, uje uahuminine ku Itali na mpueyendi Pilisila, muomu Sezale Kalaundiase uashikile linga Vayunda voshe vahume mu Loma. Kaha Paulu uayile nakuvamona, 3 kaha uatumamene nakupanga hamo navo, muomu uakele nakutunga vimbalaka, ngue muvakele nakulinga vakevo. 4 Paulu uakele nakuhandeka mu njivo ya malombelo ha litangua lia Sapalalo lioshe, mukueseka kukoka Vayunda na Vangelengu ngeci vatsiliele.

5 Omo Silasi na Timateo vahetele kuhuma ku Masendoniya, Paulu ha ntsimbu yendi yoshe ualihanene kuambulula muzimbu nakuhana vukaleho kuli Vayunda ngeci Yesu ikeye Kilistu. 6 Omo vamuluisile nakuhandeka viuma via vipi kuli ikeye, kaha uatotomuene likungu ku vintanga viendi nakuhandeka nguendi, "Nga munazimbala, unapu mulonga ueni vavenia! Yange kunjesi namulonga naumo uahi. Kuhuma lelo nakuya kulutue njiya kuli vaje keti Vayunda." 7 Nankuma Paulu uahumine mu njivo ya malombelo ya Vayunda nakuya ku njivo ya yala umo lizina liendi, Tito Yusitase muka kulemesa Njambi, njivo yendi yalihatela na cikolo ca njivo ya malombelo. 8 Kilisipase uje uapuile ntuama ua mu njivo ya malombelo uje uatsilielele muli muene hamo lika na ntanga yendi yoshe, na vantu vavengi vamu Kolinte vovuile lizi na kutsiliela kaha vavambuitikile.

9 Vutsiki vumo Paulu uamuene cimona cije Muene uahandekele kuli ikeye nguendi, "Keti uvue liova, vuno honi tualelelaho kuhandeka kaha keti ulikele, 10 muomu yange njili hamo nove. Kaha naumo uahi asa kukuvulumuna, muomu njili na vantu vavengi mu nganda eyi." 11 Paulu uakele kuje muaka umo na vingonde vitanu na imo, mukulongesa vantu lizi lia Njambi.

12 Vuno honi omo Ngaliyo uapuile nguvulu ua Loma mu nganda ya Akaya, kaha Vayunda valikunguluile hamo vakuatele Paulu nakumutuala hambanza lia nzango ya kusompela. 13 Vahandekele nguavo, "Ou yala alinakusindiya vantu kulemesa Njambi mu ngila ya kuluisa Lishiko!"

14 Tele Paulu uatondele kuhandeka kaha Ngaliyo uahandekele kuli Vayunda nguendi, "Nga eci cimpande capuile ca mulonga uakuvulumuna cipue via vupi vumo vuanalingi, ngue njinovuilila yeni Vayunda. 15 Vuno honi muomu cinapu cimpande ca kuliviana ha mezi na mazina na Lishiko lieni vavenia, munapande kuvimanusula yeni vavenia. Yange kunjapandele kupua lihako ua viuma evi!" 16 Kaha uavashekele mu nzango ya kusompela. 17 Voshe vakokangeyele Sosetene, uje uapuile ntuama ua njivo ya malombelo, vamupupilile ha mesho a nzango yakusompela. Vuno honi Ngaliyo kahakeleleko mana ku cuma cije.

18 Hanima ya viuma evi Paulu uakele mu Kolinte hamo na vaka kutsiliela ha matangua amengi, kaha honi uavasezele uayile mu vuato ku Siliya hamo na Pilisila na Akuila. Tele kanda ahume ku Senkilise Paulu uatehuile ku mutue uendi muomu ya cisingo cije calisingile. 19 Omo uahetele mu Efeso, kuje Paulu uasezele Pilisila na Akuila, uakovelele mu njivo ya malombelo nakuhandeka na Vayunda. 20 Omo vantu vamulombele linga akale navo ntsimbu yalaha, vuno kavatavele. 21 Vuno honi omo uavasezele uavalekele nguendi, "Nga eci cinapu cizango ca Njambi, kaha njikahiluka naua kuli yeni." Kaha uakovelele mu vuato nakuhuma ku Efeso.

22 Omo uahetele ku Sesaliya, uayile ku Yelusalema mukukameneka cikungulukilo, ambahoni uayile ku Antioke. 23 Munima yakukala navo ntsimbu imo, uahumineko uayile ku cihela ca Ngalatiya na mu Filingiya nakukakolesa vandongisi voshe.

24 Ha ntsimbu ije Kayunda umo ua lizina lia Apolo uje uasemukilile mu Alekizandiliya uezile ku Efeso. Uapuile muntu uakuhandeka muacili, kaha uakele na mana akulumbununa visoneka. 25 Vamunanguile laja mu Ngila ya Muene, kaha uakele na ntuima yakuambulula nakulongesa muacili viuma via hali Yesu. Cipuevene ikeye uazivukile lika viakumbuitika ca Yiuano. 26 Uaputukile kuhandeka nakusimpa mu njivo ya malombelo. Vuno honi omo Pilisila na Akuila vamuvuile, vamutualele ku njivo nakumunangula muacili cikuma Ngila ya Njambi. 27 Omo Apolo uatondele kuya ku Akaya, kaha vaka kutsiliela va mu Efeso vamukuasele mukusonekela mukanda ku vandongisi va mu Akaya nakuvalomba ngeci vamutambule muacili. Omo uahetele kuje, uapuile mukakukuasa cikuma kuli vaje vapuile vaka kutsiliela ngue ku kavumbi ka Njambi. 28 Muomu ikeye na nzili yendi uavianene cikuma Vayunda muvihandeka viavo citona mesho mukumuesa vukaleho vua mu visoneka ngeci Yesu ikeye Kilistu.