1 Cuma cimolika calingiuile mu Ikoniyame, muje Paulu na Mbanambase vayile mu njivo ya malombelo vahandekele mu ngila ije yanehesele ngeci civunga cakama ca Vayunda na Vangelengu linga vatsiliele. 2 Vuno honi Vayunda vaje vakakuhona kutsiliela vashongangeyele vaje keti Vayunda nakuluisa vaka kutsiliela. 3 Kaha Paulu na Mbanambase vakele kuje ntsimbu yalaha, vahandekele nakusimpa hali Muene, uje uasholuele ngeci muzimbu uavo ua kavumbi uapuile ua vusunga mukuvahana nzili ya kulinga vimueso na vikomoueso. 4 Vuno honi vantu va muje mu nganda valitepele, vamo vemanene na Vayunda, vakuavo vemanene na tunganda.

5 Kaha Vayunda na vaje keti Vayunda hamo na vakuluntu vavo, valitavasanene kuyandesa tunganda nakuvasha mavue. 6 Kaha omo tunganda vanangukile eci, vateuelele ku Lisitala na ku Ndemba vinganda via mu Likaoniya na ku mitambela yakuhatako. 7 Kaha kuje vambuluile Muzimbu Uacili.

8 Mu Lisitala muakele yala umo uje uapuile cilema ua mikono hume ha kusemuka cendi kasele kuenda. 9 Uatumamene kuje nakuivua mezi a Paulu, Paulu uamuene ngeci natsiliela, kaha asa ku kanguka nankuma uamutalele ntooma. 10 Kaha Paulu uatambekele na lizi liakama nguendi, "Katuka uimane!" Kaha uje yala uatumbukile nakuputuka kuenda. 11 Omo civunga camuene vije vialingile Paulu, vaputukile kutambeka mu ndaka yavo ya Cilikaoniya nguavo, "Vanjambi vaneja kuli yetu mu cifua ca vuntu!" 12 Kaha valukile Mbanambase lizina nguavo Zeyase, na Paulu nguavo Helemese, muomu ikeye uapuile mukuluntu uakuhandeka. 13 Kasasendote ua Zeyase uje njivo yendi yakulemesela yakele hambanza lia nganda, uanehele vangombe va vankomba na vitsani ku cikolo, muomu ikeye na vaje vivunga vatondele kukombelela nkombelo ku tunganda.

14 Vuno honi omo Mbanambase na Paulu vovuile vije vatondele kulinga, vatavozuele vuzalo viavo nakushatukila mukati ka civunga nakutambeka nguavo, 15 "Nkuma vika muli nakulingila cuma eci? Netu tunapu vantu ngeci yeni! Tulikuno mukuambulula Muzimbu Uacili, nakumitengulula ku viuma viangoco ngeci muije kuli Njambi ua kuyoya, uje uatangele lilu na mavu na cisali na vioshe vije vilimo. 16 Ku miaka ya vakukuluila vetu uatavesele vantu voshe linga vaye mu vingila viavo vavenia. 17 Vuno honi ha ntsimbu ije uahanene vukaleho vuakukala cendi vavenia ha viuma via cili, kaha akamihana kalunga na vimbuto ha ntsimbu yavio, akamihana via kulia nakushulisa mitima yeni nakuvuahelela." 18 Cipue ngocovene na mezi aua a tunganda kuvasele kuvindika civunga kukombelela nkombelo kuli vakevo.

19 Vuno honi Vayunda vamo vahuminine ku Antioke mu Pisindiya naku Ikoniyame vashongangeyele vivunga kaha vashele mavue Paulu nakumukokela hambaza lia nganda omo vayonguele nguavo hamo natsi. 20 Vuno honi omo vandongisi vamuzengelekele, uahindukile nakuimana nakuhiluka mu nganda. Kaha liamukuavo ikeye na Mbanambase vayile ku Ndemba.

21 Omo Paulu na Mbanambase vambuluile Muzimbu Uacili mu Ndemba, kaha vanganialele vandongisi vavengi. Ambahoni vahilukile ku Lisitala na ku Ikoniyame noho vahetele ku Antioke, mu Pisindiya. 22 Paulu na Mbanambase vakolesele vandongisi nakuvatakamesa ngeci vapue vaka vusunga mukutsiliela, vavalongesele nguavo, "Tuapande kuhita mu tuyando tuatuingi ngeci tukovele mu Vumuene vua Njambi." 23 Mu cikungulukilo na cikungulukilo vemikilemo vakuluntu, kaha na malombelo na kuliumina kulia vavakundikile kuli Muene uje ivatsilielelele.

24 Kaha omo vahetele ku cihela ca Pisindiya, vezile ku Pamefiliya, 25 kuje vambuluile lizi ku Pelenga, kaha vasikumukile ku Ataliya. 26 Kaha kuhuma kuje vajavukile mu vuato nakuhiluka ku Antioke ku cihela cije vavakundikile ku kavumbi ka Njambi ku vipangi vije vivamanusuile ku linga.

27 Omo vahetele mu Antioke vakunguluilile hamo vantu vaka cikungulukilo nakuvaleka viuma vije via lingile Njambi kuli vakevo, na muje mua shokololuele ngila kuli vaje keti Vayunda ngeci vatsiliele. 28 Kaha vakele kuje ntsimbu yalaha na vandongisi.