1 Hanima yakuhua mpindangano ije Paulu uasanene vandongisi, kaha uahandekele kuli vakevo mezi akuvasimpisa nakuvasalesa. Ambahoni uakatukile nakuya ku Masendoniya. 2 Uahitile mu vihela vije nakukolesa cikuma vandongisi, uayile ku Akaya, 3 kuje uakatumamene vingonde vitatu. Ha ntsimbu ije uakele nakulivuahesela linga aye ku Siliya omo uazivukile ngeci Vayunda vali na vutumbe vua kumuluisa, kaha uasinganiekele kuhiluka ku Masendoniya. 4 Vamusindikiyile kuli Sopata muna Pihase uakuhuma ku Mbeleya, na Alisitikase na Sekundase uaku Matesalonika, na Ngayase na Timateo vaku ndemba, Taikikase na Tolofimase vaku nganda ya Asiya. 5 Vayile kulutue luetu na kutuvandamena mu Tolouase, 6 vuno honi tuajavukile mu vuato kuhuma ku Filipi hanima ya ciuano ca mbolo yakuhona cimbaluila, kaha munima ya matangua atanu tuakavauanene ku Tolouase, kuje kukeko tuakakele matangua atanu na avali.

7 Ku cinguezi cakuhua ca litangua lia Sapalalo, tualiuanene nakutavula mbolo, kaha Paulu uakele nakuhandeka navo, kaha uatualeleho kuhandeka cikuma noho mukati kavutsiki, muomu uatondele kuya lia mukuavo. 8 Muakele vindeya viavingi mu milili ua kuilu uje tuakele nakuliuanena. 9 Mukuenje ua lizina lia Yutikase, uje uatumamene ku njanena, uakosele tulo omo tele Paulu alinakuhandeka ntsimbu yalaha, kaha uauililile ha mavu kuhuma haje ha mulili uahelu lia njivo ya mu citatu. Kaha omo uamukuatele uauanene ngeci natsi. 10 Vuno honi Paulu uasikumukile ha mavu, nakukotama hali ikeye nakumuvumbatela. Kaha uahandekele nguendi, "Keti mulishoshomuene, muomu hanga acili nakuyoya!" 11 Ambahoni Paulu ualondele ku mulili ua kuilu, kaha hanima yakupazula mbolo na kulia, uatualeleho kuhandeka navo mu ntsimbu yalaha noho cimene, kaha uayile. 12 Kaha vatualele uje mukuenje kuimbo liavo oku tele ali na kuyoya kaha eci cavasimpisile cikuma.

13 Vuno honi yetu tualivangele kuya mu vuato nakukajavuka kuya ku Asose, kuje tuayile nakukambata Paulu linga akovele mu vuato. Uatushikile kulinga evi, muomu uayile kuje na ngila ya ntunda. 14 Omo uatuuanene ku Asose, tuamukovelesele mu vuato kaha tuahetele ku Mitilene. 15 Kaha omo tuajavukile mu vuato kuhuma kuje, liamukuavo tuahetele kuje ku cihela ca kulitala na Ciyosi, kaha liamukuavo tuayile ku Samose kaha naua hanima ya litangua eli tuayile ku Miletu. 16 Nankuma, Paulu uasinganiekele kuhona kuhita ku Efeso, linga keti akale ntsimbu yalaha mu Asiya, muomu uatondele kuheta ku Yelusalema, ngue casiua, ha litangua lia Pentekosita mu nganda ya Asiya.

17 Omo uakele ku Miletu kaha uatumine mezi ku Efeso ku vakuluntu va cikungulukilo linga valiuane nendi. 18 Kaha omo vezile kuli ikeye, uahandekele kuli vakevo nguendi, "Yeni vavenia muazivuka omo njayoyele hakati keni ha ntsimbu yoshe kuputuka ha litangua liakulivanga lije linjahetele mu nganda ya Asiya, 19 mukupangela Muene nakulihana na masozi na vieseko vianjiuanene muomu yakunjiyandesa kuli Vayunda. 20 Nacimo cahi cije cacili njahonouele kuhandeka kuli yeni, kaha naua nakumilongesela hakati ka vantu, kaha nakumilongesela ku njivo na njivo. 21 Nakuhana vukaleho kuli Vayunda na Vangelengu ha kutengulukila kuli Njambi na lutsilielo kuli Muene uetu Yesu Kilistu. 22 Kaha taleni njilinakuya ku Yelusalema ngue muje muatondelamo Cimbembesi Uakulela, kuakuhona kuzivuka vika vije vikalingiua kuli yange. 23 Njazivukile lika nguange mu nganda muoshe Cimbembesi Uakulela anjinangula nguendi, kamenga na vukalu vinanjivandamena. 24 Vuno honi njasinganieka nguange muono uange kuuesi na seho kuli yange, njatondo lika kumanesa vipangi vianjihanene Muene Yesu kuvilinga, vije vikevio kuambulula Muzimbu Uacili ua kavumbi ka Njambi.

25 "Kaha honi njazivuka nguange naumo uahi hakati keni injinambuluila Vumuene vua Njambi, akamonaho cihanga cange, lueka naua. 26 Nankuma njimilekesa ha litangua lia lelo nguange kunjesi na mulonga ua maninga hali umo ueni nga azimbala. 27 Muomu kunjahonouele kumileka vioshe via cizango ca Njambi. 28 Liniungeni kaha naua niungeni vutanga vua vampanga vuje Cimbembesi Uakulela namihana kutala, kuniunga cikungulukilo ca Njambi cije calandele na maninga a munendi. 29 Njazivuka nguange nga njinai, tungunga vaje vakuteuesa vakeja hakati keni na kupihisa vutanga vua vampanga. 30 Vamo vaku civunga ceni vakeja nakuhandeka makuli linga vatangule vandongisi ngeci vavakave. 31 Nankuma zangameni, vulukeni ngueni ha miaka itatu vutsiki na mutania kunjahonouele kunangula uoshe na masozi.

32 "Kaha honi njimikundika kuli Njambi linga aminiunge naku muzimbu ua Kavumbi kendi, uje uasa kumitungisa na kumihana vikuisulo vije viali navio Njambi ha vantu vendi voshe. 33 Ku njatondele siliva cipue ngolinde cipue vuzalo vua muntu. 34 Muazivuka yeni vavenia ngueni njapangele na mavoko ange vavenia hakulikuasa yange vavenia na vakuasi vange. 35 Ha vioshe evi njamihana cimueso ngeci ha vipangi evi tuapande kukuasa vaka kuzeya, kuvuluka mezi a Muene Yesu, muomu ikeye vavenia uahandekele nguendi, ‘Cinapu cakukuisula cikuma kuhana kupulakana kutambula.’"

36 Omo uamanuisile kuhandeka, uatsikamene ha mavu navo voshe na kulombela. 37 Valilile cikuma hakati kavo voshe, kaha vamuvumbatelele na kumutsemba. 38 Vakele na vusiua muomu vovuile ahandekele nguendi ku vakamumonoho ceka naua. Kaha vamusindikiyile ku vuato.