1 Omo vasinganiekele nguavo tuapande kujavuka nakuya ku Itali, vahanene Paulu na vakuavo vinzinda mu mavoko a Njuliasi mukuluntu ua mpunga ya masualale va Loma ije vatumbuile nguavo, "Masualale va Nguvulu." 2 Kaha tuakovelele mu vuato kuhuma ku Andalamitayame, vuato vuje vavuaheselele cimueja kuya ku vikuma via ku mbonge ya Asiya, kaha vasunuine vuato nakuya. Kaha Alisitakase uje Kamasendoniya uahumine ku Tesalonika, uakele hamo netu. 3 Liamukuavo tuahetele ku Sindone. Kaha Njuliasi uakele na ngozi kuli Paulu kaha uamutavesele kuya kuli vavusamba vendi linga vakamuhaneko vukuasi. 4 Tuahumine ku Sindoni nakuya. Muomu mpunzi yakele nakuhuminina kuje tuakele nakuya kaha tuakele na kukavangeya lika nkundu ya Sepulasi. 5 Hanima yakujavukila musinia lia cisali kuseza Silisha namu Pamefiliya, kaha tuahetele ku Maila mu Lisiya. 6 Kuje mukuluntu ua masualale uauanene vuato vuahumine ku Alekizandiya vuakele nakuya ku Itali, kaha uatukoveselemo.

7 Tuajavuile vuato kamandende ha matangua amengiko kaha tuauanene vukalu vuakama tele kanda tuhete ku nganda ya Sinindase. Kaha mpunzi yatuvindikile kutualelelaho na vungenzi vuetu, nankuma tuashuangesele lika nkundu ya Kelete kuje mpunzi kuyakele na kupekumukila cikuma nakuhita kuyehi na cikuma ca Salemone. 8 Tuashuenene kuyehi na cikuma na kukaluua cakama, kaha tuahetele ku mutambela uje vatumbuile nguavo vikuma viakuhona Vukalu, keti kulahako na nganda ya Laseya.

9 Kaha tuakele kuje ntsimbu yalaha cikuma noho caputukile ku kaluua mu vungenzi vuetu, muomu ntsimbu ino litangua lia ku liumina via kulia tele linahiti laja. Nankuma Paulu uavananguile, 10 nguendi "Yeni vamala njamono nguange vungenzi vuetu kuhuma hano nakuya kulutue vukakala na vukalu, vitenga vili mu vuato vikapihia, kaha naua na vuato vukapihia na miono ikanonga." 11 Vuno honi uje mukuluntu ua masualale uatavele via mukakuendesa vuato navije viahandekele vavenia vuato kupulakana viahandekele Paulu. 12 Kaha cije cikuma kucapuile cacili kukalaho mu ntsimbu ya cisika, nankuma vamala vakele na cizango cakusununa vuato nakueseka kuheta ku Fonikisi, nga citava linga tukakaleko mu ntsimbu ya cisika. Fonikisi capua cikuma camu Kelete cije catala mu kunto ya ngangela na mu mbuela ya ngangela.

13 Omo mpunzi yaindende yahumine ku mbuela yaputukile kupekumuka kaha vaje vamala vasinganiekele nguavo vasa kutualelaho na vutumbe vuavo, linga vakokele ntongo ya vuato nakujavuka kuhita kuyehi na cikuma ca Kelete. 14 Vuno honi vuasi vuasi mpunzi yakama ije vatumbuile nguavo, "Mpunzi ya mu kunto ya Ngangela," yapekumukile cikuma kuhuma ku ntunda ya nkundu. 15 Kaha mpunzi yapupile ku vuato, kaha capuile ca cikalu cikuma kutalesa ntongo ya vuato kuvuizililo vuampunzi, kaha tuecelele vuato linga mpunzi ivupekumune. 16 Omo tuahetele ku nkundu yaindende ije ivatumbuile nguavo Kaunda, ku mutambela ua mbuela kuakele vukalu vumo vuno honi tuasele kukuta vuato vuavundende ku vuato vuakama linga vukale muacili. 17 Vakokele vuje vuato vuavundende kamandende nakuvukutila ku vuato vuakama. Vakele na liova cikuma nguavo hamo vuato vukakateya ha musekeseke uaha masima a cisali kuyehi na cikuma ca Limbiya, nankuma vavungile vije vintanga viendesele vuato na mpunzi nakuecela vuato linga vupekumuke lika na mpunzi. 18 Mpunzi yakama cikuma yatualeleho kupekumuka, nankuma, liamukuavo vaputukile kumbangela mu ndonga vitenga vimo vije viakele mu vuato, 19 Kaha ha litangua lia mucitatu naua vombilile vimo viakulikuasesa ku vuato mu ndonga. 20 Ha matangua amengi kutuasele kumona litangua cipue vintanga ntanga, mpunzi yakele na kupekumuka cikuma. Kaha hamamanusuilo kutuakele na lutsilielo lua kuovoka.

21 Omo voshe vakele ntsimbu yalaha cakuhona kulia, kaha Paulu uemanene nakuhandeka kuli vakevo nguendi, "Vamala, nga muanjivuililile na kuhona kujavuka kuhuma ku Kelete ngue viuma evi kuviapihile na kuzimbala. 22 Vuno honi njimilomba honi nguange koleseni mitima, naumo uahi ueni a kazimbalesa muono uendi, kuvanga lika vuato vukevo vukapihia. 23 Muomu izau vutsiki kuli yange kunemanene kangelo ua Njambi kuje kunjakundama nauje njikalemesa, 24 kaha uahandekele nguendi, ‘Keti uvue liova, Paulu! Uapande kuimana ku mesho a Sezale. Kaha Njambi na kuniungila voshe ava uli nakujavuka navo mu vuato.’ 25 Nankuma likoleseni, vamala, muomu njili na lutsilielo muli Njambi kaha cikalingiua vene ngue muje muananjilekelamo. 26 Vuno honi mankimba akatutuala kumo ku nkundu."

27 Omo vutsiki vua vulikumi na vuuana vuahetele, tuakele na kuhungumuka mu cisali ca Andiliya, omo tele hakati ka vutsiki kaha vakakujavula vasinganiekele nguavo vuavuno vaheta ku ntunda. 28 Nankuma vesekele kulova ca mema, kaha vauanene kulova capuile mamita makumi auana (40), omo kuahitile ka ntsimbu kakandende naua vesekele kulova ca mema naua, kaha vauanene kulova ca mema mamita makumi atatu (30) 29 Kaha vakele na liova nguavo vuato vukahungumukila ku mavue, nankuma, vasoselele vikuateso viuana mu mema ku ntongo ya kunima ya vuato, kaha vavandamene nguavo kuce vuasi. 30 Ambahoni omo vaka kujavula vesekele kuteua kuhuma mu vuato, vahakele ka vuato kakandende mu mema linga vamuese ngue vaje vaya nakuhaka vikuateso vimo ku ntongo ya kulutue lua vuato. 31 Vuno honi Paulu uahandekele kuli uje mukuluntu ua masualale naku masualale nguendi, "Nga ava vaka kujavula vahuma mu vuato kaha ku mukovoka." 32 Nankuma masualale vavatuile mikole ije yakuatele vuato vuavundende nakuvuecela ngeci vuhungumuke.

33 Omo litangua tele kanda lice Paulu uavalambelele voshe ngeci valie viakulia nguendi, "Munakala na kuvandamena matangua likumi na auana, kaha ha ntsimbu yoshe eyi kumuakele nakulia viakulia. 34 Nankuma njimilambelela muvoshe linga mulieko vimo viakulia, ngeci muyoye, muomu naumo uahi akanongesa cipue cinkambu caku mutue uendi." 35 Hanima yakuhandeka evi, Paulu uambatele mbolo, nakutsantsela kuli Njambi ha mesho avo voshe, uaipazuile nakuputuka kulia. 36 Kaha voshe vasimpile kaha vambatele viakulia valile. 37 Tuva voshe tuapuile vihita vivali na makumi atanu na avali na vantu vatanu na umo tuakele muje mu vuato (276) 38 Hanima yakulia nakukuta, vombilile tiliku mu cisali linga vuato vuehuke.

39 Kaha omo kuacele, vakakujavula kuvazivukile kuje kuvakele, vuno honi vamuene cinkonde cimo cije cakele na museke seke, kaha vayonguele nguavo nga citava, vapande vakatutike vuato kuje ku museke seke. 40 Nankuma vavatuile vikuateso nakuviseza vivombele ha cisali mema, kaha ha ntsimbu ije vene vazituile mikole ije yakele ku vilapo vije viendesele vuato. Ambahoni vajunduile vintanga vije viakele kulutue lua vuato linga mpunzi ipekumune vuato kulutue, kaha tuasungamene ku cikuma. 41 Vuno honi vuato vuapupile ha museke seke uaha masima a cisali, kaha vuakakatelele, kaha kuvuasele kushuena, ha ntsimbu ijevene ntongo ya kunima ya putukile kutavozoka vimbazuvuila mbazuvuila na nzili ya mankimba.

42 Vutumbe vua masualale vatondele kutsiha vinzinda, linga keti kukale umo hamo atana nakuteua. 43 Vuno honi mukuluntu ua masualale, uatondele kuovola Paulu, uavavindikile kulinga vutumbe vuavo. Uashikile voshe vaje vasele kutana ngeci vatumbuke mu vuato vuasi kaha vatane nakuya ku ntunda, 44 kaha voshe vaje vasaleleho vavakavele, oku valikuatelela ku mavaya vamo valikuatelele kuviuma vije via pokuozokele ku vuato. Mungila eyi vene voshe vahetele muacili ku ntunda.