1 Hanima ya matangua atatu Fesitase uahetele mu mbonge, uahumine ku Sesaliya nakuya ku Yelusalema, 2 kuje vakuluntu va vasasendote na vakuluntu va Vayunda vamulekele vimpande viakuuanena Paulu mulonga. Kaha valombele Fesitase, 3 linga avakuaseko kutuma Paulu ku Yelusalema muomu vatumbile vutumbe vuakumutsihila mu ngila. 4 Fesitase uakumbuluile nguendi Paulu vali nakumuniungila mu kamenga ka ku Sesaliya kaha naua na ikeye vavenia na singanieka kuhiluka kuje vuavuno. 5 Kaha uahandekele nguendi, "Eceleni vantuama veni vamo vaye nange, nga kulicimo canapihisa ou yala, kaha vasa kukamuhana mulonga."

6 Hanima yakutumama navo matangua keti akupulakana matangua atanu na atatu cipue likumi, kaha Fesitase uayile ku Sesaliya, liamukuavo cimene uatumamene ha cituamo cendi cakusompela kaha uashikile ngeci vanehe Paulu kuli ikeye. 7 Omo Paulu uahetele, Vayunda vaje vahumine ku Yelusalema vamuzengelekele. Vanehele milonga yaingi hali ikeye yakumuluisa, vuno honi kuvakele na vukaleho. 8 Paulu ualiamenene ikeye vavenia nguendi, "Naimo yahi ngila injinapokuelamo Lishiko lia Vayunda, cipue kuluisa Njivo ya Njambi, cipue kuluisa Sezale."

9 Vuno honi Fesitase, uatondele kuvuahelesa Vayunda kaha uehuile Paulu nguendi, "Nkuma utonda kuya ku Yelusalema linga njikakusompele kuje ha milonga eyi ndi?"

10 Paulu uahandekele nguendi, "Njinemana ku mesho a mpunga ya Sezale, kaha kuje kukeko munapande kunjisompela. Nacimo cahi cinjinapihisa kuli Vayunda, ngue muje vene mu unazivukila nove. 11 Nga njapokola Lishiko nakulinga cuma ca cipi cije cinjinapande kutsila, kaha kunjikalombo kuteua. Vuno honi nga kuhesi vusunga ha milonga eyi ivali nakunjinehela, kaha naumo uahi akanjihana ku mavoko avo. Kaha njikatuala vimpande viange kuli Sezale."

12 Ambahoni Fesitase hanima ya kulitavasana na vaka kumunangula uakumbuluile nguendi, "Unatuala vimpande viove kuli Sezale, kaha kuli Sezale vene kukeko ku ukaya."

13 Hanima ya matangua amo, muene Angilipa na Mbenisi vayile ku Sesaliya mukumeneka Fesitase. 14 Omo vakele kuje matangua amo, Fesitase uanehele mulonga ua Paulu kuli muene kaha uahandekele nguendi, "Kuli yala kuno yasezele Felekisi mu kamenga, 15 omo njakele mu Yelusalema, vakuluntu va vasasendote na vakuluntu va Vayunda vanjilekele via hali ikeye kaha vanjilombele nguavo njimuhane mulonga. 16 Kaha njavalekele nguange keti kufutisi yetu va Loma kuhisa muntu uje ivanavangeya mulonga, oku kanda alimone mesho na mesho navaje vanamuvangeya, nakumuhana ntsimbu ya kuliohiela ku mulonga uendi. 17 Omo vezile kuno, kunjasimbuile, kaha lia mukuavo njatumamene ha cituamo ca kusompela kaha njashikile uje yala nguange vamunehe kuli yange. 18 Kaha omo vaka kumuvangeya vemanene, kuvamuhanene mulonga uavupi ngue muje njavandamenene nguange vaka lingamo. 19 Vuno honi vakele nakulinga vimpata nendi ha lutsilielo luavo na hali yala umo ivatumbuile nguavo Yesu, uje uatsa, vuno honi Paulu hanga acili nakuhandeka nguendi acili nakuyoya. 20 Muomu njahonouele kutondesesa cimpande eci, njamuihuile nguange utonda kuya ku Yelusalema linga vaka musompeleko ha milonga eyi. 21 Vuno honi Paulu ualombele linga vamuniunge kaha na Sezale linga asinganieke ha mulonga uendi. Kaha njahanene mashiko kuli ikeye linga vamuniunge kuvanga noho njikamutuma kuli Sezale."

22 Ambahoni Angilipa uahandekele kuli Fesitase nguendi, "Njitonda njimuivue yange vavenia ou yala omo a handeka." Kaha Fesitase uakumbuluile nguendi,

"Imene ukamuvua."

23 Kaha liamukuavo Angilipa na Mbenisi vezile na kalua kakama, kaha vakovelele mu njivo muva kakungulukila civunga na vakuluntu va masualale na vamala ava vakakumona via nganda. Kaha Fesitase uashikile linga vakovelese Paulu mukati. 24 Kaha Fesitase uahandekele nguendi, "Muene Angilipa na voshe valihano netu, muamono ou yala uje ikeye Vayunda voshe valina kunjinehela vimpande viendi, voshe vamu Yelusalema na vamuno, vali nakutambeka nguavo kapandele kuyoya naua. 25 Vuno honi njauanene nguavo nacimo cacipi canalingi cahi cije canapandela kutsila, vuno honi omo ualilombelele kutuala vimpande viendi kuli Sezale, njatondele kumutuma kuli ikeye. 26 Vuno honi kunjesi na cimo hali ikeye cinjapandele kusonekela Sezale. Nankuma njamuneha hakati keni voshe, ngue cikumani kuli yove muene Angilpa, linga hanima yakutondesesa mulonga uendi, hamo njikakala nacimo ca kusoneka. 27 Muomu kucikamoneka muacili kuli yange kutuala cinzinda mu kamenga cakuhona kumonesa mulonga uendi."