1 Kaha Paulu uahetele naua ku Ndemba na kuli Lisitala, kuje kuakele mukayesu umo lizina liendi Timateo. Vaina ya Timateo na vakevo vapuile vaka Kilistu vaje vapuile Kayunda, vuno honi vaishe vapuile Kangelengu. 2 Kaha voshe vaka kutsiliela vamu Lisitala na mu Ikoniyame vashangazalele cikuma Timateo. 3 Kaha Paulu uatondele kuya na Timateo, kaha uamulovuele. Ualingile vioshe evi muomu Vayunda voshe vaje vakele mu mitambela ije vazivukile ngeci ishe ya Timateo uapuile Kangelengu. 4 Omo vakele nakuhita mu vinganda, vahanene vaka kutsiliela mashiko aje avahanguile tunganda na vakuluntu mu Yelusalema, kaha vavalekele linga vononoke aje mashiko. 5 Vikungulukilo viakele na nzili mukutsiliela kaha valivuezelele ha litangua na litangua.

6 Kaha Paulu na vakuavo vahitile mu cihela ca Filingiya na mu Ngalatiya muomu Cimbembesi Uakulela uavavindikile kuambulula muzimbu mu nganda ya Asiya. 7 Kaha omo vahetele ku nginga ya Misiya vesekele kuya mu cifuti ca Mbitaniya, vuno honi Cimbembesi ua Yesu kavatavesele. 8 Nankuma vahitile mukati ka Misiya nakuya ku Tolouase. 9 Kaha ku vutsiki vuje vene Paulu uakele na cimona muje uamuene yala umo ua ku Masendoniya nemana nakumulomba nguendi, "Ija kuno ku Masendoniya uakutukuase." 10 Kaha omo Paulu uamuene eci cimona, hajevene tuakatukile nakuya ku Masendoniya, muomu tuasinganiekele nguetu Njambi natusana mukuambulula Muzimbu Uacili ku vantu kuje.

11 Omo tuahumine ku Tolouase tuajavukile mu vuato nakuya ku Samotalase, kaha lia mukuavo tuayile mu Neyapolise. 12 Kaha kuhuma kuje tuahitile ku Filipi, nganda yamutambela uakulivanga mu cifuti ca Masendoniya, ikeyo naua yapuile nganda ya Loma kaha tuakele muje mu nganda matangua amengi. 13 Kaha lia Sapalalo tuakatukile mu nganda tuayile kungenge ya ndonga kuje tuayonguele nguetu kuli mutambela uakukungulukila mukulombela. Kaha tuatumamene nakusikama na vampuevo vaje vakungulukilile kuje. 14 Kaha umo uavo uatuvuile uapuile Lindiya uahumine ku Tiyatila uapuile mukakulandesa vintanga viacili viakuvenguluka naua uapuile mpuevo uakulemesa Njambi, kaha Muene uashokoluele mutima uendi mukuvuilila vije viakele nakuhandeka Paulu. 15 Omo vamumbuitikile ikeye na vantu vamu njivo yendi, kaha uatulaniene nguendi, "Ijeni mukakale mu njivo yange nga muasinganieka ngueni njinapu muka kutsiliela muli Muene." Nankuma uatusindiyile linga tuye.

16 Ha litangua limo omo tuakele nakuya ku cihela cakulombelela, tualiuanene na ngamba ua mpuevo uje uakele na cimbembesi ca cipi cije cakele nakumupangesa mukumona viuma via kulutue. Kaha uapitisile cikuma muene uendi mukuhandeka viuma viacili vije vikalingiua kulutue. 17 Ou mpuevo uakavele Paulu hamo netu kaha uatambekele nguendi, "Ava vamala vanapu vangamba va Njambi Uahelu lia Vioshe! Vali nakuambulula kuli yeni ngila ya kuovoka!" 18 Nankuma ualingile eci matangua amengi, vuno honi Paulu uapihililile, kaha uatengulukile nakuhandeka kuli uje cimbembesi ca cipi nguendi, "Mu lizina lia Yesu Kilistu njikushika nguange huma muli ikeye!" Kaha hajevene cimbembesi ca cipi cahumine muli uje mpuevo. 19 Omo liavenia uje ngamba uevuile nguendi uje mpuevo ngila ya kupangelamo vimbongo inahu, vakuatele Paulu na Silasi nakuvakokangeya nakuvatuala hambanza kuli vakakusuana ku cihela cakulandesela. 20 Kaha vavatualele ku mesho a vakuluntu Valoma nakuhandeka nguavo, "Ava vamala vanapu Vayunda, kaha valinakuneha vukalu mu nganda yetu. 21 Vali nakulongesa futisi ije iluisa Lishiko lietu, yetu tu Valoma, kaha kutuasa kutava futisi yavo cipue kuyikava!" 22 Kaha civunga coshe calitavasanene kuluisa Paulu na Silasi.

Ambahoni honi vaje vakuluntu vatavozuele vuzalo via Paulu na Silasi. Nakushika ngeci vavapupe. 23 Omo vavapupile cikuma, vavahakele mu kamenga, kaha vashikile cikuma muka kuniunga kamenga ngeci apate cikuma ku vikolo. 24 Omo uje muka kuniunga kamenga uatambuile lishiko eli, kaha uavahakele mukati ka mulili ua kamenga nakuhaka mikono yavo mu vikuali.

25 Vuno honi mukati ka vutsiki Paulu na Silasi vakale nakulombela nakuimba miaso ya Njambi, kaha vaje vinzinda vakele mu kamenga vavovuililile. 26 Hajevene kuakele mandunduma akama cikuma kaha luvula lua kamenga luajajele cikuma. Hajevene vikolo via kamenga viashokolokele, kaha malienge ahumine ku vinzinda voshe. 27 Omo uje muka kuniunga kamenga uahindukile, kaha omo uamuene vikolo via shokoloka, uasinganiekele nguendi, vinzinda voshe vanateue, uashomuene mukuale uendi linga alitsihe. 28 Vuno honi Paulu uatambakanene cikuma na lizi liakama nguendi, "Keti ulitsihe! Muomu tuva voshe mutuli muno!"

29 Uje muka kuniunga kamenga uasanene ngeci vamuneheleko ndeya, kaha uashatukililemo, kaha uatsikamene ku mikono ya Paulu na Silasi oku ali nakujaja. 30 Ambahoni uavatuhuile hambanza nakuvehula nguendi, "Muene, nkuma vika njapande kulinga ngeci njovoke?"

31 Kaha vamukumbuluile nguavo, "Tsiliela kuli Muene Yesu, kaha ukovoka, yove na ntanga yove yoshe." 32 Ambahoni vambuluile lizi lia Muene kuli ikeye na kuli voshe vaje vakele mu njivo yendi. 33 Kaha ha ntsimbu ijevene ya vutsiki uje muka kuniunga kamenga uayile hamo navo, uakushile ha vimbandu viavo, kaha hajevene ikeye na ntanga yendi voshe vavambuitikile. 34 Ambahoni uatualele Paulu na Silasi ku njivo yendi, kaha uakavahanene viakulia. Ikeye na ntanga yendi vavuahelele cikuma muomu vatsilielele muli Njambi.

35 Liamukuavo cimene mene vakuluntu Valoma vashikile vantuama va masualale nguavo, "Eceleni ava vamala vaye."

36 Kaha uje muka kuniunga kamenga ualekele Paulu nguendi, "Vakuluntu Valoma vanashiki lizi kuli yove na kuli Silasi nguavo tumiecele. Muasa kuya, kaha yeni mu ciyulo."

37 Vuno honi Paulu uahandekele kuli vaje vakuluntu va masualale va kamenga nguendi, "Kuvatuuanene na mulonga, vuno honi vanatupupilile ha mesho a vantu kuakuhona kutusompesa, cipuevene yetu tuapua vandambo va cifuti ca Loma! Kaha vanatuhakele mu kamenga. Nkuma vatonda kutuecela mu vushueke ndi? Houe! Vakuluntu Valoma vakevo vanapande kuija kuno linga vakutuecele vakevo vavenia linga tuye."

38 Kaha vantuama va masualale vambuluile mezi aua kuli vakuluntu Valoma, kaha omo vovuile ngeci Paulu na Silasi vapuile vandambo va cifuti ca Loma, kaha vovuile liova. 39 Kaha vayile kuli vakevo nakulomba cikonekelo, ambahoni vavahumisile mu kamenga, kaha vavalombele linga vahume mu nganda ije. 40 Omo Paulu na Silasi vahumine mu kamenga, vayile ku njivo ya Lindiya. Kuje vakaliuanene na vaka kutsiliela, kaha vahandekele kuli vakevo mezi akuvasimpisa, kaha vayile.