1 Tele omo Apolo uakele mu Kolinte, Paulu uahitile ku vihela via minkinda via mu nganda kaha uasikumukilile ku Efeso. Kuje uakauanene vandongisi vamo, 2 kaha uahandekele kuli vakevo nguendi, "Nkuma muatambuileho Cimbembesi Uakulela omo muapuile vaka kutsiliela ndi?" Vamukumbuluile nguavo,

"Houe, kanda tuivueho nguavo kuakala Cimbembesi Uakulela."

3 Kaha uahandekele nguendi, "Nkuma cimbuitiko muka vamimbuitikile naco?"

Vamukumbuluile nguavo, "Cimbuitiko ca muka kumbuitika Yiuano."

4 Kaha Paulu uahandekele nguendi, "Yiuano uambuitikile mu cimbuitikilo cakutenguluka ku vupi, kulekesa vantu linga vatsiliele kuli uje eja munima yendi, uje ikeye, Yesu."

5 Omo vovuile eci, kaha vavambuitikile mu lizina lia Muene Yesu. 6 Omo Paulu uavasalekele mavoko endi, Cimbembesi Uakulela uezile hali vakevo kaha vaputukile kuhandeka mu vindaka vieka kaha naua vaputukile kuambulula vunanguizi. 7 Voshe vapuile ngue likumi na vavali.

8 Paulu uakovelele mu njivo ya malombelo kaha ha vingonde vitatu uahandekele nakusimpa, nakulambelela cikuma vantu via Vumuene vua Njambi. 9 Vuno honi vamo vakukola mitima vavianene kutsiliela nakuhandeka viavipi ha ngila ya Njambi ku mesho ya civunga ca vantu, kaha uavasezele, ha kuya na vandongisi uakele nakuhandeka navo mu njivo ya kuli longesela mu Tilanase. 10 Eci catualeleho ha miaka ivali, linga vantu voshe vamu nganda ya Asiya, na Vayunda na Vangelengu vovue lizi lia Muene.

11 Njambi ualingile vikomoueso viavingi kuhitila muli Paulu. 12 Cipue vitambala na vuzalo vije viakele nakulikuasesa vavihanene kuli vaka kuvavala, kaha na mishongo yoshe yavahumine, kaha na vimbembesi viavipi viahumine muli vakevo. 13 Ambahoni vamo Vayunda vaje vakele nakuendangana nakueseka kuhumisa vimbembesi via vipi mukulikuasesa lizina lia Muene Yesu kuhumisa vimbembesi viavipi. Kaha vakele nakuhandeka kuli vaje vakele navio nguavo, "Njimishika mu lizina lia Yesu uje yali nakuambulula Paulu humamo." 14 Vaje vana vatanu na vavali va vamala va Kayunda uje uapuile Mukuluntu ua Kasasendote ivatumbuile nguavo Sikeva, vakevo vakele nakulinga evi.

15 Vuno honi cimbembesi cacipi cahandekele kuli vakevo nguaco, "Yesu njamuzivuka, na Paulu naua njamuivuaho viendi, vuno honi nkuma, yeni veya?"

16 Kaha uje yala uakele na cimbembesi cacipi uavaluisile, navukalu, nakuvahiana voshe kaha vahumine mu njivo cakuhona vuzalo na vimbandu. 17 Omo eci vacizivukile kuli Vayunda na Vangelengu na vantu voshe vaje vakele mu Efeso, kaha muntu uoshe uakele na liova, kaha lizina lia Muene Yesu valilemesele. 18 Kaha naua vuingi vuavaje vapuile vaka kutsiliela valitavelele vipi viavo na kuhandeka vilinga viavo. 19 Vuingi vua vaje vakele nakulinga mantseno vambatele mavulu avo naku atsimika hakati ka civunga, kaha omo vapandakanene vimbongo via aje mavulu viapuile makulukazi a makumi atanu a vimbongo via muuaya uaya ua Siliva (50,000) 20 Kaha mungila eyi vene lizi lia Muene liakolele cikuma nakushandokela kuoshe.

21 Hanima ya viuma evi kulingiua, Paulu uasinganiekele kuhita ku Masendoniya na ku Akaya nakutualelelaho kuya ku Yelusalema. Kaha uahandekele nguendi, "Hanima yakuya kuje, njinapande naua kuya ku Loma". 22 Kaha uatumine vakuasi vendi vavali, Timateo na Elasitase ku Masendoniya, muka ntsimbu lika ikeye uakele mu nganda ya Asiya.

23 Ha ntsimbu ije kuakele mpindangano yakama mu Efeso muomu ya Ngila ya Muene. 24 Yala umo ivatumbuile nguavo Ndemeteliase muka kufula viuma via siliva, ualingile cifua ca njivo ya siliva yakulifua ngue njivo ya Atemesi kamponia ua mpuevo, kaha evi vipangi viendi vianehele vimbongo viavingi kuli vaka kupanga. 25 Uakunguluile voshe hamolika vakuavo veka vaje vakele navipangi ngue viavo, kaha uahandekele kuli vakevo nguendi, "Yeni vamala, muazivuka ngueni vufuko vuetu vukahumu ku vipangi evi. 26 Mu namono kaha munevu naua nguavo keti mu Efeso lika vuno honi na mu mutambela ua nganda ya Asiya, ou Paulu nakoko vantu vavengi nakuhandeka nguendi tumponia tuakupanga na mavoko kutuapuile vanjambi. 27 Kaha kuli vukalu keti lika kundando yetu vuno honi naua na ku njivo yakama ya kamponia ua mpuevo Atemise kuvaihana kalemesa, kaha uoshe muntu ua mu nganda Asiya na cifuti coshe uahi akamulemesa!"

28 Omo vovuile evi, vanienguele na kutambakana nguavo, "Uakama Atemise kamponia ua vaka Efeso!" 29 Mu nganda muoshe muakele kalua, kaha vantu vashatukilile mu njivo yakuehela kaha vakuatele Ngayase na Alisitakase, vaku Masendoniya vavali vaje vakele nakusindikiya Paulu. 30 Paulu uazangele kuya hakati ka civunga, vuno honi vandongisi vamuvindikile, 31 navajevene vakuluntu va nganda ya Asiya, vaje vapuile vasepa vendi, vamutuminine mezi akumulekesa nguavo keti akovele mu njivo yakuehela. 32 Ha ntsimbu ijevene, vamo vakele na kutambakana cuma cimo, vamo cikuavo, kaha civunga cakele na kalua na vuingi vuavo kuvazivukile cije civalikunguluilile hamo. 33 Vamo vantu va ha civunga cije vasompesele Elekizanda, uje ivatualele Vayunda kulutue. Kaha Elekizanda uavaholuesele nakueseka kuliohiela hakati ka vantu. 34 Vuno honi omo vazivukile nguavo ikeye Kayunda, mu vintsimbu vivali voshe vatambakanene mukulivuasana nguavo, "Uakama Atemise kamponia ua vaka Efeso!"

35 Vuno honi omo muka kusoneka ua nganda uaholuesele civunga, uahandekele nguendi, "Vantu va mu Efeso, nkuma iya kazivuka nguendi nganda ya Efeso yapua njivo ya kutumbikila Atemisi uakama na kamponia uje uauile muilu? 36 Muomu viuma evi kuviasiua kuviviana munapande kuholoka kaha naua keti mulinge viuma muvuasi. 37 Munanehe vantu ava keti ngue vezi va mu njivo ya tumponia cipue ngue vanashaula kamponia ua mpuevo. 38 Nga Ndemeteliase na vaka kupanga vendi valina kuvangeyaho umo, vinzango viashokoloka mukuhana ciyulo, kaha tuli naua na vaka nzili yakama vaka kusompesa kaha veceleni vanehe vimpande viavo viakuliluisa vakevo vavenia. 39 Vuno honi nga kuli vimo vikuavo mutonda kuzivuka, munapande kuvihandekela mu nzango yakuliuanena. 40 Muomu hanima yevi vinalingiua lelo, tuli muvukalu vuakama vuakutuvangeya nguavo yetu tunanehe mpindangano. Kaha kukuesi kukonekela ha kalua aka koshe kanalingiua lelo, kutuasa kuhana vukaleho vuacili ha viuma evi." 41 Hanima yakuhandeka evi uasunuine civunga eci.