1 Kuakele yala umo mu Sesaliya lizina liendi Koneliasi, uje uapuile ntuama ua masualale Valoma cihita cimo (100) vaje vavatumbuile nguavo, "Civunga ca masualale va Itali." 2 Uapuile yala uavakakulemesa Njambi uakuvuila Njambi liova hamo na ntanga yendi yoshe. Naua uakele nakukuasa cikuma vantu vakuhutua, kaha ntsimbu yoshe uakele nakulombela kuli Njambi. 3 Ha litangua limo tele ha ntsimbu ya mucitatu ya mutania ua cinguezi, uakele nacimona cije muamuene muacili kangelo ua Njambi uezile nakuhandeka kuli ikeye nguendi, "Koneliasi!"

4 Uatalele kuli kangelo na liova nakuhandeka nguendi, "Nkuma vika Muene?"

Kangelo uamukumbuluile nguendi, "Njambi navuluka malombelo ove na vipangi viove viacili. 5 Kaha honi tuma vamala vaye ku Yopa kuli yala umo Simoni ivatumbula Petulu kaha vamunehe kuno. 6 Ikeye napu mungezi mu njivo ya Simoni uje muka kufutungula vilambu, njivo yendi ili kuyehi na cisali." 7 Omo uje kangelo yakele nakuhandeka nendi uayile, kaha Koneliasi uasanene vangamba vendi vavali na lisualale uje uapuile uavaka kulemesa Njambi, umo uavaje vakele nakumupangela. 8 Hanima yakuvaleka vioshe, uavatumine ku Yopa.

9 Liamukuavo, omo vakele mu ngila nakuya ku Yopa, kaha Petulu uayile ha ntsimba lia njivo nakulombela tele litangua lili hakati ka mutue. 10 Uevuile njala kaha uakele nakutonda viakulia, tele vacili nakuvuahesa viakulia, uakele nacimona. 11 Uamuene lilu liashokoloka na cuma cimo cakulifua ngue ntanga yakama ije yazezumukilile ha mavu yakukuta ku vimbango viuana via lifuti. 12 Mukati kayo muakale miyati yoshe ya tusitu, na tusitu vakulikoka ha mavu na tuzila. 13 Kaha uevuile lizi ngualio, "Katuka Petulu, tsiha kaha alia."

14 Vuno honi Petulu uahandekele nguendi, "Houe Muene, muomu kanda njicilieho cuma cimo cakujuala cipue cakuhona kulela."

15 Kaha lizi liahandekele kuli ikeye naua ntsimbu ya mucivali ngualio, "Keti utumbule nguove via kuhona kulela vije Njambi nalelesa. 16 Eci calingiuile ha vintsimbu vitatu, kaha ije ntanga vaihiluisile naua muilu."

17 Tele Petulu alinakusinganienga hali cije cimona mucinalumbunukila, vamala vaje vavatumine kuhuma kuli Koneliasi vehuile ku njivo ya Simoni kaha vemanene ku cikolo. 18 Vehuile nguavo, "Nkuma kuli mungezi kuno uje ivatumbula nguavo Simoni Petulu ndi?"

19 Tele Petulu ali nakusinganieka cimona, Cimbembesi uahandekele kuli ikeye nguendi, "Tala, vamala vatatu vali nakukutonda. 20 Katuka sikumuka ha mavu, linga ukaye navo cakuhona kulisindiya, muomu yange njavatumu." 21 Kaha Petulu uasikumukile ha mavu kuli vaje vamala nakuhandeka nguendi, "Yange uno muli nakutonda. Nkuma vika munezila kuno?"

22 Kaha vamukumbuluile nguavo, "Koneliasi ntuama ua masualale cihita cimo (100) ikeye natutumu kuno. Ikeye uapua yala ua vusunga nakulemesa Njambi, kaha naua Vayunda voshe vaka musingimika cikuma. Kaha kangelo uakulela ua Njambi uamulekele linga akulanie uye ku njivo yendi ngeci akevuilile vije viukahandeka." 23 Nankuma Petulu ualaniene vaje vamala linga vakose mu njivo yendi.

Kaha liamukuavo uayile hamo navo, navamo vaka kutsiliela vaje vahumine ku Yopa vayile hamo nendi. 24 Kaha liamukuavo vahete ku Sesaliya, kuje Koneliasi uakele nakuvavandamena, hamo navavushoko na vavusamba vendi vaje valaniene. 25 Hakuheta ca Petulu, Koneliasi uamusheshele nakuua ku viliato viendi nakumulemesa. 26 Vuno honi Petulu uamukatuile nakuhandeka nguendi, "Katuka njinapu nji muntu lika." 27 Kaha omo uakele nakuhandeka nendi, uakovelele mu njivo kaha uauanene vantu vavengi valikungulula hamo. 28 Kaha uahandekele kuli vakevo nguendi, "Yeni munazivuka ngueni Kayunda Lishiko liendi kulitavesa kulimenekele na kukala hamo nava keti Vayunda. Vuno honi Njambi nanjimuesa ngeci yange keti njiyongole muntu umo nguange uakujuala cipue uakuhona kulela. 29 Nankuma omo muanjisanene, njinezile kuakuhona vimpata. Kaha honi njihula nkuma vika muanjisanenena."

30 Koneliasi uamukumbuluile nguendi, "Yapuile ngue ntsimbu ino vene tele munahiti matangua auana omo njakele na kulombela mu njivo yange ha ntsimbu ya mucitatu ya cinguezi. Kaha hajevene yala umo uazalele vuzalo viakuviakuma uemanene kulutue luange. 31 Kaha uahandekele nguendi, ‘Koneliasi lilombelo liove vanalivu na vipangi viove viakukuasa vihutu vana vavuluka kuli Njambi. 32 Tuma umo ku Yopa linga akasane yala umo lizina liendi Simoni ivatumbula Petulu. Napu mungezi ku njivo ya Simoni uje muka kufutungula vilambu uje uakala kungenge ya cisali.’ 33 Nankuma, njakusanene vuasi vuasi, kaha unavuahesa omo uneja. Kaha tuva voshe tuli kuno ku mesho a Njambi nakuivuilila vije Muene nakushiki kuhandeka."

34 Ambahoni Petulu uaputukile kuhandeka kuli vakevo nguendi, "Muavusunga njinevuisisa nguange Njambi kekuyengula. 35 Vaje voshe vamuteua nakulinga vije viacili navatambula, kakatala ku muyati ua vantu. 36 Muazivuka muzimbu uatumine kuli Vaisaleli, uje uakuambulula Muzimbu Uacili ua ciyulo kuhitila muli Yesu Kilistu, Muene ua voshe. 37 Uje muzimbu uashandokelele mu Yundeya, uaputukilile mu Ngalileya munima ya Yiuano ha kuambulula kumbuitika ca kutenguluka. 38 Muje Njambi uavuavesele Yesu uaku Nazaleta na Cimbembesi Uakulela na nzili. Uakele nakuya kuoshe nakupanga viacili nakukanguisa vaje voshe vakele na nzili ya Liyavolo, muomu Njambi uakele hamo nendi. 39 Tuvakaleho kuvije vioshe vialingiuile mu Yundeya namu Yelusalema. Kaha vamutsihile mukumushukika ha cilindakano. 40 Vuno honi Njambi uamusanguile ku vatsi ha litangua lia mu citatu na kumutavesa linga alisholole, 41 keti ku vantu voshe vuno honi kuli yetu lika vaje vahanguile Njambi kupua vakaleho vendi, yetu vaje valile nendi na kunua nendi hanima yakusanguka ku vatsi. 42 Uatushikile kuambulula ku vantu na kuambulula vukaleho ngeci Njambi namuhangula kupua muka kuyula uavaka kuyoya na vatsi. 43 Kaha tunanguizi voshe va Njambi vakahana vukaleho nguavo uoshe uje akatsiliela muli ikeye vakamukonekela ku vipi viendi kuhitila muli lizina liendi."

44 Tele Petulu uakele nakuhandeka, Cimbembesi Uakulela uezile hali voshe vaje vovuile muzimbu. 45 Kaha Vayunda vaka kutsiliela vaje vezile na Petulu kuhuma ku Yopa valikomokelele cikuma hakumona vuana vua Cimbembesi Uakulela vanavuhana cipue kuli vaje keti Vayunda. 46 Muomu vevuile vali nakuhandeka mu vindaka viakuliseza seza nakulemesa vukama vua Njambi, ambahoni Petulu uahandekele nguendi, 47 "Ava vantu vanatambula Cimbembesi Uakulela, ngue muje yetu tuamutambuile. Nkuma kuli umo asa kuvavindika kuvambuitika ku mema ndi?" 48 Nankuma uavashikile linga vavambuitike mu lizina lia Yesu Kilistu. Kaha vamulombele linga akale navo matangua amandende lika.