1 Omo litangua lia Pentekosita liahetele, vaka kutsiliela voshe vakungulukile mu cihela cimolika. 2 Hajevene muilu muahumine cililimo ngue kupekumuka ca mpunzi yakama, kaha yashulisile njivo yoshe muje muvatumamene. 3 Vamuene vije viafuile ngue milengi ya tuhia vije vialihangunukile kaha viakele hali umo na umo uavo. 4 Voshe vashulile na Cimbembesi Uakulela kaha vaputukile kuhandeka mu vindaka vieka, ngue muje Cimbembesi uavalingisile linga vahandekemo.

5 Honi mu Yelusalema muakele Vayunda vaka kuvuila Njambi liova vaje vahumine ku mafuti oshe ahano ha mavu. 6 Omo civunga cakama covuile kaje kalua, kaha vakungulukile hamolika. Voshe valikomokelele muomu muntu na muntu uoshe uovuile vaje vaka kutsiliela vali nakuhandeka mu muyati uendi. 7 Voshe valikomokelele cikuma nakuhandeka nguavo, "Nkuma ava vali nakuhandeka ngeci keti voshe Vangalileya ndi? 8 Nkuma cija vati honi tuva voshe tuvevua umo na umo mu muyati uetu vavenia? 9 Vamo vetu vahuma ku Palitiya, naku Mendiya naku Elame, vakuavo ku Mesopotamia, naku Yundeya naku Kapandosiya, vakuavo ku Pontiyasi naku vinganda vimo via Valoma via mu Asiya, 10 vamo ku Filingiya naku Pamefiliya, vakuavo ku Ingito naku mitambela ya Limbiya kuyehi na Silene, vamo vangenzi vahuma ku nganda ya Loma, 11 (Vayunda navaje keti Vayunda vuno honi vakakava lika futisi ya Vayunda), vamo vetu vahuma ku Kelete naku Alambiya yetu tuva voshe tulinakuvevua vahandeka vikomoueso via Njambi mu miyati yetu." 12 Kaha voshe valikomokelele nakukala na citanga, kaha valihozuele umo na mukuavo nguavo, "Nkuma eci cilumbunuka vika?"

13 Vuno honi vamo vavo vashendumuine vaka kutsiliela nakuhandeka nguavo, "Vantu ava vanapende viniu!"

14 Vuno honi Petulu uemanene na vakuavo tunganda likumi na umo, uahandekele na lizi liakutambeka ku civunga cije nguendi, "Vamala vaku Yundeya neni voshe muakala mu Yelusalema, zivukeni eci cuma, kaha ivuilileni muacili kuli evi njihandeka. 15 Cilivene, vantu ava kuvapendele ngue mumuli nakuyonguelamo, ino inapu ntsimbu ya mutania ua cimene. 16 Vuno honi evi vikevio viahandekele kananguizi Njuele nguendi.

17 Njambi ahandeka nguendi, ‘Eci cikeco njikalinga mu matangua a mamanusuilo

njiketila Cimbembesi uange hali muntu na muntu.

Vana veni va vamala nava va vampuevo vakambulula vunanguizi,

na vakuenje veni vakamona vimona,

na vakulukazi veni vakalota vinjozi.

18 Mu matangua aje njiketila Cimbembesi uange,

cipue hali vangamba vange, va vamala nava va vampuevo

kaha vakambulula vunanguizi.

19 Njikalinga vikomoueso muilu

na vimueso hano ha mavu,

kukakala maninga, na tuhia, na vuisi vuakama.

20 Litangua likazivala vuii,

na ngonde ikavenga ngengu ngue maninga,

ntsimbu kanda litangua liakama lia vumpau vua Muene lihete.

21 Kaha uoshe akasana lizina lia Muene akovoka.’

22 Yeni vamala vaku Isaleli! "Ivuilileni ku mezi aua, Yesu uaku Nazaleta uapuile yala uje nzili yendi yakama yavu Njambi yasholuele muacili kuli yeni vikomoueso na vimueso vije vialingile Njambi kuhitila muli ikeye hakati keni, ngue muje yeni vavenia mualizivukila. 23 Njambi mu kuzivuka cendi na mu viyongola viendi via laja ngeci Yesu vaka muhana ku mavoko eni, kaha yeni muamutsihile hakutava vaka vupi linga vamushukike ha cilindakano. 24 Vuno honi Njambi uamusanguile ku vatsi, uamupatuile ku nzili ya kutsa, muomu kucatavele linga kutsa cimupuise cinzinda. 25 Muomu Ndaviti uahandekele hali ikeye nguendi,

‘Njamuene Muene kulutue luange ntsimbu yoshe,

muomu ali ku livoko liange lia cilio kaha kunjikajaja.

26 Nankuma mutima uange uvuahelela,

na mezi ange anashulu na nzolela.

Kaha muvila uange ukahuima mu lutsilielo.

27 Muomu ku ukanjiseze mu vukalo vua vatsi,

cipue kutava muka kulela uove linga apolele mu cihilo.

28 Unanjizivukisa vingila vituala ku muono,

ukanjishulisa na nzolela mukukala muyehi nove.’

29 "Vamuanetu, njihandeka kuli yeni nakusimpa hali kukuluila yetu Ndaviti uje uatsile na kumutsinda, na cihilo cendi hanga tucili naco na lelo lino. 30 Ndaviti uapuile kananguizi, kaha uazivukile nguendi Njambi uamukulahesele na kulisinga nguendi akapuisa umo ua vatekuluila vendi kukala ha litanda lia vumuene. 31 Ndaviti ha kumona vije vikalingiua kulutue, uahandekele ha kusanguka ca Kilistu omo uahandekele nguendi,

‘Ikeye kuvamusezele mu vukalo vua vatsi,

muvila uendi kuuapolelele mu cihilo.’

32 Njambi nasangula ou Yesu ku vatsi, kaha yetu voshe tunapu vakaleho va viuma evi. 33 Ikeye hakumujundula kuya ku livoko lia cilio lia Njambi, nakutambula Cimbembesi Uakulela kuli Ishe uje yamu kulahesele, kaha netilahoni vije vimuli nakumona na kuivua hali yetu. 34 Muomu keti Ndaviti uje ualondele muilu, vuno honi ikeye uahandekele nguendi,

‘Muene uahandekele kuli Muene uange nguendi,

Tumama ku livoko liange lia cilio

35 noho njikapuisa vitozi vove vuliatelo vuove.’

36 "Nankuma vantu voshe Vaisaleli vanapande kuzivuka muacili ngeci ou ikeye Yesu, uje imuashukikile ha cilindakano ikeye Njambi yanapuisa Muene na Kilistu."

37 Omo vantu vovuile evi, cavakuatele ku mitima yavo kaha vahandekele kuli Petulu na kuli tunganda vakuavo nguavo, "Eni vamuanetu, nkuma tuapande kulinga vati?"

38 Petulu uahandekele kuli vakevo nguendi, "Muntu na muntu napande kutenguluka ku vipi viendi nakumumbuitika mu lizina lia Yesu Kilistu linga vamukonekele ku vipi viendi, kaha mukatambula vuana vua Cimbembesi Uakulela. 39 Muomu cikulaheso ca Njambi cinapu ceni na vana veni, na kuli voshe vaje vali kulahako, vaje voshe vakasana Muene Njambi yetu veje kuli ikeye."

40 Petulu uahandekele kuli vakevo na mezi eka akuvanangula nakuvalambelela nguendi, "Liovoleni yeni vavenia ku miyati eyi ya vilinga via vipi." 41 Vaje voshe vatambuile muzimbu ua Petulu vavambuitikile, kaha ha litangua lije kualivuezelele vantu vakupua makulukazi atatu (3, 0 0 0) 42 Vakakateyele ku vilongesa via tunganda na mukukunguluka hamo, na mukupazula mbolo na mukulombela.

43 Vikomoueso na vimueso viavingi vivalingile tunganda viovuisile vantu voshe liova. 44 Vaka kutsiliela voshe vakele hamo mukulitombola, kaha valipangelele vufuko vuavo voshe. 45 Valandesele viuma viavo na vufuko vuavo, kaha valipangezelele vimbongo hakati kavo, kuya muje muanajenekela muntu. 46 Ha litangua na litangua valikunguluile mu Njivo ya Njambi, vakele nakupazula mbolo mu vinjivo viavo na kulia viakulia viavo mukuvuahelela na mitima ya kulikehesa, 47 nakushangazala Njambi, nakuvazanga ku vantu voshe. Ha litangua na litangua Muene uavuezeleleko vaje vantu vakele nakuovoka ku civunga cavo.