1 Vuno honi vamala vamo vahumine ku Yundeya vayile ku Antioke vaputukile kulongesa vaka kutsiliela nguavo, "Kumuasa kuovoka kuvanga mulovoke ngue kuya ku Lishiko lia Mosesa." 2 Kaha Paulu na Mbanambase vakele na vimpata cikuma na vakevo ha cuma eci, vasinganiekele ngeci Paulu na Mbanambase na vamo veka vantu va mu Antioke vaye ku Yelusalema nakuliuana na tunganda na vakuluntu vamu nganda ije ha cuma eci.

3 Nankuma, cikungulukilo ca vatumine, kaha omo vahitile mu Fonisiya na mu Samaliya, kaha valumbunuine muje vati vaje keti Vayunda vatengulukilile kuli Njambi, ou muzimbu uanehele kuvuahelela cikuma kuli vaka kutsiliela voshe. 4 Kaha omu vahetele mu Yelusalema, vavatambuile ku cikungulukilo, naku tunganda, naku vakuluntu, kaha valumbunuine vioshe vije vialingile Njambi kuhitila muli vakevo. 5 Vuno honi vaka kutsiliela vamo vaje kuvakundamene ku civunga ca Vafaliseho vakatukile nakuhandeka nguavo, "Vaje keti Vayunda vanapande kulovoka nakuvaleka ngeci vononoke Lishiko lia Mosesa."

6 Tunganda hamo na vakuluntu vakungulukile na nakusinganieka ha cuma eci. 7 Kaha omo vahandekele ntsimbu yalaha, Petulu uakatukile nakuhandeka kuli vakevo nguendi, "Vamuanetu muazivuka hume laja Njambi uahanguile yange hakati keni na kuambulula Muzimbu Uacili kuli vaje keti Vayunda ngeci vovue na kutsiliela. 8 Njambi uje azivuka visinganieka via muntu uoshe, uamuesele vukaleho vuendi kuli vaje keti Vayunda hakuvahana Cimbembesi Uakulela, ngue muje muatuhanene yetu naua. 9 Kaha kamuesele kahangu hakati kavo netu, vuno honi uavasambesele ku vipi viavo muomu vatsilielele. 10 Nkuma vika muesekela Njambi nakutuika citeli ha miongo ya vandongisi cije cipue vakukuluila vetu cipue yetu kutuasa kucambata. 11 Tutsiliela na kuovoka ha kavumbi ka Muene Yesu, ngue vakevo naua."

12 Kaha civunga coshe ca vantu vaholokele kuluu muomu vovuile Mbanambase na Paulu valumbununa vimueso na vikomoueso vije vialingile Njambi kuhitila muli vakevo kuli vaje keti Vayunda. 13 Omo vamanusuile kuhandeka vioshe, kaha Yakomba uahandekele nguendi, "Vamuanetu njivuilileni! 14 Simoni ahavene natulumbunuina muje vati Njambi ha kulivanga uahakelele mana kuli vaje keti Vayunda mukuhangulaho vamo hakati kavo ngeci vapue vantu vendi. 15 Mezi a tunanguizi a litombola muacili na viuma evi. Ngue muje muvihandeka visoneka nguavio,

16 ‘Kaha Muene Njambi alinakuhandeka nguendi,

Hanima ya

viuma evi njikahiluka nakuhiluisa naua vumuene vua Ndaviti

njikavutungulula

nakuvukolesa naua.

17 Kaha vantu voshe vakeja kuli yange,

voshe vaje keti Vayunda vaje njasana kupua vange.

18 Kaha omu mukemuo mualinakuhandeka Muene, uje uasholuele viuma vioshe kuntsenkulu.’

19 Yakomba uahandekele nguendi "Mu visinganieka viange," nguange, "Kutuapandele kupakesa vaje keti Vayunda vaje vali nakutengulukila kuli Njambi. 20 Vuno honi tunapande kuvasonekela mukanda uakuvaleka nguetu keti valie viakulia via kujeneka kulela muomu vanavikombelela ku tumponia nakulitenga kuvupangala, kaha naua keti valie tusitu va kutikinia cipue kulia maninga. 21 Kuhuma ku ntsimbu ya laja Lishiko lia Mosesa valitanda mu vinjivo via malombelo ha litangua lia Sapalalo, kaha naua mezi endi va ambulula mu vinganda vioshe."

22 Ambahoni tunganda na vakuluntu hamo na cikungulukilo coshe vasinganiekele kuhangula vamala ha civunga cavo ngeci vavatume ku Antioke hamo lika na Paulu na Mbanambase. Vahanguile naua vamala vavali vaje vavasingimikile cikuma vaka kutsiliela, vakevo vaje vapuile Yundasa uje ivasanene Mbalasambase na Silasi. 23 Kaha vavatumine hamo na mukanda uje uayile kuli vakevo uje uahandekele nguauo,

"Vamuanetu yetu tunganda na vakuluntu, tunatumu vihindu vietu kuli yeni voshe vamuanetu vaje keti Vayunda ku cisemua yeni vaje muakala mu Antioke, namu Siliya, namu Silisha. 24 Tunevu nguavo vamo vamala vamu civunga cetu vaneja na kumipakesa na nakuminienguesa na vije vivanahandeka vakevo cakuhona kutambula vilongesa viakuhuma kuli yetu. 25 Kaha tualikunguluile na kulitavasana tuva voshe kuhangula vamo vamala nakuvatuma kuli yeni, hamo na vavusamba vetu vatuazangele cikuma Mbanambase na Paulu, 26 vaje vahanene muono uavo mukupangela Muene uetu Yesu Kilistu. 27 Kaha tunatumu Yundasa na Silasi vaje vakamileka viuma vimo vije vituli na kusoneka. 28 Omo Cimbembesi Uakulela hamolika netu tualitavasana ngeci kutuapandele kumituika citeli ceka naua kuvanga lika mashiko aua nguetu, 29 Keti mulie viakulia vije via kukombelela ku tumponia, keti munue maninga, keti mulie kasitu uakutikinia, kaha litengeni ku vupangala, mukakala muacili nga muliniunga cakuhona kulinga viuma evi, Njambi amikuisule."

30 Kaha vaje vavatumine vasikumukile ku Antioke kuje vakakunguluile civunga coshe ca vaka kutsiliela nakuvahana uje mukanda. 31 Kaha omo vantu muvatandele uje mukanda vavuahelele cikuma ha muzimbu uakuvakolesa. 32 Kaha Yundasa na Silasi vaje vapuile tunanguizi, va vasimpisile na kuvakolesa cikuma. 33 Omo vakele navo kuje mu ka ntsimbu lika, kaha vaka kutsiliela vavahiluisile mu ciyulo kuli vaje vavatumine. 34 [Kaha Silasi uasinganiekele kukala kuje.]

35 Vuno honi Paulu na Mbanambase vasalele mu Antioke, hamolika na vakuavo veka vavengi valongesele nakuambulula Muzimbu Uacili ua Muene.

36 Ha ntsimbu imo Paulu uahandekele kuli Mbanambase nguendi, "Tuye tuhiluke linga tukameneke vaka kutsiliela mu vinganda vioshe muje tuambuluile lizi lia Muene, linga tukamone vati muje vali nakuyoya." 37 Kaha Mbanambase uatondele linga vaye hamo na Yiuano uje ivatumbuile Mako. 38 Vuno honi Paulu uasinganiekele nguendi keti cacili kuya nendi, muomu kakele hamo navo naku mamanusuilo a vipangi viavo, vuno honi uahilukile nakuvaseza mu Pamefiliya. 39 Hakele vimpata, kaha valitepele Mbanambase uambatele Mako nakuya ku Sepulasi mu vuato. 40 Vuno honi Paulu uahanguile Silasi nakuya nendi, vamutavesele kuli vaka kutsiliela kuhitila mu kavumbi ka Muene. 41 Omo vayile vahitile mu siliya namu Silisha mukukolesa vikungulukilo.