1 Saulu uatavele kutsa ca Setefano.

Ha litangua lije vene cikungulukilo ca mu Yelusalema caputukile kuyanda na mapakeso. Vaka kukutsiliela voshe valishandokelele mu mafuti a Yundeya na mu Samaliya kaha kuvanga lika tunganda vakevo vasalelemo. 2 Vamo vamala vaka kulemesa Njambi vatsindile Setefano, kaha vamulilile cikuma.

3 Vuno honi Saulu uesekele kunongesa cikungulukilo, uayile ku njivo na njivo nakukokangeya vamala na vampuevo nakuvahaka mu kamenga.

4 Vaka kukutsiliela vaje vashandokele vayile ku mutambela na mutambela nakuambulula lizi. 5 Filipu uasikumukile ku nganda ya Samaliya nakuambulula muzimbu ua Kilistu ku vantu vaje vakele kuje. 6 Omo civunga ca vantu vovuile Filipu nakumona vimueso vije vialingile, kaha voshe vovuililile kuli vije viakele nakuhandeka. 7 Muomu vimbembesi via vipi viahumine mu vantu vavengi oku vitambakana na lizi liakama, vaka tulepa vavengi na vilema vakangukile. 8 Nankuma, mu nganda ya Samaliya muakele kujolela cakama.

9 Mu nganda ije muakele yala umo ua lizina lia Simoni, uje ha ntsimbu yahanima uakomokesele vaka Samaliya na mantseno endi. Ualimuesele ikeye vavenia kupua umo uakama, 10 kaha vantu voshe muje mu nganda, vantu va vulemu na vaje keti va vulemu vovuililile kuli ikeye, kaha vahandekele nguavo, "Ou ikeye vene nzili ya Njambi uje ivatumbula nguavo Nzili Yakama." 11 Vakele nakumuvuilila muomu ha ntsimbu yalaha uavakomokesele na mantseno endi. 12 Vuno honi omo vatsilielelele uje muzimbu uahandekele Filipu kuli vakevo ua Muzimbu Uacili ua Vumuene vua Njambi na via Yesu Kilistu, kaha voshe vamala na vampuevo vavambuitikile. 13 Cipue Simoni nendi vene naua uatsilieliele, kaha omo vamumbuitikile uakele hamo na Filipu, ualikomokelele cikuma omo uamuene vikomoueso na vimueso viakama vije viakele nakulinga.

14 Omo tunganda vaje vakele mu Yelusalema vovuile nguavo vantu va mu Samaliya vanatambula lizi lia Njambi, nankuma, vavatuminine Petulu na Yiuano ku Samaliya. 15 Omo vahete kuje, vakalombelelele vaje vaka kutsiliela linga vatambule Cimbembesi Uakulela, 16 muomu Cimbembesi Uakulela tele kanda eje muli vakevo, vuno honi vavambuitikile lika mu lizina lia Muene Yesu. 17 Ambahoni Petulu na Yiuano vasalekele mavoko avo hali vakevo, kaha vatambuile Cimbembesi Uakulela.

18 Omo Simoni uamuene nguendi tunganda vanahana Cimbembesi kuli vaka kutsiliela mukusaleka mavoko avo hali vakevo, nankuma uahanene vimbongo kuli Petulu na Yiuano 19 nakuhandeka nguendi, "Nange naua njihaneniko eyi nzili yakama linga uoshe injikasaleka mavoko ange akatambule Cimbembesi Uakulela."

20 Vuno honi Petulu uamukumbuluile nguendi, "Yove na vimbongo viove munonge hamo, muomu yove uayongola nguove hamo uasa kulanda vuana vua Njambi na vimbongo! 21 Yove kuuesi na mutambela cipue cihela mu vipangi vietu, muomu mutima uove kuuesi muacili ku mesho a Njambi. 22 Nankuma, tenguluka linga uhume ku viyongola viove via vipi, kaha lomba kuli Muene linga akusambese ku viyongola viove evi. 23 Muomu njinamono nguange yove unashulu na cipululu cacipi naua unapu u cinzinda ca vupi."

24 Kaha Simoni uahandekele kuli Petulu na Yiuano nguendi, "Njilombeleleniko kuli Muene linga viuma evi vimunahandeka keti vikanjilingiuile."

25 Omo vamanusuile kuhana vukaleho vuavo nakuambulula muzimbu ua Muene, Petulu na Yiuano vahilukile ku Yelusalema. Mu ngila yavo vakele nakuambulula Muzimbu Uacili mu membo amengi a mu Samaliya.

26 Kaha kangelo ua Muene uahandekele kuli Filipu nguendi, "Katuka uye ku mbuela ngila ije ihuma ku Yelusalema iya ku Ngaza." (Ngila eyi yapua ya mu mpambo) 27 Nankuma, Filipu uakatukile nakuya kaha ualiuanene na kayunuke uje uapuile Kaisopiya, ikeye uapuile mukuluntu ua vulemu muka kuniunga vufuko vuoshe vua Kandeke lisano ua ku Isopiya. Ou yala uayile laja ku Yelusalema nakulemesa Njambi. 28 Omo uahilukile kuimbo uatumamene mu litemba liendi nakutanda livulu lia kananguizi Isaya. 29 Kaha Cimbembesi Uakulela uahandekele kuli Filipu nguendi, "Shuena kuyehi na litemba lije." 30 Nankuma, Filipu uashatukilileko kaha uamuvuile ali nakutanda mu livulu lia kananguizi Isaya. Kaha uamuhuile nguendi, "Nkuma ulinakuvuisisa evi ulinakutanda ndi?"

31 Uje mukuluntu uamukumbuluile nguendi, "Nkuma vatihoni njasa kuvivuisisa kuvanga umo anjilumbuininevio?" Kaha ualombele Filipu linga alonde nakutumama hamo nendi mu litemba. 32 Kaha mezi amu visoneka atandele uje yala akeuo aua:

"Uapuile ngue mpanga uje vatuala nakumutsiha.

Ngue muna mpanga uje aholoka kuluu kuli vaka kumutehula.

Mukemo vene muaholokelele na ikeye.

33 Vamukehesele, kaha kuva musompelele vusunga.

Nkuma iya asa kuambulula ntanga yendi?

Muomu muono uendi vauhumisile hano ha mavu."

34 Kaha uje Kayunuke uehuile Filipu nguendi, "Njileke, nkuma iya yanatumbula kananguizi, ikeye vavenia indi mukuavo ueka?" 35 Ambahoni Filipu uaputukile kuhandeka na visoneka evi, uamulekele Muzimbu Uacili ua Yesu. 36 Kaha omo vakele nakuenda mu ngila, vahetele ku mutambela umo kuje kuakele mema, kaha uje Kayunuke uahandekele nguendi, "Tala mema aua! Nkuma vika naua vihonouesa kunjimbuitika?" 37 Filipu uamukumbuluile nguendi, "Citava kukumbuitika nga unatsiliela na mutima uove uoshe." Ikeye uamukumbuluile nguendi, "Muavusunga vene njitsiliela nguange Yesu Kilistu ikeye Muna Njambi."

38 Kaha uje Kayunuke uashikile linga vemike litemba, kaha voshe vavali, Filipu na uje Kayunuke vakovelele mu mema, kaha Filipu uamumbuitikile. 39 Omo vahumine mu mema, Cimbembesi ua Muene uatualele Filipu kueka. Kaha uje Kayunuke kamumuene naua, vuno honi uayile vungezi vuendi nakuvuahelela cikuma. 40 Vuno honi Filipu ualiuanene ikeye vavenia ali ku Azotase, kaha uayile ku Sesaliya, mu ngila muoshe uayile nakuambulula Muzimbu Uacili mu vinganda vioshe.