1 Angilipa uahandekele kuli Paulu nguendi, "Uli na ntsimbu yakuliohiela yove vavenia." Ambahoni Paulu uoluele livoko liendi kaha uaputukile kuliohiela ikeye vavenia nguendi,

2 "Muene Angilipa! Njamono nguange njavezika hakuliohiela yange vavenia kulitangua lia lelo ku mesho ove ha viuma vioshe vali nakunjivangeya Vayunda, 3 Muomu unazivuka muacili futisi na vihula via Vayunda. Nankuma njikulomba unjivuilile mukusimpa.

4 "Vayunda voshe vazivuka vati njinayoyo hume kuvukuenje vuange. Vazivuka kuyoya kuange kuoshe, ha vantu vange na mu Yelusalema. 5 Ntsimbu yoshe vanazivuka, nga vatonda kuhana vukaleho ovu, njapuile umo ua civunga ca Vafaliseho vaje vaka kavangeya cikuma ngila ya muje tukalemeselamo Njambi yetu. 6 Kaha honi hano njinemana linga vanjisompe muomu njahaka lutsilielo mu cikulaheso ca Njambi cije calingile kuli vakukuluila vetu, 7 Eci cikeco cikulaheso cije miyati yetu likumi na ivali cije civatonda kumona cilishulisise muomu yakulemesa Njambi vutsiki na mutania. Muene Angilipa, muomu ya kutsiliela eci mukemo Vayunda vali nakunjivangeya evi! 8 Nkuma vika muhandekela ngueni cacikalu kuli yeni kutsiliela ngueni Njambi akasangula vatsi?

9 "Nange vene njasinganiekele kulinga viuma viavingi viakuluisa lizina lia Yesu uaku Nazaleta. 10 Evi vikevio njalingile mu Yelusalema. Ha kutambulako nzili ku vakuluntu va vasasendote, na kuhaka vantu vavengi va Muene mu kamenga, omo vavatsihile nange naua njatavele." 11 Njavazangamesele ha vintsimbu viavingi mu vinjivo via malombelo njesekele linga vaviane kutsiliela cavo. Kaha njanienguele cikuma navo ngeci njaile ku vinganda via vungezi na kuvayandeselako.

12 "Ha mulonga ou vene njaile ku Ndamasika na nzili yakama cikuma na Lishiko lia kuhuma ku vakuluntu va vasasendote. 13 Capuile mu ngila omo tele litangua lili hakati ka mutue, yove Muene, njamuene ceke ca kuviakuma cikuma kupulakana litangua cahumine muilu canjizengelekele na vantu vaje njendele navo. 14 Kaha tuva voshe tuauililile ha mavu, kaha njevuile lizi mu Cihevelu lihandeka kuli yange ngualio, ‘Saulu, Saulu! Nkuma vika ulinakunjipakesela? Ulina kulivulumuna yove vavenia omo ulinakuliohiela, ngue ngombe ua kulimisa aliatangela ku citi ca muene uendi.’ 15 Kaha njehuile nguange, ‘Nkuma yove iya Muene?’ Muene uanjikumbuilile nguendi, ‘Yange Yesu uje ulinakupakesa. 16 Vuno honi katuka njalisholola kuli yove linga njikuhangule kupua ngamba na mukaleho uange ha viuma evi unamono navije ukamona kulutue. 17 Njikakuamena ku vantu Vaisaleli navaje keti Vayunda kuje kunjikakutuma. 18 Ukatonesa mesho avo na kuvahumisa kumilima na kuvatuala ku ceke nakuvahumisa ku nzili ya satana nakuvatuala kuli Njambi, linga ha kutsiliela cavo kuli yange vaka vasambese ku vupi vuavo nakutambula muhela uavo hakati ka vantu vaje vanahangula Njambi.’"

19 "Nankuma Muene Angilipa, njononokele cimona cije njamuene cahumine muilu. 20 Vuno honi ha kulivanga njambuluile mu Ndamasika, namu Yelusalema ambahoni mu cifuti ca Yundeya, na hakati kavaje keti va Vayunda, njambuluile linga vatenguluke ku vupi vuavo nakuhiluka kuli Njambi nakulinga viuma vije vimuesa ngeci vanatenguluka. 21 Muomu ya cuma eci mukemuo vanjikuatele Vayunda mu Njivo ya Njambi kaha vatondele kunjitsiha. 22 Vuno honi na kulitangua lia lelo Njambi nanjikuasa, nankuma njihana vukaleho vuange kuli yeni voshe, vakuluntu na vanike. Vije vinjihandeka vinapu vimo vije vivahandekele laja tunanguizi va Njambi na Mosesa ngeci vikalingiua, 23 nguavo Kilistu napande kuyanda nakupua ikeye uakulivanga kusanguka kuvatsi na kuambulula ceke ca kuovoka kuli Vayunda na kuli vaje keti Vayunda."

24 Kaha omo Paulu uakele nakuliohiela mu ngila eyi, Fesitase uatambekele kuli ikeye nguendi, "Ove Paulu unazaluka! Kulilongesa cove cikuma cili nakukuzaluisa!"

25 Vuno honi Paulu uakumbuluile nguendi, "Yove muene Fesitase, kunjazalukile! Vuno honi njili nakuhandeka mezi a cili a vusunga. 26 Kunjasa kuteua kuhandeka cuma eci kuli Muene Angilipa! Muomu njazivuka nguange azivuka cuma eci. Kaha unamonoho cimo hali umo na umo uavo voshe, muomu cuma eci kucalingiuilile mu vushueke. 27 Muene Angilipa, nkuma uatsiliela muli tunanguizi ndi? Njazivuka nguange utsiliela!"

28 Ambahoni Angilipa uahandekele kuli Paulu nguendi, "Nkuma muka ntsimbu kakandende lika uasinganieka nguove uasa kunjipuisa mukayesu ndi?"

29 Kaha Paulu uamukumbuluile nguendi, "Cipue njilinge vuasi cipue mu ntsimbu yalaha, lilombelo liange kuli Njambi nguange yove na vaje voshe vali nakunjivuilila lelo vapue ngue munjinapu yange kuhumisako lika aua malienge!"

30 Ambahoni Muene uemanene, hamo na nguvulu na Mbenisi na voshe vaje vatumamene navo, 31 kaha omo vakele nakuya, vahandekele kuli umo na mukuavo nguavo, "Ou yala viahi napihisa ngeci atse cipue va muhake mu kamenga." 32 Angilipa uahandekele kuli Fesitase nguendi, "Ou yala napandele kumuecela nga katualele vimpande viendi kuli Sezale."