1 Mu matangua aje, omo vandongisi vakele nakulivuezelela, kuakele Vayunda vaje vakele nakuhandeka ndaka ya Cingelengu valingile vimpata na Vayunda vaje vakele nakuhandeka ndaka ya Cihevelu, muomu vantuluue vavo vakele nakuvayengula hakuhana viakulia via ha litangua na litangua. 2 Nankuma, vaje tunganda likumi na vavali vasanene vandongisi voshe nakuhandeka kuli vakevo nguavo, "Kucitava tuecele kuambulula lizi lia Njambi linga tutale ha cimpande ca kupangezela viakulia. 3 Nankuma, vamuanetu, hanguleni vamala vatanu na vavali hakati keni vaje vamuzivuka ngeci vanashulu na Cimbembesi Uakulela na mana, tuvahake linga vapange cipangi eci. 4 Kaha yetu tukalihane lika ku kulombela nakupanga vipangi viakuambulula."

5 Civunga coshe cavuahalelele cikuma na viyongola via tunganda, nankuma, vahanguile Setefano, yala uakushula na lutsilielo na Cimbembesi Uakulela, hamolika na Filipu, na Polokolase, na Nikanole, na Timoni, na Palamanase, na Nikolau uje keti Kayunda ua ku Antioke uje uakavele futisi ya Vayunda. 6 Civunga cemikile vaje vamala ku mesho a tunganda, vaje vakevo vavalombelelele nakuvasaleka mavoko.

7 Kaha lizi lia Njambi liashandokelele kuoshe. Civunga ca vandongisi mu Yelusalema calivuezelele cikuma, na civunga ca vasasendote vavengi vatsilielele.

8 Kaha honi Setefano, mukushula na kavumbi ka Njambi na nzili, ualingile vimueso na vikomoueso viakama hakati ka vantu. 9 Vamuluisile kuli vamala vamo vaje vapuile vaka njivo ya malombelo ya Vamala Vakupatuka (ngue muje muvaitumbuile), muje muakele Vayunda vakuhuma ku Silene na ku Alekizandiliya. Vakuavo vahumine ku nganda ya Silisiya na ku Asiya valingile vimpata na Setefano. 10 Vuno honi Cimbembesi uahanene Setefano mana linga omo ahandeka, naumo uahi uasele kumuhiana kulinga nendi vimpata. 11 Ambahoni vahanene vamala vamo lizika kanua linga vahandeke nguavo, "Tunamuvu alinakuhandeka mezi akushaula Mosesa na Njambi." 12 Kaha mu ngila eyi vene vashongangeyele vantu na vakuluntu na valongisi va mezi a Lishiko. Vakuatele Setefano nakumutuala ku Mpunga. 13 Ambahoni vanehele vakaleho va makuli vaje vamuvangeyele nguavo, "Ou yala ntsimbu yoshe alinakuluisa Njivo ya Njambi ya kulela na Lishiko lia Mosesa. 14 Muomu tunovu ahandeka nguendi ou Yesu ua ku Nazaleta akasiula Njivo ya Njambi, nakutengulula futisi yatuhanene Mosesa." 15 Voshe vatumamene muje mu Mpunga mesho avo atalele hali Setefano, kaha vamuene cihanga cendi casholokele ngue ca kangelo.