1 Honi mu cikungulukilo ku Antioke kuakele tunanguizi na valongisi, vaje vapuile Mbanambase na Simioni (uje ivatumbuile nguavo uaku Zivala), na Luyasi (uje uahumine ku Silene) na Manane, (Uje ivalelele hamo na Nguvulu Helonde) na Saulu. 2 Omo vakele nakulemesa Muene nakuliumina via kulia, Cimbembesi Uakulela uahandekele kuli vakevo nguendi, "Njitepeseleniko Mbanambase na Saulu linga vapange vipangi vije njavasanena."

3 Hanima yakuliumina via kulia na kulombela, nakuvasaleka mavoko kaha vavatumine.

4 Omo Cimbembesi Uakulela uatumine Mbanambase na Saulu vaye ku Seleusiya, kaha hakuhuma kuje vasikumukile mu vuato ku nkundu ya Sepulasi. 5 Omo vahetele ku Salamisi vaputukile kuambulula lizi lia Njambi mu vinjivo via malombelo. Kaha Yiuano uakele hamo navo mukuvakuasa vipangi.

6 Vendele mu nkundu muoshe nakuheta ku Pafose kuje vakauanene umo muka mantseno lizina liendi Mbala-Yesu, ikeye Kayunda uje ualitumbuile ikeye vavenia kupua kananguizi ua makuli. 7 Uapuile kavusamba kauje mukuluntu uamuje mu nkundu lizina liendi Selengiyase Pauluse, uje uapuile yala uamangana. Nguvulu ua Loma uasanene Mbanambase na Saulu muomu uatondele kuivua lizi lia Njambi. 8 Vuno honi vakele nakuvaluisa kuli muka mantseno Eliamase (eli likelio lizina liendi lia Cingelengu), uje uesekele kuhumisa Nguvulu ku lutsilielo. 9 Vuno honi Saulu uje ivatumbuile nguavo Paulu uashulile na Cimbembesi Uakulela, uatalele uje muka mantseno ntooma, 10 nakuhandeka nguendi, "Yove muna Liyavolo, yove citozi ca vusunga, uakushula na makuli oshe na lizangamena lioshe, kaha yove ntsimbu yoshe uli nakueseka kutengulula vusunga vua Muene kuvupuisa makuli. 11 Muene akakuluisa, kaha ukapua kapuputua muka ntsimbu lika, kukamono kutua ca litangua."

Kaha hajevene mbundu na milima viezile ha mesho endi kaha uahonouele kumona, uaputukile kutonda muntu linga amukuate ku livoko. 12 Kaha omo Nguvulu uavimuene vije via lingiuile uatsilielele, muomu ualikomokelele cikuma ha vilongesa via Muene.

13 Paulu na vakuavo vajavukile mu vuato kuya musinia lia Pafose, kaha vezile ku Pelenga nganda ya mu Pamefiliya, kaha Yiuano uavasezele uahilukile ku Yelusalema. 14 Vahumine ku Pelenga vahetele ku Antioke mu Pisindiya, kaha lia Sapalalo vayile mu njivo ya malombelo naku katumamamo. 15 Hanima yakutanda Lishiko lia Mosesa na visoneka via tunanguizi kaha vantuama va mu njivo ya malombelo vatumine lizi kuli vakevo nguavo, "Vamuanetu tumilomba nguetu muhandeke ku vantu nga muli na mezi akuvakolesa." 16 Nankuma Paulu uemanene na kuolola livoko liendi muilu nakuhandeka nguendi,

"Vamuanetu vaka Isaleli neni keti Vayunda vaka kulemesa Njambi, ivuilileni kuli yange! 17 Njambi ua vantu Vaisaleli uahanguile vakukuluila vetu, nakuvapuisa muyati uakama ha ntsimbu ije vakele vangenzi mu Ingito. Kaha Njambi uavahumisile mu Ingito na nzili yendi yakama, 18 kaha uavaniungile mu mpambo ha miaka yakupua makumi auana. 19 Uanongesele mafuti a miyati itanu na ivali mu cifuti ca Kanana, kaha uapuisile cifuti cije vusuana vua vantu vendi. 20 Kaha evi viuma vioshe via lingiuile ha miaka yakusetekesa vihita viuana na makumi atanu (450)

"Kaha hanima yevi uavahanene mahako noho ha ntsimbu ya kananguizi Samuele. 21 Ambahoni valombele muene, kaha Njambi uavahanene Saulu muna Kishe, uaku muyati ua Mbenjemani, ngeci apue muene uavo ha miaka makumi auana (40) 22 Kaha omo Njambi uahumisile Saulu ha vumuene, uapuisile Ndaviti muene uavo. Eci cikeco cahandekele Njambi hali ikeye nguendi, ‘Njinauana Ndaviti muna Njesi ikeye yala uje injazanga, uje akalinga vioshe vije njitonda ngeci avilinge.’ 23 Ikeye Yesu uaku ntanga ya Ndaviti uje Njambi uamupuisile Muyoyesi ua vantu Vaisaleli ngue muje muakulahesele laja. 24 Ntsimbu kanda Yesu aputuke vipangi viendi, Yiuano uambuluile ku vantu voshe Vaisaleli ngeci vatenguluke ku vupi vuavo nakuvambuitika. 25 Kaha omo Yiuano uahetele muyehi nakumanesa vipangi viendi, uehuile vantu nguendi, ‘Nkuma musinganieka ngueni Yange iya? Keti yange uje muli na kuvandamena. Vuno honi ivuilileni! Alinakuija munima yange, yange kunjasa cipue kuzitula miva ya vinkaku viendi.’

26 "Vamuanetu vaka Isaleli vatekuluila va Avilahama, kaha neni voshe keti Vayunda yeni mulikuno vaka kulemesa Njambi: muzimbu ou uakuovoka vanautumu kuli yetu! 27 Muomu vantu vaje valinakuyoya mu Yelusalema na vantuama vavo kuvazivukile ngeci ikeye napu Muyoyesi, cipue kuvuisisa mezi a tunanguizi aje avakatanda ha litangua na litangua lioshe lia Sapalalo, cipue ngoco valingisile mezi a tunanguizi kupua a vusunga mukuhisa Yesu. 28 Cipue ngocovene kuvauanene vukaleho ngeci vamuhisile kutsa, vuno honi valombele Pilato linga amutsihe. 29 Kaha omo valingile vioshe vije ngue muviahandeka visoneka hali ikeye, vamuhumisile ha cilindakano na kumuhaka mu cihilo. 30 Vuno honi Njambi uamusanguile ku vatsi, 31 kaha ha matangua amengi ualisholuele kuli vaje uendele navo kuhuma ku Ngalileya nakuheta ku Yelusalema. Vakevo honi vanapu vakaleho vendi ku vantu Vaisaleli. 32 Yetu tulikuno naku minehela Muzimbu Uacili, uje Njambi uakulahesele vakukuluila vetu nguendi akaulinga, 33 evi vikevio natulingila yetu vatekuluila vavo mukusangula Yesu ku muono ngue muvanasoneka mu livulu lia mucivali lia Miaso ngualio,

‘Yove unapu u munange,

litangua lia lelo njinapu nji Isho.’

34 Kaha eci cikeco cahandekele Njambi hakumusangula ku vatsi nguendi kakapolela mu cihilo houe,

‘Njikakuhana vikuisulo via kulela via vusunga

vije njakulahesele Ndaviti.’

35 Ngue muanahandeka naua mu mikanda yeka nguendi,

‘Ku ukatava ngamba yove uakulela linga apolele mu cihilo.’

36 Kaha omo Ndaviti uapangele cizango ca Njambi ha ntsimbu yendi vavenia, kaha uatsile, vamutsindile na vakukuluila vendi, kaha muvila uendi uapolele mu cihilo. 37 Vuno honi kuli uje yasanguile Njambi ku vatsi muvila uendi ku uapolele mu cihilo.

38 "Kaha yeni voshe vamuanetu vaka Isaleli munapande kuzivuka ngeci kuhitila muli Yesu mukemuo vali nakuambulula muzimbu uaku konekela ca vipi. 39 Kaha munapande kuzivuka ngeci uoshe uje atsiliela muli Yesu nazituka ku vipi, kaha vanamupuisa kupua ua kupatuka ku viuma vioshe vije lishiko lia Mosesa ku liasele kumupuisa ua kupatuka. 40 Zangameni linga vije vivahandekele tunanguizi keti vilingiue kuli yeni.

41 ‘Taleni yeni vaka sembulule, kaha likomokeleni na kutsa!

Muomu cuma cije njikalinga mu matangua eni cikapua cuma cije kumukatsiliela,

cipue nga kukala umo akamilumbunuinaco!’"

42 Omo Paulu na Mbanambase vahumine mu njivo ya malombelo, vantu vavalaniene naua kuhiluka kuli vakevo ha litangua lia Sapalalo likuavo nakuvaleka viuma evi. 43 Omo vantu vahumine kuje ku njivo ya malombelo, Vayunda vavengi na vaje keti Vayunda vaje vapuile vakulongua ku futisi ya Vayunda vakavele Paulu na Mbanambase. Kaha vahandekele kuli vakevo nakuvakolesa kukakateya ha kuyoya mu kavumbi ka Njambi.

44 Kaha lia Sapalalo ikuavo vantu vavandende lika vasalele mu nganda muomu voshe vezile mukuivua lizi lia Muene. 45 Omo Vayunda vamuene civunga, vakele nacipululu, valuisile vije viakele nakuhandeka Paulu kaha vamutukile. 46 Vuno honi Paulu na Mbanambase vahandekele nakusimpa nguavo, "Capandele ngue lizi lia Njambi valihandeke kuli yeni ha kulivanga. Vuno honi mualivianene, kaha munalisinganieka yeni vavenia ngueni kumuafuililile kutambula muono uayaye, kaha tumiseza nakuya kuli vaje keti Vayunda. 47 Muomu eli likelio Lishiko lianatushiki Muene nguendi,

"‘Njinamipuisa ceke kuli ava keti Vayunda,

ngeci vaka mafuti voshe vakovoke.’"

48 Omo vaje keti Vayunda vuovuile evi, vavuahelele nakulemesa lizi lia Muene, kaha vaje vavahanguile kupua na muono uayaye vatsilielele.

49 Kaha lizi lia Muene liashandokelele kuoshe mu cihela cije. 50 Vuno honi Vayunda vashongangeyele vantuama va mu nganda, nava vampuevo vakutsimana vaje keti Vayunda vaje vakulongua vaka kulemesa Njambi. Kaha vaputukile kupakesa Paulu na Mbanambase nakuvasheka ku cihela cavo. 51 Vuno honi tunganda vatotomuene likungu ku viliato viavo kupua cihiso ca vantu va kuje, kaha vayile ku Ikoniyame. 52 Kaha vandongisi vamu Antioke vashulile nakuvuahelela na Cimbembesi Uakulela.