1 Kaha ha ntsimbu ije vene muene Helonde uaputukile kupakesa vaka cikungulukilo. 2 Uatsihile Yakomba munaina ya Yiuano, namukuale. 3 Kaha omo uamuene ngeci navuahelesa Vayunda, kaha uatualeleho lutue kukuta Petulu. (Eci calingiuile ha ntsimbu ya ciuano ca Mbolo yakuhona cimbaluila) 4 Kaha omo uamukutile uamuhakele mu kamenga, kaha vamuhanene ku vivunga via masualale viuana muje muakele vauana mu civunga cimo na cimo linga vamuniunge. Helonde uatondele kumusompesela ha civunga ca vantu omo ciuano ca Paseka nga cinahu. 5 Tele Petulu acili mu kamenga, cikungulukilo cakele nakumulombelela kuli Njambi.

6 Vutsiki vujevene ntsimbu Helonde kanda a mutuale muku musompa, Petulu uakosele mukati kavaje vakele nakumuniunga vavali. Vamukutile na malienge avali, kaha kuakele masualale ku cikolo vaje vakele nakuniunga. 7 Hajevene kangelo ua Muene uasholokele kaha na ceke catuila mu kamenga, ambahoni uje kangelo uaningangele Petulu nakuhandeka kuli ikeye nguendi, "Katuka vuasi." Kaha hajevene malienge aje akele ku mavoko endi azitukile. 8 Kaha kangelo uahandekele naua kuli ikeye nguendi, "Kuta muiva uove kaha zala na vinkaku viove." Petulu ualingile muje mua mulekelelemo, kaha kangelo uahandekele naua nguendi, "Zala cikovelo cove kaha njikave." 9 Kaha Petulu uamukavangeyele hambanza lia kamenga, vuno honi kazivukile nguendi vije viakele nakulinga kangelo viapuile via vusunga, uasinganiekele nguendi hamo ali nakumona lika cimona. 10 Omo vapulakanene civunga ca masualale ca kulivanga na cije ca mucivali, kaha vahetele ku cikolo ca cikuvo cije cakuya mu nganda. Kaha cikolo calishokolokelele cikeco vavenia, kaha vatuhukile hambanza. Vendele hamo mu tapalo kaha hajevene kangelo uamusezele Petulu.

11 Petulu uasinganiekele hali vije vialingiuile kuli ikeye kaha uahandekele nguendi, "Hano honi njazivuka muavusunga ngeci Muene natumu kangelo uendi linga anjovole ku nzili ya Helonde naku vioshe vije Vayunda vasinganiekele nguavo vikalingiua."

12 Omo uazivukile vioshe vije via lingiuile, uayile ku njivo ya Maliya vaina ya Yiuano uje ivatumbuile Mako, kuje ku vakungulukilile vantu vavengi nakulombela. 13 Kaha Petulu uatotele ha cikolo ca hambanza, kaha ngamba umo ua mpuevo ua lizina lia Londa uezile nakumutava. 14 Uazivukile lizi lia Petulu kaha uavuahelele cikuma, uahilukile kuli vakevo cakuhona kushokolola cikolo nakuhandeka nguendi, "Petulu nemana ku cikolo hambaza." 15 Kaha voshe vahandekele kuli ikeye nguavo, "Uzaluka!" Kaha uavasindiyile nguendi njimileka vusunga. Kaha vamukumbuluile nguavo, "Mpamo napu kangelo uendi."

16 Vuno honi Petulu uatualeleho kutota ha cikolo, kaha omo vashokoluele ku cikolo vamumuene kaha valikomokelele cikuma. 17 Vuno honi uavaniatelele na livoko liendi linga vaholoke kuluu, kaha uavalekele muje vati Muene na muhumisilamo mu kamenga nguendi, "Lekeni evi kuli Yakomba na vaka kutsiliela." Ambahoni uavasezele nakuya ku mutambela ueka.

18 Kaha omo kuacele cimene kuakele citanga cikuma hakati ka masualale vaje vaka kuniunga kamenga, hali vije vialingiuile kuli Petulu. 19 Helonde uavashikile linga vamutonde vuno honi kuvamuuanene, uehozuele vaje vaka kuniunga kaha uashikile linga vavatsihe.

Hanima yevi Helonde uahumine mu Yundeya na kuya ku Sesaliya, nakukalako.

20 Honi Helonde uanienguelele cikuma vantu vaku Tile na Kusindone. Kaha civunga cakama caile nakumumona. Ha kulivanga valambelele Mbalasitase muka kuniunga lipela ngeci avakuase. Ambahoni vayile kuli Helonde nakumulomba ngeci kukale ciyulo, muomu cifuti cavo cakele nakutambula via kulia via kuhuma ku cifuti ca muene.

21 Ha litangua lia kuhangula, Helonde uazalele tuzaku tuendi tua vumuene nakutumama ha litanda liendi nakuhandeka ku vantu. 22 Vatambakanene cikuma nguavo, "Keti lizi lia muntu lihandeka vuno honi lizi lia njambi!" 23 Hajevene kangelo ua Muene uapupile Helonde, muomu kahanene kasingimiko kuli Njambi. Kaha mavuno amulile, kaha uatsile.

24 Vuno honi lizi lia Njambi liatualeleho kuya lutue.

25 Omo Mbanambase na Saulu vamanusuile vipangi viavo vahilukile ku Yelusalema hamo na Yiuano, uje ivatumbuile naua nguavo Mako.