1 Kaha Kasasendote uakama uehuile Setefano nguendi, "Nkuma viuma evi vinapu via vusunga ndi?"

2 Kaha Setefano uavakumbuluile nguendi, Vamuanetu na vatate njivuilileni! Njambi ua vumpau ualisholuele kuli kukuluila uetu Avilahama tele acili mu Mesopotamia, ntsimbu kanda acikale mu Halane, 3 kaha uahandekele kuli ikeye nguendi, ‘Seza cifuti cove na ntanga yove kaha ya ku cifuti cije cinjikakumuesa.’ 4 Ambahoni uasezele cifuti cendi ca Kalundiya uayile nakukala mu cifuti ca Halane. Hanima ya kutsa ca ishe ya Avilahama, kaha Njambi uamuhumisile mu cifuti cije nakumuneha mu cifuti cino cimuli nakukala hano. 5 Njambi kahanene Avilahama mutambela umo ua cifuti linga upue uendi, cipue kamutambela kakandende ka kuliata ka livu, vuno honi Njambi uamukulahesele kumuhanaco linga cipue cendi na vatekuluila vendi cipue vene tele Avilahama kanda akale na muana. 6 Kaha evi vikevio viahandekele Njambi nguendi, ‘Vatekuluila vove vakakala mu cifuti ca vungezi, kaha vakapua vandungo nakuvayandesa cikuma ha miaka yakupua vihita viuana (400) 7 Njikasompa vantu vaje va vakapangela, kaha hanima ya viuma evi vatekuluila vove vakahuma mu cifuti cije, kaha vakanjilemesa mu cihela cino vene.’ 8 Ambahoni Njambi uahanene Avilahama cilika cakulovoka kupua cimueso ca litavasano. Nankuma, Avilahama uapuile ishe ya Isake kaha uamulovuele omo kuahitile matangua atanu na atatu kuhuma ha kusemuka cendi, kaha Isake ualovuele munendi Yakomba, na Yakomba ualovuele vana vendi likumi na vavali, vaje vakevo vakukuluila vakutsimana va muyati uetu.

9 "Kaha vakuavo vana va Yakomba vovuilile cipululu shongo yavo Yosefa, vamulandesele ku vundungo mu Ingito. Vuno honi Njambi uakele hamo nendi, 10 nakumuniunga muacili mu tuyando tuendi tuoshe. Omo Yosefa uasholokele ku mesho a Falao muene ua Ingito, Njambi uamuhanene mana na kavumbi, kaha muene ua Ingito uapuisile Yosefa nguvulu uakuyula Ingito yoshe ya njivo ya muene. 11 Ambahoni kuakele njala yakama mu cifuti coshe ca Ingito na mu Kanana, kaha njala yakama ije yanehele tuyando tuakama. Kaha vakukuluila vetu kuvasele kuuana viakulia, 12 vuno honi omo Yakomba uovuile nguavo ku Ingito kuli viakulia, uatumineko vana vendi, vakukuluila vetu, ha vungezi vuavo vua kulivanga. 13 Kaha ha vungenzi vuavo vua mucivali Yosefa ualisholuele kuli vamunaina, kaha Falao muene ua Ingito uazivukile ntanga ya Yosefa. 14 Nankuma, Yosefa uatumine lizi kuli ishe Yakomba linga vakamuleke hamo na ntanga yendi ngeci veje ku Ingito, vapuile makumi atanu na avali na vantu vatanu (75) 15 Ambahoni Yakomba uasikumukile uayile ku Ingito, ikeye na vakukuluila vetu vakatsililileko. 16 Mivila yavo vaitualele ku Shekeme kuje vakavatsindile mu cihilo cije calandele Avilahama na vimbongo kuli vana va Hamole.

17 "Vuno honi omo ntsimbu yahetele muyehi linga Njambi ashulisise cikulaheso cendi kuli Avilahama, vantu vetu valanene cikuma mu Ingito. 18 Kaha kuasuanene muene ueka mu Ingito uje kazivukile Yosefa. 19 Ikeye uazangamesele vakukuluila vetu nakuvapangesa mua mupi, nakuvasindiya linga vombile kuti tukeke vavo linga vatse. 20 Ha ntsimbu ije vene Mosesa uasemukile, uapuile muanike uacili cikuma ku mesho a Njambi. Vamulelele mu njivo ya ishe ha vingonde vitatu, 21 kaha omo vamuhumisile mu njivo yavo, muna muene Falao uampuevo uamuambatele nakumulela muacili ngue munendi. 22 Mosesa vamulongesele mana oshe a vaka Ingito, kaha uapuile yala uakama mukuhandeka cendi na mu vilinga.

23 "Omo Mosesa uakele na miaka makumi auana (40), cahuminine kuintsi lia mutima uendi kuya nakumenekela vavushoko vendi vaka Isaleli. 24 Kaha omo uamuene Kaingito ali nakuyandesa umo ua kuli vavushoko vendi, nankuma, uashueneneko nakuohiela uje Kaisaleli kaha uatsihile uje Kaingito. 25 Uayonguele nguendi hamo vantu vendi vovuisisa ngeci Njambi alinakumupangesa linga akavohiele, vuno honi kuvazivukile. 26 Ha litangua liamukuavo Mosesa uamuene Vaisaleli vavali valinakulua, kaha uezile mukati kavo nakuhandeka kuli vakevo na mezi a ciyulo nguendi, ‘Eni vamala ivuilileni, yeni muvushoko vueni, nkuma vika mulina kuliluisa umo na mukuavo?’ 27 Vuno honi uje yala uakele nakuluisa mukuavo uanakuile Mosesa nakuhandeka kuli ikeye nguendi, ‘Nkuma iya nakupuisa muka kusuana cipue lihako hakati ketu? 28 Nkuma utonda linga unjitsihe naua ngue munatsihile uje Kaingito izau ndi?’ 29 Omo Mosesa uovuile mezi aua, uateuele mu Ingito nakuya nakukala mu cifuti ca Mindiyani. Kaha kuje uakakele na vana vavali va vamala.

30 "Omo kuahitile miaka makumi auana (40), kangelo uasholokele kuli Mosesa mu mulengi ua tuhia tuje tuakele nakushukuma mu liputa mu mpambo kuyehi na Munkinda ua Sinai. 31 Omo Mosesa uamuene evi ualikomokelele ha cuma cije camuene, kaha uashuenene kuyehi na liputa mukumonesesa muacili. Vuno honi uovuile lizi lia Muene ngualio, 32 ‘Yange Njambi ya vakukuluila vove, Njambi ya Avilahama, na Isake na Yakomba.’ Kaha Mosesa uajajele nakuvua liova, kaha kataleleko naua. 33 Ambahoni Muene uahandekele kuli ikeye nguendi, ‘Shulula vinkaku viove, muomu ha mutambela ha unemana hanapu ha kulela. 34 Njinamono omo muvali na kuyandeselamo vantu vange vaje vali mu Ingito. Kaha njinevu kulinienieta cavo, njineja ha mavu nakuvamena. Kaha ija, ngeci njikakutume ku Ingito.’

35 "Ou ikeye Mosesa uje ivavianene omo vahandekele nguavo, ‘Nkuma iya nakupuisa muka kusuana cipue lihako hakati ketu?’ Ikeye vene uje yatumine Njambi kupua muka kusuana na muka kupatula kuhitila muli kangelo uje uasholokele kuli ikeye mu liputa lije liakele nakuuema. 36 Ikeye uahumisile vantu mu Ingito, ualingile vimueso na vikomoueso mu Ingito, na ku Cisali ca Kuvenga naua na mu mpambo ha miaka makumi auana (40) 37 "Ou ikeye Mosesa uje ualekele vantu Vaisaleli nguendi, ‘Njambi akahumisa kananguizi ngue yange uje akahuma hakati ka vantu veni vavenia.’ 38 Ikeye uakele hamo na vantu Vaisaleli omo vakungulukilile mu mpambo, naua hamo na vakukuluila vetu na kangelo uje uahandekele kuli ikeye ha Munkinda ua Sinai, kaha uatambuile muzimbu ua kuyoya ua Njambi nakutuhanauo.

39 "Vakukuluila vetu vavianene kumuononoka, kaha vamunakuililile kumukulo nakutonda linga vahilukile naua ku Ingito. 40 Nankuma, vahandekele kuli Alone nguavo, ‘Tupangele vanjambi linga vatutuamenene. Kutuzivuka cuma muka cinalingiua kuli Mosesa uje uatuhumisile ku Ingito.’ 41 Yapuile ntsimbu ije ivamungile kamponia mu cifua ca muna ngombe ua nkomba nakukombelelako nkombelo nakulinga ciuano cakusingimika cipangi ca mavoko avo. 42 Vuno honi Njambi uavatalesele nima, kaha uavecelele linga valemese viuma via muilu, ngue muvanasoneka mu livulu lia tunanguizi nguavo,

"‘Vantu Vaisaleli! Keti yange uje

muatsihilile nakukombelela tusitu

ha miaka makumi auana mu mpambo.

43 Yapuile mbalaka ya njambi Moleki ikeyo ije imuambatele,

na cifua ca Lefane, njambi yeni ua ntanga ntanga,

ava vakevo tumponia tueni tuje tumuapangele linga mutulemese.

Nankuma, njikamituma ku vunzinda musinia lia Mbambilone.’"

44 "Vakukuluila vetu vakele na mbalaka yakulihanena vukaleho mu mpambo. Vaipangele ngue Njambi muashikile Mosesa linga vaipangemo, kuya mu cifua cije vene civamuesele Mosesa. 45 Vakukuluila vetu vaje vatambuile mbalaka kuli vaishavo vayambatele omo vayile na Yoshua nakutambula cifuti ku miyati ije yashekelemo Njambi omo vakele nakuya kulutue. Nankuma, yakele kuje noho ha ntsimbu ya Ndaviti. 46 Ikeye vene Ndaviti uje uauanene kavumbi ku mesho a Njambi, kaha ualombele Njambi amutavese linga atungile Njambi ya Yakomba Muakukala. 47 Vuno honi uapuile Solomoni uje uamutungilile njivo.

48 "Vuno honi Njambi ua Helu Liavioshe kekukala mu vinjivo viakutunga na mavoko a vuntu, ngue muje alinakuhandeka kananguizi nguendi,

49 ‘Muene ahandeka nguendi, lilu liapua litanda liange,

na mavu apua vuliatelo vuange.

Nkuma njivo ya muyati muka muasa kunjitungila?

Nkuma mutambela ua muyati muka munjasa kukala?

50 Nkuma keti livoko liange vene vavenia liapangele evi viuma vioshe ndi?’

51 "Yeni vantu vakukaluua," Kaha Setefano uatualeleho kuhandeka nguendi, "Yeni vantu va mitima yakuhona kutsiliela, na matuitui eni anashoko ku lizi lia Njambi! Yeni naua muli nakuviana Cimbembesi Uakulela ngue muvalingile vakukuluila veni. 52 Nkuma iya kananguizi ivahonouele kuyandesa vakukuluila veni? Vatsihile tunganda va Njambi vaje kuntsenkulu vambuluile kuija ca Ngamba yendi ua Vusunga. Kaha honi yeni muamuendele vungungu nakumutsiha. 53 Yeni muatambuile Lishiko lia Njambi lije livamihanene tungelo, vuno honi kumua liononokele."

54 Omo vaje vaka mpunga vovuile evi viuma kuli Setefano, vanienguele cikuma nakulishumanga ku mazo mukupihilila. 55 Vuno honi Setefano mukushula na Cimbembesi Uakulela uatalele muilu, kaha uamuene vumpau vua Njambi na Yesu nemana ku livoko lia cilio lia Njambi. 56 Uahandekele nguendi, "Taleni! Njinamono lilu linashokoloka na Muna Muntu nemana ku livoko lia cilio lia Njambi!"

57 Vuno honi vaje vaka mpunga vatambekele na lizi liakama cikuma na kuzika matuitui avo. Kaha voshe vayile hamo vuasi kuli ikeye, 58 ambahoni vamukokelele hambanza lia nganda, kaha vamuashele mavue. Vakaleho vasezele vikovelo viavo mukuviniunga kuli mukuenje umo lizina liendi Saulu. 59 Tele vali nakumuasha mavue, Setefano ualombelele nguendi, "Muene Yesu tambula Cimbembesi cange!" 60 Kaha uatsikamene ha mavuli endi nakutambakana na lizi liakama nguendi, "Muene, keti uanuke vupi vuavo ovu vuvanalingi!" Omo uahandekele mezi aua kaha uatsile.