1 Hanima ya matangua atanu Kasasendote Uakama Ananiyasi uayile ku Sesaliya na vamo vakuluntu na lihako umo ua lizina lia Tetulase. Vezile ku mesho a Nguvulu Felekisi na kumulekesa mulonga ua Paulu. 2 Kaha uasanene Paulu linga akovele mukati, kaha Tetulase uaputukile kuvangeya Paulu nguendi,

"Uakalemesa Felekisi, kutuamenena cove ca mana cinatunehela ciyulo ntsimbu yakama, kaha viuma viavingi vinatenguluka linga vantu vetu vakale muacili. 3 Tunacitambula eci kuoshe na ku ntsimbu yoshe, kaha naua tuavuahelela cikuma kuli yove. 4 Kunjatondele kumipihisila cikuma ntsimbu yeni, cipue ngoco, njikulomba ukakeleko na ngozi nakuvuilila ku mezi etu amandende. 5 Tuauana ou yala kupua muntu ua kalua, uaputukile kulinga mpindangano hakati ka Vayunda mu cifuti coshe, kaha naua ikeye ntuama ya mpunga ya vaka Nazalite. 6 Ikeye naua uatondele kujualesa Njivo ya Njambi, kaha tuamukutile. 7 Vuno honi Lisiyase ntuama uje muka kushika masualale va Loma uezile, kaha na nzili yakama uatutambuileye. 8 Nga umuihula yove vavenia ou yala uasa kuuana kuli ikeye vioshe vije vitunamuvangeya." 9 Vayunda navo naua vamuvangeyele nguavo vioshe evi vinapu via vusunga.

10 Kaha Nguvulu uashovueyele Paulu linga ahandeke, kaha Paulu uahandekele nguendi,

"Njazivuka nguange yove unapu ulihako ua cifuti eci ha miaka yaingi, kaha njavuahelela cikuma kuliohiela yange vavenia ku mesho ove." 11 Nga utondesesa muacili, keti matangua a kupulakana matangua likumi na avali anahitimo ha njaililile nakulemesa ku Yelusalema. 12 Vayunda kuvanjiuanene njili nakulinga vimpata naumo mu Njivo ya Njambi cipue kuneha mpindangano mu civunga cipue mu njivo ya malombelo cipue mu nganda yoshe. 13 Kaha naua kuvasa kukuhana vukaleho vuacili ha viuma evi vali nakunjivangeya hano. 14 Vuno honi njitava cuma eci kuli yove nguange njikalemesa Njambi ua vakukuluila vetu mukukavangeya Ngila ije ivatumbula vakevo nguavo ya makuli. Kaha naua njikatsiliela mu vioshe vije vivanasoneka mu lishiko lia Mosesa na mu mavulu a tunanguizi. 15 Nange vene njikatsiliela kuli Njambi ngue muje mu vakatsilielamo vakevo, kutsiliela cije vatumbula nguavo kukakala kusanguka ca vaka vupi na vaka vusunga. 16 Nankuma njili nakulinga na nzili yange yoshe linga njikale na lishungu ku mesho a Njambi na ku mesho a vantu.

17 Hakuhona kukala mu Yelusalema ha miaka yaingi, kaha njahilukileko mu kutuala vukuasi ku vantu vange naku kakombelela vinkombelo. 18 Omo yapuile ntsimbu ije njakele nakulinga eci vanjiuanene mu Njivo ya Njambi tele njinamanesa cilika ca kulilelesa. Kunjakele na civunga ca vantu cahi, cipue kuvatanganesa. 19 Vuno honi vamo va Vayunda vaje vahumine ku mbonge ya Asiya vakele kuje, vakevo vapandele kuija ku mesho ove nakunjivangeya nga vakele navimo viakunjiluisa. 20 Cipue tava ava vamala valikuno linga vahandeke mulonga uvanjiuanene nauo omo njemanene ku mesho a mpunga. 21 Kuvanga lika mpamo ha cuma cimo cije njatambekele omo njemanene ku mesho avo nguange, "Mulina kunjisompa ku litangua lia lelo muomu njatsiliela nguange vatsi vaka sanguka."

22 Ambahoni Felekisi, uje ualilongesele cikuma ha vimpande via Ngila ya Muene uemikile cije kusompa, "Omo Lisiyase uje ntuama muka kushika masualale akeja ambahoni njikasinganieka ha mulonga uove." 23 Kaha uashikile uje muka kuniunga linga aniunge muacili Paulu, vuno honi napande kumuhanako kupatuka cimo nakutava vavusamba vendi linga vamukuase.

24 Hanima ya matangua amo, Felekisi uezile na mpueyendi Ndulusila, uje uapuile Kayunda, uatumine vantu linga vakambate Paulu ngeci eje kaha akumuvuilile muje muahandeka via lutsilielo muli Kilistu Yesu. 25 Vuno honi Paulu uakele nakuhandeka ha vusunga, na kuliniunga, kaha na ha kuija ca Litangua lia kusompa, Felekisi uevuile liova kaha uahandekele nguendi, "Yahoni ha ntsimbu ino, omo njikauana ntsimbu kaha njikakusana naua." 26 Ha ntsimbu ijevene uasinganiekele nguendi hamo Paulu amuhanako vimbongo vimo, nankuma ha cuma eci Felekisi uakele nakusana Paulu ha vintsimbu viavingi ngeci ahandeke nendi.

27 Hanima yakuhita miaka ivali, Posiyase Fesitase uasuanene mucihela ca Felekisi kupua Nguvulu. Felekisi uatondele kuvuahelesa Vayunda, kaha uasezele Paulu mu kamenga.