1 Ha ntsimbu ijevene Saulu uakele navutenu vuakutonda kutsiha vandongisi va Muene, uayile kuli kasasendote uakama, 2 nakumulomba mikanda ya ku vinjivo via malombelo vije viakele ku Ndamasika, linga nga akauanako vamo vakundama ku Ngila ya Yesu, vampuevo cipue vamala, akavakuate nakuvatuala ku Yelusalema.

3 Omo Saulu uahetele kuyehi na nganda ya Ndamasika, vuasi vuasi ceke cahumine muilu nakutuila hali ikeye nakumuzengeleka. 4 Uauililile ha mavu kaha uovuile lizi lihandeka kuli ikeye ngualio, "Saulu, Saulu, nkuma vika ulinakunjiyandesela?"

5 Kaha Saulu uehuile nguendi, "Nkuma yove iya, Muene?"

Kaha lizi liakumbuluile ngualio, "Yange Yesu, uje ulinakuyandesa. 6 Vuno honi katuka uye mu nganda, kaha vakakuleka viunapande kulinga."

7 Vamala vaje vendele hamo na Saulu vemanene kuakuhona kuhandeka muomu vovuile lika lizi vuno honi kuvamuene muntu cipue umo uje ahandeka. 8 Saulu uakatukile ha mavu kaha uemukile mesho endi vuno honi kamuene cuma cimo. Nankuma, vamukuatele ku livoko nakumutuala ku Ndamasika. 9 Kasele kumona ha matangua atatu, kaha kalile cipue kunua cuma cimo.

10 Mu Ndamasika muakele ndongisi ua Njambi lizina liendi Ananiyasi. Uamuene cimona cije Muene uahandekele kuli ikeye nguendi, "Ananiyasi!"

Kaha ikeye uakumbuluile nguendi, "Yange uno Muene."

11 Kaha Muene uamulekele nguendi, "Katuka uye ku ngila ije ivatumbula Kusungama ku njivo ya Yundasa ukehuleko yala nahumu ku Tasisi lizina liendi Saulu. Muomu ha ntsimbu inovene alinakulombela, 12 kaha mu cimona cendi namono yala umo lizina liendi Ananiyasi neja nakumusaleka mavoko endi linga ase kumona naua."

13 Vuno honi Ananiyasi uakumbuluile nguendi, "Muene, njinevu viou yala ku vantu vavengi, na viuma viavingi via vipi vianalingi ku vantu vove vakulela mu Yelusalema. 14 Kaha neja kuno na nzili yakama yakuhuma ku vakuluntu va vasasendote mukukuata voshe vaje valemesa lizina liove."

15 Vuno honi Muene uahandekele kuli ikeye nguendi, "Ya, muomu njinamuhangula linga anjipangele mukusholola lizina liange kuli vaje keti Vayunda na kuli vimiene na ku vantu Vaisaleli. 16 Yange vavenia njikamuleka muje muanapande kuyanda muomu ya lizina liange."

17 Nankuma, Ananiyasi uayile nakukovela mu njivo kaha uasalekele mavoko endi hali Saulu nakuhandeka nguendi, "Muanetu Saulu, Muene Yesu uje uasholokele kuli yove mu ngila omo uakele nakuija kuno, nanjitumu linga uase kumona naua kaha ushule na Cimbembesi Uakulela." 18 Hajevene viuma viakufua ngue mavanda viahumine ha mesho endi, kaha uasele kumona naua. Ambahoni uakatukile kaha vamumbuitikile, 19 kaha munima yakulia viakulia, uakele na nzili naua.

Saulu uakele matangua amandende lika na vandongisi mu Ndamasika. 20 Hajevene uayile ku vinjivo via malombelo via Vayunda nakukaputuka kuambulula nguendi Yesu ikeye Muna Njambi.

21 Voshe vaje vamuvuile valikomokelele nakuihula nguavo, "Nkuma ou keti ikeye uje yala uakele mu Yelusalema uje uakele nakutsiha voshe vaje valemesele lizina eli ndi? Kaha nkuma kezile kuno mukukuata vaje vantu linga avatuale ku vakuluntu va vasasendote ndi?"

22 Saulu uakele na nzili cikuma, uapayesele Vayunda vaje vakele mu Ndamasika mukuvaleka vusunga nguendi Yesu ikeye Kilistu.

23 Omo kuahitile matangua amengi, Vayunda valikunguluile hamo nakutumba vutumbe vuakutsiha Saulu, 24 vuno honi Saulu uazivukile via vutumbe vuavo. Mutania na vutsiki vakele nakuniunga ku vikolo via ku nganda linga vamutsihe. 25 Vuno honi vutsiki vumo vandongisi vendi vamuhakele mu mutonga nakumusosela hambanza lia civumbe mu njanena.

26 Omo Saulu uayile ku Yelusalema uesekele kulipandakana hamo na vandongisi, vuno honi voshe vamuteuele muomu kuvatsilielele nguavo ikeye napu ndongisi. 27 Vuno honi Mbanambase uamuambatele nakumutuala kuli tunganda. Uavalumbunuinine muje Saulu uamuene Muene ha ngila na muje Muene uahandekele kuli ikeye. Kaha naua uavalekele kusimpa ca Saulu omo uambuluile mu lizina lia Yesu mu Ndamasika. 28 Nankuma, Saulu uatumamene hamo navo kaha uahitanganene mu Yelusalema muoshe nakuambulula mu lizina lia Muene nakusimpa. 29 Uahandekele nakuliluisa na Vayunda vaje vakele nakuhandeka Cingelengu, vuno honi vatondele kumutsiha. 30 Omo vaka kutsiliela vovuile evi, vatualele Saulu ku Sesaliya nakumutuma ku Tasisi.

31 Nankuma, vaka kutsiliela voshe mu Yundeya na mu Ngalileya na mu Samaliya vakele na ntsimbu ya ciyulo. Hakukuasa ca Cimbembesi Uakulela vikungulukilo viakolele nakulivuezelela, ngue hakuyoya cavo kuakuvuila Muene liova.

32 Petulu uendanganene noku noku, kaha ha ntsimbu imo uayile nakumona vaka kutsiliela vaje vakele mu Linda. 33 Kuje uakauanene yala umo lizina liendi Eneyase uje uapuile muka kalepa kasele kuhuma ha citala tala ha miaka itanu na itatu. 34 Petulu uahandekele kuli ikeye nguendi, "Eneyase, Yesu Kilistu akukanguise. Katuka jandula citala tala cove." Hajevene Eneyase uakatukile. 35 Vantu voshe vamu Linda na mu Shalone vaje vamumuene vatengulukilile kuli Muene.

36 Mu Yopa muakele ndongisi uampuevo lizina liendi Tambita, (mu Cingelengu ikeye Ndokasi, kulumbununa "Ntsonge") ntsimbu yoshe uakele nakulinga viacili nakukuasa vihutu. 37 Ha ntsimbu ijevene uavavalele, kaha uatsile. Vatanesele muvila uendi nakuulangeka ku mulili ua helu lia njivo. 38 Linda yakele kuyehi na Yopa, kaha omo vandongisi vaje vakele mu Yopa vovuile nguavo Petulu ali mu Linda vatumine vamala vavali kuli ikeye nguavo, "Muene, unapande kuija vuasi kuno kuli yetu." 39 Nankuma, Petulu uakatukile nakuya navo. Omo uahetele kuje vamutualele ku mulili uahelu kuje vantuluue voshe vamuzengelekele nakulila nakumumuesa tuzaku na vikovelo vije vialingile Ndokasi ha ntsimbu ije yakele navo. 40 Petulu uavahumisilemo voshe muje mu mulili, kaha uatsikamene ha mavu nakulombela, ambahoni uatengulukilile ku civimbi ca Ndokasi nakuhandeka nguendi, "Tambita, hinduka!" Kaha uemukile, omo uamuene Petulu, uahindukile na kutumama. 41 Petulu uamukuatele ku livoko nakumuimika. Ambahoni uasanene vaka kutsiliela voshe na vaje vantuluue, kaha uavahaneneye oku alinakuyoya. 42 Muzimbu ou uashandokelele mu Yopa muoshe, kaha vantu vavengi vatsilielelele kuli Muene. 43 Kaha Petulu uakele mu Yopa ntsimbu yalaha hamo na Simoni muka kufutungula vilambu.