1 Paulu uatalele ntooma hali ije mpunga, kaha uahandekele nguendi, "Vamuanetu, visinganieka viange vinapu via vusunga ha ngila ije injinayoyo nayo ku mesho a Njambi nakuheta ku litangua lia lelo." 2 Kaha kasasendote uakama ua lizina lia Ananiyasi uashikile vaje vemanene kuyehi nendi linga vapupe Paulu kukanua. 3 Ambahoni Paulu uahandekele kuli ikeye nguendi, "Muavusunga vene Njambi akakupupa, yove civumbe cakukuita mufuitilo yakutoka (yove muka civembulu!) Uatumama aha linga unjisompe kuya na lishiko, vuno honi yove unapokola lishiko lia Mosesa mukuvashika linga vanjipupe!"

4 Vamala vaje vemanene kuyehi na Paulu vahandekele nguavo, "Ulinakutuka kasasendote uakama ua Njambi!"

5 Kaha Paulu uavakumbuluile nguendi, "Vamuanetu kunjazivukile nguange uapuile kasasendote uakama, muomu vacisoneka nguavo, ‘Keti uhandeke vupi hali ntuama ua vantu vove.’"

6 Vuno honi omo Paulu uamuene nguendi vamo va muje mu civunga vapuile Vasanduki kaha naua vakuavo vapuile Vafaliseho, uatambakanene ku mpunga nguendi, "Vamuanetu, yange nji Kafaliseho, mutekuluila ua Vafaliseho. Valina kunjisompa kuno muomu ya hakutsiliela cije cinjilinaco ca ha kusanguka ku vatsi."

7 Kaha omo uahandekele evi, hajevene Vafaliseho na Vasanduki vaputukile vimpata, kaha vaka mpunga valipangele. 8 (Muomu Vasanduki vahandeka nguavo vantu kuvakasanguka ku vatsi, kaha naua kukuesi tungelo cipue vimbembesi, vuno honi Vafaliseho vatsiliela muviuma vioshe evi vitatu) 9 Ambahoni vantu vaputukile kutambakana cikuma mukuhandeka, kaha vamo valongisi va mashiko a Mosesa vaje vakele ku mpunga ya Vafaliseho vemanene nakuhandeka na nzili nguavo, "Kutuauanene cuma cimo cacipi canalingi ou yala! Hamo cilivene muavusunga Cimbembesi cipue kangelo nahandeka kuli ikeye!"

10 Kaha omo vimpata viatualeleleho cikuma, uje ntuama muka kushika masualale uevuile liova nguendi hamo Paulu vamutavozola vimpindi vimpindi. Nankuma uashikile masualale kukovela hakati ka mpunga ije linga vakatundiseho Paulu nakumutuala ku vinjivo vivakatumama masualale.

11 Kuvutsiki vujevene Muene uemanene kuyehi na Paulu nakuhandeka nguendi, "Keti uivue liova! Unahana vukaleho vuange muno mu Yelusalema, kaha uanapande kulinga cifua cimo naua na mu Loma."

12 Kaha liamukuavo cimene vamo Vayunda valiuanene nakutumba vutumbe vuavushueke. Valisingile nguavo naumo uahi alia cipue kunua kuvanga noho vanatsihi Paulu. 13 Kuakele vantu vakupulakana makumi auana vaje vatumbile vutumbe vuje hamo. 14 Ava vantu vayile ku vakuluntu va vasasendote na ku vakuluntu kaha vahandekele nguavo, "Tunalikutu tuva voshe nakulisinga nguetu naumo uahi amakela viakulia vioshe kuvanga noho tuatsihi Paulu. 15 Ambahoni yeni na vaka mpunga munapande kutuma lizi kuli ntuama uje muka kushika masualale va Loma ngeci anehe Paulu kuli yeni, mulikuise ngue mutonda kuuana vukaleho vuacili hali ikeye. Vuno honi yetu tulivuahesela kumutsiha ntsimbu kanda ahete kuno."

16 Vuno honi muehua ua Paulu ua yala uje uevuile ovu vutumbe, uayile ku vinjivo vivakakala masualale, nakukaleka Paulu viuma evi. 17 Ambahoni Paulu uasanene umo ua vaje vantuama va masualale nakuhandeka kuli ikeye nguendi, "Tualeni ou mukuenje kuli uje ntuama muka kushika masualale ali navimo vije atonda kumuleka." 18 Ambahoni uje ntuama uamutualele kuli uje ntuama muka kushika masualale nakuhandeka nguendi, "Ou cinzinda Paulu nanjisana na kunjilomba nguendi njinehe ou mukuenje kuli yove, kuli vimo atonda kukuleka."

19 Kaha uje ntuama uakuatele ku livoko lia uje mukueje, nakuya nendi kumukulo, nakumuihula nguendi, "Nkuma vikahoni utonda kunjileka?"

20 Kaha uje mukuenje uahandekele nguendi, "Vayunda vaje vaka nzili yakama vanalitavasana kukulomba linga vatuale Paulu kuli vaka mpunga imene, mukulikuisa ngue vakatondesesa muacili ha vukaleho vuendi. 21 Vuno honi keti uvevuilile, muomu kuvali vamala vakupulakana makumi auana vaje vaka vakalishueka nakuvandamena Paulu. Vanalisingi linga keti valie viakulia cipue kunua mema kuvanga noho vanamutsihi. Vanalivuahesela laja kulinga eci, kaha vanavandamena lika yove ngeci uvatavese."

22 Kaha uje ntuama muka kushika masualale uahandekele nguendi, "Keti ulekeko muntu cipue umo nguove unahandeka evi kuli yange." Kaha uashikile uje mukuenje linga aye.

23 Ambahoni uje ntuama muka kushika masualale uasanene vantuama va masualale vavali kaha uahandekele kuli vakevo nguendi, "Ambateni masualale vakupua vihita vivali (200) valivuahesele kuya ku Sesaliya, hamolika na makumi atanu na avali avaje vakakuendela ha tuvalu na masualale vakupua vihita vivali (200) vaje vakakulua na makunga, livuaheseleni kukatuka ha ntsimbu ya mucitanu na viuana ya vutsiki vuno vene. 24 Vuaheseniko vamo tuvalu linga Paulu alondeho, kaha muheteseni muacili kuli nguvulu Felekisi." 25 Ambahoni uje ntuama muka kushika masualale uasonekele mukanda muje muakele mezi aua, 26 "Kalaundiase Lisiyase kalemesa, kuli Nguvulu Felekisi, vihindu. 27 Vayunda vakuatele ou yala kaha vatondele kumutsiha. Kaha omo njevuile nguavo mundambo ua mu cifuti ca Loma, njaile na masualale vange na kumuyoyesa. 28 Kaha njatondele kuzivuka vika vakele nakumuvangeya, nankuma, njamutualele kuli vaka mpunga yavo. 29 Njauanene ngue nacimo cahi cacipi calingile cije vatondele kumutsihila cipue kumuhaka mu kamenga. Vakele nakumuvangeya viuma vije viakundama kuvihula via mashiko avo vavenia. 30 Kaha omo vanjilekesele nguavo vali na vutumbe vua kumuluisa, hajevene njasinganiekele kumutuma kuli yove. Njalekesa vaje vamuvangeyeye linga vamuhane mulonga ku mesho ove."

31 Masualale valingile muva vashikililemo. Vambatele Paulu nakumutuala vutsiki vuje vene ku cihela ca Antipatilisise. 32 Liamukuavo vaje masualale vahilukile kuvihela viavo nakuseza vaje vaka kuendela ha tuvalu linga vaye nendi. 33 Vamutualele ku Saseliya, kaha vahanene uje mukanda kuli Nguvulu, nakuhetesa Paulu kuli ikeye. 34 Nguvulu uatandele uje mukanda kaha uehuile Paulu nguendi uhuma ku mbonge muka. Omo uauanene ngue Paulu uatundile ku Silisha, 35 kaha Nguvulu uahandekele nguendi, "Njikakuivuilila nga vaje vanakuvangeya vanahete kuno." Ambahoni uashikile linga vaniunge Paulu mu mapela a Nguvulu.