1 "Vamuanetu na vatatetu Vayunda, njivuilileni omo njili nakuliohiela hakati keni." 2 Omo vamuvuile ali nakuhandeka kuli vakevo mu Cihevelu, kaha vaholokele kuluu. Kaha uahandekele nguendi,

3 "Yange Kayunda, njasemukilile ku Tasisi mu Silisha, vuno honi njakolela mu nganda ino vene ya Yelusalema, kaha Ngamaliele ikeye uapuile mulongisi uange, nakulilongesa muacili via Lishiko lia vakukuluila vetu, na kulikolesa cikuma kuli Njambi, ngue omo mumunapu muva voshe vaje valikuno lelo. 4 Njapakesele noho nja tsihile vantu vaje vakavele Ngila ya Muene eyi. Njakutile vamala na vampuevo nakuvatuala mu kamenga. 5 Kasesondote uakama na mpunga yoshe vasa kuhana vukaleho hali yange. Kulivakevo njatambuile mikanda ya kuhuminina kuli vakuetu Vayunda va ku Ndamasika, kaha njaileko linga njikakuate vaje vakele kuje nakuvahiluisa mu Yelusalema linga vavazangamese."

6 "Hakati ka mutania omo njatondele kuheta muyehi na Ndamasika, kaha vuasi vuasi ceke ca humine muilu ca kuviazima catuile na kunjizengeleka. 7 Njauililile ha mavu kaha njevuile lizi lihandeka kuli yange ngualio, ‘Saulu, Saulu, nkuma vika uli na kunjipakesela?’ 8 Kaha njehuile nguange, ‘Nkuma yove iya Muene?’ Kaha lizi liakumbuluile ngualio, ‘Yange Yesu ua ku Nazaleta uje ulinakupakesa.’ 9 Vuno honi vaje vamala vakele hamo nange vamuene lika ceke vuno kuvovuile lizi lia uje uakele nakuhandeka kuli yange. 10 Kaha njehuile nguange, ‘Nkuma njilinge vati honi, Muene?’ Kaha Muene uahandekele kuli yange nguendi, ‘Katuka linga uye ku Ndamasika, kuje vakakuleka viuma vioshe vije viatonda Njambi ngeci uvilinge.’ 11 Kaha njapuile njikapuputua muomu ya kuviakuma ca ceke, kaha vaje njendele navo vanjikuatele ku livoko nakunjituala ku Ndamasika."

12 Mu nganda muje muakele yala umo lizina liendi ikeye Ananiyasi, uakulongua nakuononoka Lishiko lietu kaha vamusingimikile cikuma kuli voshe Vayunda vakele mu Ndamasika. 13 Uezile kuli yange, kaha uemanene kuyehi nange nakuhandeka nguendi, ‘Muanetu Saulu mona naua!’ Kaha ha ntsimbu ijevene njamuene naua nakutala kuli ikeye. 14 "Ambahoni uahandekele nguendi, ‘Njambi ua vakukuluila vetu nakuhangula linga uzivuke cizango cendi, nakumona ngamba yendi uavusunga nakumuvua omo ahandeka na lizi liendi. 15 Muomu ukapua mukaleho uendi ku vantu voshe ku vije viunamono na ku vije viunovu. 16 Nkuma vikahoni ucili nakuvandamena? Katuka linga vakumbuitike, vaka konekela vupi vuove, hakusana lizina liendi.’

17 "Hanima ya kuhilukila ku Yelusalema, kaha ha ntsimbu ije njakele nakulombela mu Njivo ya Njambi, njamuene cimona, 18 mu cimona cije njamuene Muene ahandeka kuli yange nguendi, ‘Zambulako huma mu Yelusalema vuasi, muomu vantu valimuno kuvasa kutambula vukaleho vuove vua hali yange.’" 19 "Kaha njamukumbuluile nguange, ‘Muene, vakevo vavenia vazivuka nguavo njakele nakuya mu vinjivo vioshe via malombelo via Vayunda kaha njakele nakuvakuta nakuvapupa vaje vatsilielele muli yove. 20 Kaha omo mukaleho uove Setefano muva mutsihile, kunjakele nange vene hakulitavasana navo ha kutsa cendi, kaha njaniungile tuzaku tua vaje vamutsihile.’" 21 "Ambahoni Muene uahandekele kuli yange nguendi, ‘Ya, muomu njikakutuma kulahako kuli vaje keti Vayunda.’"

22 Vantu vovuile vije viahandekele Paulu, kaha vaputukile kutambakana cikuma nguavo, "Kutuamutondele ou yala! Mutsiheni! Kapandele kuyoya!" 23 Vakele nakutambakana cikuma na kuashanga vuzalo viavo, nakushauila livu muilu. 24 Kaha uje ntuama ua masualale va Loma uashikile vantu vendi linga vatuale Paulu mu vinjivo muvakakala masualale kaha uavalekele nguendi vamupupe ngeci vauane muomu vika Vayunda vakele nakutambekela nakumuluisa. 25 Vuno honi omo vamukutile ngeci vamupupe, Paulu uahandekele kuli ntuama uje uemanene kuje nguendi, "Nkuma linapu Lishiko kuli yove kupupa mundambo ua mu cifuti ca Loma uje kuvasompelele linga vauane mulonga uanalingi ndi?"

26 Omo uje ntuama ua masualale uevuile evi, uayile kuli uje ntuama muka kushika nakuhandeka kuli ikeye nguendi, "Nkuma vika utonda kulinga? Ou yala ikeye napu mundambo uamu Loma."

27 Kaha uje muka kushika ua masualale uayile nakuihula Paulu nguendi, "Njileke, nkuma unapu u mundambo uamu Loma ndi?"

Kaha Paulu uamukumbuluile nguendi, "Eyo."

28 Ambahoni uje ntuama muka kushika masualale uahandekele nguendi, "Yange ovu vundambo vua mu cifuti ca Loma njavulandele na vimbongo viavingi cikuma."

Vuno honi Paulu uamukumbuluile nguendi, "Yange njasemukila muno vene."

29 Hajevene vaje vamala vatondele kuihula Paulu vamushondolekele nakuya kaha na uje ntuama muka kushika masualale naua uevuile liova, omo uakuzivukile nguendi nkuma Paulu uapuile mundambo ua mu cifuti ca Loma, vuno honi uamuhakele mu malienge.

30 Vuno honi uje ntuama muka kushika masualale uatondele muacili cuma cika Vayunda vakele nakuvangeya Paulu, kaha liamukuavo uashikile linga vazitule Paulu, kaha uashikile vakuluntu va vasasendote na vaka mpunga voshe ngeci vakunguluke. Ambahoni uatualele Paulu nakumuimika ku mesho avo.