1 Munima yevi, Yesu uendanganene mu Ngalileya. Katondele kuendangana mu Yundeya muomu vantuama va Vayunda vakele nakutonda ngila ya kumutsihilamo. 2 Ntsimbu ya ciuano ca Vintsingi ca Vayunda cakele mu yehi. 3 Nankuma, vamunaina vahandekele kuli ikeye nguavo, "Huma kuno uye ku nganda ya Yundeya linga vandongisi vove navakevo naua vakamone vipangi viulinakulinga, 4 muomu naumo uahi ashueka vije vialinga nga atonda kutsimana. Nga ulinakulinga viuma evi, lisholole yove vavenia ku vaka mavu." 5 (Muomu cipue vene vamunaina kuvamutsilielele)

6 Yesu uahandekele kuli vakevo nguendi, "Ntsimbu yange kanda ihete, vuno honi yeni ntsimbu yoshe yacili. 7 Vaka mavu kuvasa kumizinda, vuno honi vazinda yange muomu njilina kuvaleka nguange vipangi viavo viapua via vipi. 8 Yeni ku ciuano yeni vavenia. Yange kunjiiko ku ciuano eci, muomu ntsimbu yange kanda icihete." 9 Munima yakuhandeka evi, Yesu uasalele mu Ngalileya.

10 Vuno honi omo vamunaina vanai laja ku ciuano, ambahoni Yesu nendi uayile, kaile citona mesho vuno honi uayile mu vushueke. 11 Vantuama va Vayunda vakele nakumutonda ha ciuano nakuhandeka nguavo, "Nkuma ikeye ali kuli?"

12 Hakati kavo hakele vamo vakele na kumufueya muje mu civunga. Tele oku vamo vahandekele nguavo, "Ou yala uacili," kaha vamo vakele nakuhandeka nguavo, "Houe, alinakutangula civunga." 13 Vuno honi naumo uahi uahandekele hali ikeye citona mesho muomu vakele na liova lia vantuama va Vayunda.

14 Ciuano cakele kuyehi nakuhua omo Yesu uayile ku Njivo ya Njambi nakukaputuka kulongesa. 15 Vantuama va Vayunda valikomokelele cikuma, kaha vahandekele nguavo, "Nkuma cija vati yala ou akale navilongesa evi, omo ikeye kalilongesele?"

16 Kaha Yesu uavakumbuluile nguendi, "Vilongesa evi keti viange vuno honi via uje uanjitumine." 17 Uoshe uje atonda kulinga vije viatonda Njambi akazivuka nga evi vinjilina kulongesa vihuma kuli Njambi cipue njilina kulihandekela lika yange vavenia. 18 Vaje vaka lihandekela vakevo vavenia, vakatondo kuuana vumpau vakevo vavenia, vuno honi uje atonda vumpau vua uje uamutumine napu muntu ua vusunga, naua muli ikeye kumuesi makuli. 19 "Nkuma Mosesa kamihanene lishiko ndi? Vuno honi naumo uahi hakati keni aniunga lishiko eli. Nkuma vika muli nakutondela ngila ya kunjitsihilamo?"

20 Vivunga viamukumbuluile nguavio, "Uli na lihamba! Nkuma iya alinakutonda kukutsiha?"

21 Yesu uavakumbuluile nguendi, "Njalingile cikomoueso cimo, kaha muva voshe mualikomokelele. 22 Mosesa uamishikile kulovoka (kucapuile ca Mosesa, vuno honi cahumine kuli vakukuluila veni), honi yeni mukalovola muanike ua yala ha litangua lia Sapalalo. 23 Nga muanike ua yala alovoka lia Sapalalo linga keti mupokole lishiko lia Mosesa, nkuma vika munienguela yange muomu njakanguisile muntu ha litangua lia Sapalalo? 24 Keti musompele vulemu vuno honi sompeni mu vusunga."

25 Vantu vamo vaku Yelusalema vakele nakuhandeka nguavo, "Nkuma keti ikeye ou yala uje ivatonda kutsiha vantuama va Vayunda ndi? 26 Nkuma ali kuno, mukuhandeka citona mesho ku vantu vuno honi vakevo nacimo cahi civali nakuhandeka kuli ikeye! Nkuma vaka nzili yakama vazivuka ngeci ou ikeye vene Kilistu ndi? 27 Yetu tuazivuka laja kuje kuahuminina ou yala, vuno honi omo Kilistu akeja, naumo uahi akazivuka kuje kuakahuma."

28 Kaha Yesu uatambakanene cikuma tele alinakulongesa mu vimbalaka via Njivo ya Njambi nguendi, "Muanjizivuka naua muazivuka kuje kunjihuma. Kunjalizililile vuno honi uje uanjitumine uapua ua vusunga naua kumu muzivuka. 29 Yange njimuzivuka, muomu njihuma kuli ikeye naua ikeye uanjitumine."

30 Kaha vatondele kumukuta vuno honi naumo uahi uasalekele livoko hali ikeye, muomu ntsimbu yendi tele kanda ihete. 31 Vuno honi vantu vavengi va muje mu civunga vamutsilielele nakuhandeka nguavo, "Omo Kilistu akeja, nkuma ikeye akalinga vimueso viavingi kupulakana evi vianalingi ou yala ndi?"

32 Vafaliseho vovuile civunga cije cakele nakungunguta hali Yesu ha viuma evi, nankuma, vakuluntu va vasasendote na Vafaliseho vatumine vaka kuniunga Njivo ya Njambi mukukuata Yesu. 33 Kaha Yesu uahandekele nguendi, "Njikakala neni mu kantsimbu kakandende lika, ambahoni njikaya kuli uje uanjitumine. 34 Mukanjitonda vuno honi kumukanjiuana, kaha kuje njikakala kumukasa kuyako."

35 Vantuama va Vayunda valihandekesele umo na mukuavo nguavo, "Nkuma atonda kuya kuli ou yala kuje kutukasa kumuuana? Atonda kuya ku Vinganda via Vangelengu kuje kuvanashandokela vantu vetu nakulongesa Vangelengu ndi? 36 Nkuma alinakulumbununa vika mukuhandeka nguendi, ‘Mukanjitonda vuno honi kumukanjiuana’ naua ‘kuje njikakala, kumukasa kuyako?’"

37 Ha litangua lia kumanusula ciuano naua likelio litangua liakama, tele Yesu nacimana kuje, uatambakanene cikuma nguendi, "Uoshe uje ali nampuila eje kuli yange linga akunue mema, 38 na uoshe uje atsiliela kuli yange anue. Ngue muvinahandeka visoneka nguavio, ‘Mu mitima ya vaka kutsiliela mukahuma vindonga via mema a muono!’ " 39 Yesu uahandekele evi hali Cimbembesi uje vaka kutsiliela ivakatambula, ha ntsimbu cimbembesi tele kanda vacihane, muomu Yesu tele kanda vamujundule ku vumpau.

40 Omo vovuile mezi aua, vamo mu civunga vahandekele nguavo, "Muavusunga vene ou yala ikeye kananguizi."

41 Kaha vakuavo vahandekele nguavo, "Ou ikeye vene Kilistu."

Vuno honi vamo vehuile nguavo, "Nkuma Kilistu asa kuhuma ku Ngalileya ndi? 42 Nkuma visoneka kuviahandekele nguavio Kilistu akahuminina ku vatekuluila va Ndaviti na kusemukila mu Mbetelehema, mu limbo muje muakele Ndaviti ndi?" 43 Nankuma kuakele lihangununo hakati ka vantu muomu ya Yesu. 44 Vamo vatondele kumukuta vuno honi naumo uahi uasalekele livoko hali ikeye.

45 Omo vaka kuniunga Njivo ya Njambi vahilukile ku vakuluntu va vasasendote na kuli Vafaliseho, vavehuile nguavo, "Nkuma vikahoni kumua munehelele?"

46 Vaka kuniunga Njivo ya Njambi vakumbuluile nguavo, "Naumo uahi asa kuhandeka ngue ou yala!"

47 Kaha Vafaliseho vavakumbuluile nguavo, "Nkuma neni naua namikuisa ndi? 48 Nkuma kuli umo ua vaka nzili yakama cipue ua Vafaliseho uje natsiliela kuli ikeye ndi? 49 Vuno honi civunga eci kucizivuka lishiko lia Mosesa, kaha cinasingiua."

50 Nikondemo uje uayile kuli Yesu ha kulivanga, kaha ikeye naua uapuile umo uavo uehuile vakuavo nguendi, 51 "Nkuma lishiko lietu likahisa vantu vaje kanda tucivue viavo na kuuana vika vivanalingi ndi?"

52 Vakevo vamukumbuluile nguavo, "Nkuma nove naua uhuma ku Ngalileya ndi? Tondesesa kaha ukauana nguove naumo uahi kananguizi akahuminina ku Ngalileya." 53 Kaha muntu na muntu uayile kuimbo liendi,