1 Honi kuakele Kafaliseo ualizina lia Nikondema, ntuama ua Vayunda. 2 Uayile kuli Yesu vutsiki nakuhandeka kuli ikeye nguendi, "Mulongisi, tuazivuka nguetu u mulongisi uakuhuminina kuli Njambi, muomu naumo uahi asa kulinga vimueso evi viulinakulinga kuakuhona nzili ya Njambi."

3 Yesu uamukumbuluile nguendi, "Muavusunga njikuleka, naumo uahi asa kumona Vumuene vua Njambi kuakuhona kusemuka luvali."

4 Nikondema uahandekele kuli ikeye nguendi, "Vatihoni muntu asa kusemuka luvali munima yakukola laja? Nkuma muntu asa kukovela muzimo lia vaina luvali na kusemuka naua ndi?"

5 Yesu uamukumbuluile nguendi, "Muavusunga vene njikuleka nguange, naumo uahi asa kukovela mu Vumuene vua Njambi kuakohona kusemuka ku mema na ku Cimbembesi. 6 Uje uasemuka ku muntu uapua muntu na uje uasemuka ku Cimbembesi uapua Cimbembesi. 7 Keti ukomoke nga njikuleka nguange unapande kusemuka luvali. 8 Mpunzi ikapekumukila kuoshe kuje kuikatondo, kaha mukevu cililimo cayo, vuno honi kuuasa kuzivuka kuje kuihuminina cipue kuje kuiya. Nankuma, omu mukemo vene mucinapu na kuli uoshe uje asemuka ku Cimbembesi."

9 Nikondema uamuhuile nguendi, "Evi vikalingiua vatihoni?"

10 Yesu uamukumbuluile nguendi, "Nkuma keti yove mulongisi ua Isaleli, nkuma naua ku uvizivuka evi viuma ndi?" 11 Muavusunga vene njikuleka, tukahandeka vije vituzivuka nakuambulula vukaleho vua vije vitukamono, vuno honi yeni kumue kutambula vukaleho vuetu. 12 Nga njamilekele viuma via ha mavu, vuno honi kumua njitsiliela, kaha vatihoni mukanjitsiliela nga njikamileka viuma via muilu? 13 Naumo uahi uaya muilu kuvanga Muna Muntu lika uje uezile kuhuma muilu.

14 Ngue Mosesa muje muajunduile linoka mu vindinda, mucifua cimo vene vakajundula na Muna Muntu, 15 linga uoshe akatsiliela muli ikeye akakale na muono uayaye. 16 Muomu Njambi uazangele vaka mavu cikuma ngeci uahanene Munendi umolika, linga uoshe atsiliela muli ikeye keti akanonge vuno honi akale na muono uayaye. 17 Muomu Njambi katumine Munendi hano ha mavu mukuhisa vaka mavu, vuno honi linga mavu ovoke kuhitila muli ikeye.

18 Uje natsiliela muli ikeye kuvakamuhisa, vuno honi uje katsiliela vanamuhisa laja, muomu katsilielele mu lizina lia Muna Njambi umolika. 19 Nankuma eci cikeco cisompelo, ceke cezile ha mavu, vuno honi vantu vazangele milima kupulakana ceke muomu vilinga viavo viapuile via vupi. 20 Muomu uoshe uje muka kulinga vupi uazinda ceke nakuhona kuija ku ceke, linga vilinga viendi keti vilisholole. 21 Vuno honi uoshe uje muka kulinga via vusunga akeja ku ceke, linga cilimuese cilivene vilinga viendi viakundama kuli Njambi.

22 Munima yevi, Yesu na vandongisi vendi vayile ku cihela ca Yundeya, kuje kuakele navo ka ntsimbu lika nakuvambuitika. 23 Yiuano naua uakele nakumbuitika ku Aenone kuyehi na Salime muomu kuje kuakele mema amengi, na vantu vakele nakuya linga vakavambuitike. 24 Evi vialingiuile ha ntsimbu ije Yiuano tele kanda vamuhake mu kamenga.

25 Vamo vandongisi va Yiuano vakele nakulinga vimpata na Kayunda umo ha futisi ya kulilelesa. 26 Vayile kuli Yiuano na kumulekesa nguavo, "Mulongisi, yala uje uakele nove musinia lia ndonga ya Yundau uje iualingilile vukaleho, kuno ali nakumbuitika, na vantu voshe valinakuya kuli ikeye."

27 Yiuano uavakumbuluile nguendi, "Naumo uahi asa kutambula cuma kuvanga vanamuhanaco muilu. 28 Yeni muvakaleho vange ngue muje munjahandekele nguange, ‘Keti yange Kilistu, vuno honi vananjitumu kulutue luendi.’ 29 Uje ali na shombolua ikeye vavenia vulo, vuno honi kavusamba ua vavenia vulo uje nemana nakumuvuilila, avuahelela cikuma omo evua lizi lia vavenia vulo. Nankuma, mukemo mucikafua kuvuahelela cange. 30 Ikeye napande kupua uakama, vuno honi yange njapande kupua uamundende."

31 Uje ahuma kuilu nahiana voshe, uje ahuma hano ha mavu nakundama kuvia ha mavu nakuhandeka viuma via hano ha mavu. Vuno honi uje ahuma muilu ali helu lia voshe. 32 Akahandeka vukaleho vua vije viakamono na kuivua, vuno honi naumo uahi akatambula vukaleho vuendi. 33 Uoshe uje natambula vukaleho vuendi amuesa ngeci Njambi uapua ua vusunga. 34 Uoshe uje yanatumu Njambi akahandeka mezi a Njambi, muomu Njambi mukakuhana Cimbembesi kuakuhona kuseteka. 35 Ishe uazanga Muana, kaha nahana viuma vioshe mu mavoko endi. 36 Uoshe atsiliela muli Muana ali na muono uayaye, kaha uoshe kononoka Muana kakakala na muono, vuno honi vutenu vua Njambi vukakala hali ikeye.