1 Ha litangua lia mucitatu kuakele ciuano ca vulo ku Kana mu Ngalileya, na vaina ya Yesu vakeleko. 2 Yesu na vandongisi vendi navo naua vavalaniene ku ciuano cije. 3 Omo viniu viahuile, vaina ya Yesu vahandekele kuli ikeye nguavo, "Viniu vinahu."

4 Kaha Yesu uahandekele kuli vaina nguendi, "Nana, keti munjileke viakulinga, ntsimbu yange kanda ihete."

5 Vaina ya Yesu valekele vaje vangamba nguavo, "Lingeni vioshe vije viamileka."

6 Kuje kuakele vinjava via mavue viakutekuila mema vitanu na imo via Vayunda ngue ku muyati uavo ua kulilelesa, imo na imo yasele kukala na malita a mema akupua vihita (100) 7 Yesu ualekele vaje vangamba nguendi, "Shuliseni evi vinjava na mema." Nankuma vavishulisile vioshe naku kanua. 8 Uavalekele nguendi, "Honi tekulenimo amo mutuale kuli mukuluntu ua ciuano." Nankuma vamutualelele. 9 Omo uje mukuluntu ua ciuano uamakelele aje mema aje atengulukile kupua viniu, ikeye kazivukile kuje kuviahumine vije viniu (cipue vene vaje vangamba vatekuile aje mema vakevo vazivukile), nankuma mukuluntu ua ciuano uasanene vavenia vulo, 10 kaha uahandekele kuli ikeye nguendi, "Muntu uoshe akalivanga kuhana viniu viacili, ambahoni ahana via vishamu munima ya vaje vavanalania vanapende laja. Vuno honi yove hanga uatulika viniu viacili kuheta na kuntsimbu ino."

11 Yesu ualingile eci cimueso cendi ca kulivanga ku Kana mu Ngalileya, nakusholola vumpau vuendi, na vandongisi vendi vatsilielele muli ikeye.

12 Munima yevi, Yesu uayile ku Kapenauma na vaina, na vamunaina, na vandongisi vendi, vakele kuje matangua amandende lika.

13 Omo Ciuano ca Paseka ca Vayunda cakele muyehi, nankuma Yesu uayile ku Yelusalema. 14 Mu vimbalaka via njivo ya Njambi uauanene vantu vaje vakele nakulandeselamo vangombe, na vampanga, na mavembe na vaka kulandulula vimbongo vaje vatumamene ku vimesa viavo. 15 Nankuma uapangele likote, voshe uavashekelele hambanza lia vimbalaka via njivo ya Njambi, hamolika na vampanga na vangombe, kaha uombilile vimbongo via muuaya uaya via vaje vakele nakulandulula kaha uafulumikile vimesa viavo. 16 Kaha ualekele vaje vakele nakulandesa mavembe nguendi, "Tuhuiseni evi viuma muno! Keti mupuise Njivo ya Tate mutambela uakulandesela!" 17 Vandongisi vendi vavulukile ngeci visoneka vihandeka nguavio, "Cizango cange ha Njivo ya Yove cishukuma muli yange ngue tuhia."

18 Vayunda vamuihuile nguavo, "Cimueso muka uasa kutumuesa ngeci uli na nzili yakama yakulinga eci?"

19 Yesu uavakumbuluile nguendi, "Siuleni eyi Njivo ya Njambi, kaha mu matangua atatu njikaitunga naua."

20 Kaha Vayunda vahandekele nguavo, "Eyi Njivo ya Njambi vaitungile mu miaka yakupua makumi auana na miaka itanu na umo (46), nkuma yove ukaitunga vati mu matangua atatu?"

21 Vuno honi uakele nakuhandeka Njivo ya Njambi ya muvila uendi. 22 Hanima ya kusanguka ku vatsi, vandongisi vendi vavulukile nguavo vikevio viahandekele evi, kaha vatsilielele visoneka na lizi lije liahandekele Yesu.

23 Honi omo Yesu uakele mu Yelusalema ku ciuano ca Paseka, vavengi vatsilielele mu lizina liendi muomu vamuene vimueso vije vialingile. 24 Vuno honi Yesu kalihanene ikeye vavenia kuli vakevo, 25 muomu uazivukile vantu voshe kaha katondele muntu umo amuleke vukaleho vua hali mukuavo, muomu ikeye vavenia uazivukile vije viakele muli muntu uoshe.