1 Ambahoni Pilato uambatele Yesu na kuvahanaye linga va mupupe makote. 2 Masualale vazengele cilongo ca vimbimbo vacihakele ku mutue uendi, nakumuzika cikovelo calaha ca vunengu. 3 Vakele nakuija kuli ikeye okuvahandeka nguavo, "Uavulie, Muene ua Vayunda!" Oku valina kushuena kuyehi nendi naku mupupanga ku cihanga.

4 Pilato naua uatuhukile hambanza nakuhandeka kuli vakevo nguendi, "Taleni, njilina kumuneha kuli yeni linga muzivuke ngueni kunjauanene mulonga muli ikeye uakumuluisa." 5 Kaha honi Yesu uatuhukile hambanza, oku nazala cilongo ca vimbimbo na cikovelo calaha ca vunengu. Pilato uahandekele kuli vakevo nguendi, "Muntu ueni ou."

6 Omo vakuluntu va vasasendote na vaka kuniunga njivo ya Njambi vamumuene, vatambakanene cikuma nguavo, "Mushukikeni! Mushukikeni!"

Pilato uahandekele kuli vakevo nguendi, "Muambateni yeni vavenia linga mumushukike, yange kunjauanene mulonga muli ikeye uakumuluisa nauo."

7 Kaha vantuama va Vayunda vamukumbuluile nguavo, "Tuli na lishiko, kaha kuya ku lishiko eli napande kutsa muomu nalitumbula kupua Muna Njambi." 8 Honi omo Pilato uevuile eci, uovuile liova kupulakana ha kulivanga.

9 Uakovelele naua mu lipela liendi nakuihula Yesu nguendi, "Nkuma uhuminina kuli?"

Vuno honi Yesu kamukumbuluile. 10 Nankuma Pilato uahandekele kuli ikeye nguendi, "Nkuma uviana kuhandeka nange ndi? Nkuma kuuazivukile nguove yange njilina nzili yaku kuhumisa, cipue kukushukika ndi?"

11 Yesu uamukumbuluile nguendi, "Kuuesi na nzili hali yange kuvanga vanakuhanayo kuhuminina kuli Njambi, nankuma uje uanjinehele kuli yove ali na mulonga ua vupi uakama."

12 Kuhuma haje Pilato uatondele ngila ya kumuecela, vuno honi vantuama va Vayunda vatambakanene cikuma nguavo, "Nga uecela ou yala linga aye, kaha keti ukavusamba ka Sezale. Uoshe uje alitumbula ikeye vavenia kupua muene napu citozi ca Sezale."

13 Omo Pilato uevuile mezi avahandekele, uatuhuisile Yesu hambanza, kaha uatumamene ha cituamo ca kusompela ku cihela civatumbuile nguavo, "Cihela cakujala mavue," kaha mu Cihevelu nguavo "Ngavata." 14 Kaha liapuile litangua lia Kulivuahesela Paseka, tele mutania. Pilato uahandekele ku vantuama va Vayunda nguendi, "Muene ueni ou!"

15 Vatambakanene cikuma nguavo, "Mutsihe! Mutsihe! Mushukike ha cilindakano!"

Kaha Pilato uavehuile nguendi, "Nkuma mutonda njishukike Muene ueni ndi?"

Vakuluntu va vasasendote vamukumbuluile nguavo, "Kutuesi na muene ueka vuno honi Sezale."

16 Kaha Pilato uavahaneneye linga vamushukike.

Ambahoni masualale vambatele Yesu. 17 Kaha Yesu uambatele cilindakano cendi vavenia, vayile ku cihela cije civatumbula nguavo Cikola, mu Cihevelu vacitumbula nguavo Ngolongota. 18 Kuje vaka mushukikile, kaha vashukikile naua na mihuza vavali, umo ku cilio mukuavo ku cimoshue, na Yesu mukati kavo. 19 Pilato uasonekele helu lia cilindakano nguendi, "Yesu uaku Nazaleta, Muene ua Vayunda." 20 Vayunda vavengi vatandele haje helu lia cilindakano, muomu ku cihela kuje kuvamushukikilile cakele kuyehi na nganda, kaha haje hacilindakano uasonekeleho mu Cihevelu na mu Cilatini, na mu Cingelengu. 21 Kaha vakuluntu va vasasendote va Vayunda vahandekele kuli Pilato Nguavo, "Keti usonekeho nguove, ‘Muene ua Vayunda,’ vuno honi nguove, ‘Ou yala uahandekele nguendi nji Muene ua Vayunda.’"

22 Pilato uavakumbuluile nguendi, "Vinjinasoneka, njasoneka."

23 Omo masualale vamanusuile kushukika Yesu, vambatele vuzalo viendi, kaha vavipangele mu vimbazuvuila viuana, lisualale umo na umo uambateleko cendi. Kaha naua vambatele cikovelo cendi ca mukati cakupanga ha ntanga imolika ya maka yakuhona mukunduilo, kuhuma kuilu na ha mavu. 24 Valihandekesele umo na mukuavo nguavo, "Keti tucitavule, vuno honi tuteni nkela tumone iya akacambata." Eci calingiuile linga visoneka vilishulisise vije vihandeka nguavio,

"Valipangezelele vuzalo vuange hakati kavo,

kaha muomu ya vuzalo vuange vatele nkela."

Evi vikevio vivalingile masualale.

25 Kaha vaje vemanene kuyehi na cilindakano ca Yesu vapuile vaina, na shongo ya vaina, na Maliya mpuevo ya Kolopase, na Maliya Mangandalena. 26 Omo Yesu uamuene vaina na ndongisi uje yazangele cikuma uemanene kuyehi nendi, kaha Yesu uahandekele kuli vaina nguendi, "Mpuevo, tala, munove!"

27 Kaha uahandekele kuli ndongisi uendi nguendi, "Tala vanoko!" Kuhuma ha ntsimbu ije uje ndongisi uatualele vaina ya Yesu ku njivo yendi.

28 Hanima yevi Yesu uazivukile ngeci vioshe vinahu kaha uahandekele nguendi, "Linga visoneka vilishulisise, ‘Njilinakuvua mpuila!’ "

29 Kuakele nganja kuje ije yashulile na viniu. Kaha vajavekelemo mupelo muje mu viniu na kuhaka ku muntango ua Isope, vaukakuile naku haka ku kanua kendi 30 Omo Yesu uatambuile viniu kaha uahandekele nguendi, "Kunahu." Kaha uatepuile mutue uendi nakuecela Cimbembesi cendi.

31 Omo liapuile litangua lia Kulivuahesela ciuano ca Paseka. Vayunda kuvatondele mivila isale ha cilindakano ha litangua lia Sapalalo muomu liapuile litangua liakama cikuma. Kaha Vayunda valombele Pilato linga vapokozole mikono ya vaje vamala va vashukikile na mivila yavo linga vaihumise ha vilindakano. 32 Kaha masualale vezile na kupokozola mikono ya vaje mihuza va vashukikile hamo na Yesu. 33 Vuno honi omo vahetele kuli Yesu vamuuanene natsi laja, nankuma kuvapokuele mikono yendi. 34 Umo ua vaje masualale, uatuvile Yesu likunga ku vimpati, kaha haje vene maninga na mema atuhukileko. 35 (Uje uamuene vioshe evi muvialingiuile uahanene vukaleho ngeci neni naua mutsiliele. Vukaleho vuendi vua vusunga, kaha azivuka nguendi ahandeka vusunga) 36 Vioshe evi via lingiuile linga visoneka vilishulisise vije vihandeka nguavio, "Kuvitsihia viendi nacimo cahi cikapokokako." 37 Kaha naua visoneka vikuavo vihandeka nguavio, "Vakatonda uje ivatuvile likunga,"

38 Hanima ya viuma evi, Yosefa uaku Alamatiya, uje uapuile ndongisi ua Yesu mu vushueke, muomu ya liova lia vantuama va Vayunda uezile kuli Pilato nakumulomba linga ambate muvila ua Yesu. Kaha Pilato uamuhanene nzili yakuhumisa muvila ua Yesu ha cilindakano, Kaha ua uhumisileho. 39 Nikondemo, uje ikeye ha kulivanga uayile kuli Yesu vutsiki na ikeye uayile hamo na Yosefa, oku nambata makilo akupua makumi atatu a mukundu, uakutsingasana na miila na lian̄uan̄ua. 40 Ava vavali vambatele muvila ua Yesu nakuzengela ha vintanga via liniu hamo na vihemba viakunika muacili viakutua, kuya muvakatsindila ku cilika ca Vayunda. 41 Kuakele citungu ku cihela cije kuvamushukikilile, muje mu citungu muakele cihilo cije kanda vatsindemo muntu. 42 Liapuile litangua lia Vayunda lia Kulivuahesela ciuano ca Paseka, kaha muomu ya cihilo cije cakele muyehi, nankuma vatsindilemo Yesu.