1 Hanima yevi Yesu uayile musinia lia Cisali ca Ngalileya, cije civatumbula naua Cisali ca Timbeliase. 2 Civunga cakama camukavele, muomu vamuene vimueso vije viakele nakulinga ku vaka kuvavala. 3 Yesu ualondele ha munkinda nakutumama hamo na vandongisi vendi. 4 Honi Paseka Ciuano ca Vayunda cakele muyehi. 5 Omo Yesu uanduile mesho endi uamuene civunga cakama cili nakuija kuli ikeye, nankuma uehuile Filipu nguendi, "Kuli tuasa kulanda viakulia via vantu ava linga valie?" 6 Uahandekele eci mukumueseka, muomu ikeye vavenia uazivukile vije viakalinga.

7 Filipu uamukumbuluile nguendi, "Cipue vihita vivali (200) via vimbongo via muuaya uaya kuviasa kulanda viakulia viakulisa ava linga umo na umo auane kakandende."

8 Umo ua vandongisi vendi, Anduleo munaina ya Simoni Petulu, uahandekele kuli ikeye nguendi, 9 "Kuli muanike ua yala kuno alina mikasha itanu ya mbolo yakupanga ha vunga vua mbale na vantsi vavali. Vuno honi nkuma viasa kupuamo ku vantu voshe ava ndi?"

10 Yesu uahandekele nguendi, "Lekeni vantu voshe vatumame ha mavu." Kuakele muila uauingi ku cihela cije, nankuma voshe vatumamene ha mavu, kuakele vamala vakupua mu makulukazi atanu (5,000) 11 Ambahoni Yesu uatambuile ije mikasha ya mbolo, uatsantselele kuli Njambi, kaha uaipangezelele vantu vaje vatumamene, ualingile cuma cimo naku vantsi naua, voshe valile kaha vakutile muva tondelelemo. 12 Omo voshe vakutile, Yesu ualekele vandongisi vendi nguendi, "Kungululeni evi vimbazuvuila vinasalaho, keti tupihiseho cipue tuatundende." 13 Nankuma vavikunguluile vioshe, kaha vije vimbazuvuila via mikasha itanu ya mbolo yakupanga ha vunga vua mbale ivasezele vaje valile, vashulisileho mitonga likumi na ivali.

14 Omo vantu vamuene cimueso cije calingile Yesu, vaputukile kuhandeka nguavo, "Cilivene ou ikeye kananguizi uje akeja hano ha mavu." 15 Omo Yesu uazivukile nguendi vatonda kumukuata linga vamupuise muene, uayile naua ku munkinda likaliendi lika.

16 Omo litangua liatokele, vandongisi va Yesu vayile ku cisali, 17 vakovelele mu vuato nakuya musinia lia cisali ku Kapenauma. Kuaputukile milima, tele hanga Yesu kanda acihete kuli vakevo. 18 Cisali cakele nakulininganga muomu kuahitile mpunzi yakama. 19 Omo vajavuile ntunda ya makilomita akupua atatu cipue auana, vamuene Yesu alinakuenda ha mema kuija kuyehi na vuato, kaha vovuile liova. 20 Vuno honi Yesu uahandekele kuli vakevo nguendi, "Yange vene, keti muvue liova." 21 Ambahoni vatondele kumukovelesa mu vuato, hajevene vuato vuahetele ku ntunda kumutambela kuje vakele nakuya.

22 Liamukuavo civunga ca vantu vaje vasalele musinia lia cisali vamuene nguavo kuakele lika vuato vumolika kuje. Vamuene naua nguavo Yesu kakovelele hamo mu vuato na vandongisi vendi, vuno honi vandongisi vendi vayile likaliavo lika. 23 Kaha mato amo aje ahumine ku Timbeliase ezile kuyehi na cihela kuje kuvalililile mbolo hanima ya Muene kuitsantsela kuli Njambi. 24 Nankuma, omo civunga camuene ngeci Yesu na vandongisi vendi vahiko kuje, vakovelele mu mato nakuya ku Kapenauma mukutonda Yesu.

25 Omo vamu uanene musinia lia cisali, vahandekele kuli ikeye nguavo, "Mulongisi, tangua lika unezile kuno?"

26 Yesu uavakumbuluile nguendi, "Muavusunga vene njimileka nguange, muli nakunjitonda, keti ngue muomu muamuene vimueso viange, vuno honi muomu mualile mbolo nakukuta. 27 Keti mupangele viakulia vije vikapola, vuno honi pangeleni viakulia via muono uayaye, vije Muna Muntu akamihanavio. Muomu ou ikeye ivanahana cimueso cakumutava kuli Ishe Njambi."

28 Ambahoni vamuihuile nguavo, "Nkuma vika tuapande kulinga linga tulinge vije viatonda Njambi?"

29 Yesu uavakumbuluile nguendi, "Eci cinapu cipangi ca Njambi, linga mutsiliele muli uje yanatumu."

30 Nankuma vamuihuile nguavo, "Nkuma cimueso muka ukatuhana honi, linga tukacimone nakukutsiliela? Nkuma cipangi muka ukalinga? 31 Vakukuluila vetu valile maana mu Mpambo, ngue muvanacisoneka nguavo, ‘Uavahanene mbolo yakuhuminina muilu linga valie!’ "

32 Kaha Yesu uahandekele kuli vakevo nguendi, "Muavusunga vene njimileka nguange, kapuile Mosesa uje uamihanene mbolo yakuhuma muilu, vuno honi Tate ikeye akamihana mbolo ya vusunga ya kuhuma muilu. 33 Muomu mbolo ya Njambi yapua ije ihuma muilu nakuhana muono kuli vaka mavu."

34 Vahandekele kuli ikeye nguavo, "Muene, tuhane eyi mbolo ntsimbu yoshe."

35 Yesu uavalekele nguendi, "Yange mbolo ya muono. Uoshe uje eja kuli yange kakatsiho njala, naua uoshe uje atsiliela kuli yange kakevuho mpuila. 36 Vuno honi njamilekele nguange muanjimono vuno kumuasa kunjitsiliela. 37 Coshe cije canjihana Tate cija kuli yange, na uoshe uje eja kuli yange kunjikamusheke, 38 muomu njahumine muilu, keti ngue mukulinga cizango cange, vuno honi cizango cauje uanjitumine. 39 Honi eci cikeco cizango cauje uanjitumine, linga keti njikahone cimo ku vioshe vije viananjihana, vuno honi njikavasanguile ku muono ha litangua lia mamanusuilo. 40 Eci cilivene cikeco cizango ca Tate, ngeci uoshe amona Muana nakutsiliela kuli ikeye akakale na muono uayaye, kaha njikamusanguile ku muono ha litangua lia mamanusuilo."

41 Kaha vantuama va Vayunda vaputukile kulinienieta hali ikeye muomu uahandekele nguendi, "Yange mbolo ije yahumine muilu." 42 Vakele nakuhandeka nguavo, "Nkuma keti ikeye Yesu ou, muna Yosefa, uje vaishe na vaina vatuzivuka ndi? Nkuma cija vati ahandeke nguendi, ‘Njahumine muilu?’"

43 Yesu uavakumbuluile nguendi, "Keti mulinieniete hakati keni. 44 Naumo uahi asa kuija kuli yange kuvanga uje yaneha Tate uje uanjitumine, kaha njikasanguile uje muntu ku muono ha litangua lia mamanusuilo. 45 Vanacisoneka ku tunanguizi nguavo, ‘Voshe Njambi akavalongesa.’ Uoshe evua Tate nakulilongesa kuli ikeye eja kuli yange. 46 Keti nguavo muntu uoshe uamona Tate, vuno honi kuvanga lika uje uahuma kuli Njambi ikeye uamona Tate. 47 Muavusunga vene njimileka nguange, uje uoshe atsiliela alina muono uayaye. 48 Yange mbolo ya muono. 49 Vakukuluila veni valile maana mu Mpambo na kutsa. 50 Eyi ikeyo mbolo ije ihuma muilu, linga uoshe uje aliako kakatsi. 51 Yange mbolo ya muono ije yahumine muilu. Uoshe uje alia ku mbolo eyi akayoya miaka yoshe, kaha mbolo ije injikahana ya muono ua vaka mavu inapu muvila uange."

52 Vantuama va Vayunda vaputukile kulinga vimpata hakati kavo, kaha vahandekele nguavo, "Nkuma cija vati ou yala atuhane muvila uendi linga tu ulie?"

53 Nankuma, Yesu uahandekele kuli vakevo nguendi, "Muavusunga vene njimileka nguange, nga kumukali muvila ua Muna Muntu na kunua maninga endi, kaha kumukakala na muono. 54 Voshe valia muvila uange na kunua maninga ange valina muono uayaye, kaha njikavasanguila ku muono ha litangua lia mamanusuilo, 55 muomu muvila uange ukeuo viakulia via vusunga na maninga ange akeuo viakunua via vusunga. 56 Vaje voshe valia muvila uange na kunua maninga ange vakala muli yange, nange njikala muli vakevo. 57 Ngue muanjitumine Tate uakuyoya, nange njilina kuyoya muomu ya Tate, nankuma uoshe uje akalia muvila uange akayoya muomu yange. 58 Eyi ikeyo mbolo ije yahumine muilu, vakukuluila veni valile maana na kutsa. Vuno honi uoshe uje alia mbolo eyi akayoya miaka yoshe."

59 Yesu uakele nakuhandeka evi oku tele ali nakulongesa mu njivo ya malombelo ku Kapenauma.

60 Omo vandongisi vendi vavengi vovuile evi, vahandekele nguavo, "Vilongesa evi viavikalu, iya asa kuvivuilila?"

61 Vuno honi Yesu hakuzivuka ngeci vandongisi vendi vali nakulinienieta ha cikeco, uahandekele kuli vakevo nguendi, "Nkuma eci cilinakumivuisa kupihia ndi? 62 Kaha nga cafuile vatihoni ngue muamuene Muna Muntu alonda kuya kuje kuakele ha kulivanga? 63 Cimbembesi ikeye akahana muono, muvilani uapua uangoco. Mezi aua anjinahandeka kuli yeni akeuo a Cimbembesi na muono. 64 Vuno honi hakati keni kuli vamo vaje vakuhona kutsiliela." Muomu Yesu uazivukile laja hume hambangelo vaje vaka kuhona kutsiliela, na vaje vakamuenda vungungu. 65 Nankuma, uahandekele nguendi, "Ha cuma eci njamilekele nguange naumo uahi asa kuija kuli yange kuvanga Tate amutavese."

66 Muomu ya vilongesa evi, vandongisi vendi vavengi vahilukilemo kaha kuvamu kavangeyele naua. 67 Nankuma Yesu uehuile vandongisi vendi likumi na vavali nguendi, "Neni naua mutonda kuhilukamo ndi?"

68 Simoni Petulu uamukumbuluile nguendi, "Muene, nkuma kuli iya tuasa kuya? Yove uli na mezi a muono uayaye. 69 Tuatsiliela honi nakuzivuka nguetu yove uapua Umo Uakulela ua Njambi."

70 Yesu uavakumbuluile nguendi, "Nkuma keti yange njamihanguile, yeni vandongisi likumi na vavali ndi? Vuno honi umo ueni napu liyavolo." 71 Uakele nakuhandeka Yundasa muna Simoni Sakaliote, cipue vene uapuile umo uavaje vandongisi likumi na vavali, vuno honi ikeye akamuenda vungungu.