1 Hanima ya Yesu kuhandeka mezi aua, uayile na vandongisi vendi musinia lia cana ca Kindeloni. Ku cihela kuje kuakele citungu cije ikeye na vandongisi vendi vakovelelemo. 2 Kaha Yundasa uje uamuendele vungungu, nendi uazivukile ku cihela kuje, muomu vintsimbu via vingi Yesu uakele na kuliuanenako cikuma na vandongisi vendi. 3 Nankuma Yundasa uayile ku citungu cije, uayile hamo namasualale va Loma na vamo vaka kuniunga Njivo ya Njambi vaje vavatumine ku vakuluntu va vasasendote hamo na Vafaliseho, vezile na mitetengo ya tuhia, na vindeya na vitua. 4 Kaha omo Yesu ha kuzivuka vije vikalingiua kuli ikeye, uezile kuli vakevo nakuvehula nguendi, "Nkuma iya muli nakutonda?"

5 Vamukumbuluile nguavo, "Yesu uaku Nazaleta."

Yesu uavakumbuluile nguendi, "Yange vene ikeye."

Yundasa uje uamuendele vungungu uakele hamo navo. 6 Omo Yesu uahandekele kuli vakevo nguendi, "Yange vene ikeye," vahilukilile munima kaha vauililile ha mavu. 7 Kaha naua uavehuile nguendi, "Nkuma iya muli nakutonda?"

Kaha vahandekele kuli ikeye nguavo, "Yesu uaku Nazaleta."

8 Yesu uavakumbuluile nguendi, "Njamileke laja nguange yange vene ikeye." Kaha nguendi, "Nga munjitonda, eceleni ava vamala vaye." 9 Uahandekele evi linga vije viahandekele vilishulisise nguavo, "Kunjazimbaleseleho naumo uahi kuli vaje vauanjihanene."

10 Ambahoni Simoni Petulu uje uakele na mukuale, uatete ndungo ya kasasendote uakama lituitui lia ku cilio. Lizina lia uje ndungo liapuile Maleka. 11 Yesu uahandekele kuli Petulu nguendi, "Haka mukuale uove mucindalo cauo. Nkuma yange kunjasa kunua eyi nganja yanjihanene Tate ndi?"

12 Nankuma, masualale Valoma na mukuluntu ua vaka kushika na vaka kusuana va vantuama va Vayunda vakuatele Yesu, kaha vamukutile. 13 Ha kulivanga vamutualele kuli Anase, uje uapuile vaishe mueno ya Kayafase, uje uapuile kasasendote uakama ha muaka uje. 14 Kayafase ualekele vantuama va Vayunda nguendi cacili muntu umo kutsila vantu voshe.

15 Kaha honi Simoni Petulu na ndongisi mukuavo vakavangeyele Yesu. Uje ndongisi vamuzivukele cikuma kuli kasasendote uakama, uakovelele na Yesu mu cipango ca njivo ya kasasendote uakama, 16 vuno honi Petulu uemanene hambanza ku cikolo. Ngeci uje mukuavo ndongisi, uje ivazivukile cikuma kuli kasasendote uakama, uayile hambanza, nakuhandeka na mpuevo uje uakele nakuniunga ku cikolo, kaha uakovelesele Petulu mukati. 17 Uje mpuevo uahandekele kuli Petulu nguendi, "Nkuma keti yove uavamo ua vandongisi va yala ou ndi?"

Petulu uamukumbuluile nguendi, "Keti yange."

18 Kaha vandungo na vaka kuniunga vavuekele tuhia muomu kuakele lisika, kaha voshe valizengelekele kuje ku tuhia nakuota. Na Petulu nendi uemaneneko nakuota.

19 Kasasendote uakama uehuile Yesu via vandongisi vendi na vilongesa viendi. 20 Yesu uamukumbuluile nguendi, "Njahandekele citona mesho ku vaka mavu, njinakala nakulongesa mu vinjivo via malombelo na mu njivo ya Njambi, muje muva kakungulukila Vayunda voshe. Kunjahandekele cuma mu vushueke. 21 Nkuma vika munjihuila? Ihuleni vaje vovuile vije vinjakele nakuhandeka kuli vakevo, vazivuka vije njakele nakuhandeka."

22 Omo uahandekele eci, umo ua vaka kuniunga uemanene hayehi nendi, uapupile mbanda Yesu ha mesho nakuhandeka nguendi, "Nkuma omu mukemo muuapande kutava Kasasendote uakama ndi?"

23 Yesu uamukumbuluile nguendi, "Nga njinahandeka cuma ca cipi, leka vantu voshe vazivuke. Vuno honi nga njinahandeka vusunga, nkuma vika honi uanjipupila?"

24 Ambahoni Anase uatumine Yesu kuli Kayafase uje uapuile Kasasendote uakama oku vanamukutu.

25 Tele Simoni Petulu uemanene nakuota tuhia. vamuihuile nguavo, "Nkuma keti yove umo ua vandongisi vendi ndi?"

Uavianene nakuhandeka nguendi, "Keti yange."

26 Umo ndungo ua Kasasendote uakama, kavushoko kauje yala yatetele lituitui Petulu, uamuhuile nguendi, "Nkuma kunjakumuene na Yesu mu citungu ndi?"

27 Kaha naua Petulu uavianene, kaha ha ntsimbu ije vene ndemba uatambekele.

28 Tele cimenemene vahumisile Yesu kuli Kayafase nakumutuala kuli Pilato ku lipela liakama. Kuje vakevo kuvakovelele mu lipela liakama, muomu kuvatondele kulijualesa linga vakase kulia ciuano ca Paseka. 29 Nankuma Pilato uayile hambanza kuli vakevo nakuhandeka nguendi, "Nkuma mulonga muka muamu uana nauo ou yala?"

30 Vamukumbuluile nguavo, "Nga ou yala kapuile muhuza, ngue kutuamunehele kuli yove."

31 Pilato uahandekele kuli vakevo nguendi, "Muambateni yeni vavenia linga muka musompe muje muayila lishiko lieni."

Vantuama va Vayunda vamukumbuluile nguavo, "Kuvatutavesele kutsiha muntu." 32 (Eci capuile kushulisisa aje mezi ahandekele Yesu omo uahandekele kutsa cije akatsa naco ngeci apue a vusunga)

33 Kaha Pilato uakovelele mu lipela liakama naua, uasanene Yesu nakumuihula nguendi, "Nkuma yove Muene ua Vayunda ndi?"

34 Yesu uamukumbuluile nguendi, "Nkuma cihula eci cihuminina kuli yove vavenia, indi kuli vamo vanakuleke viange?"

35 Pilato uamukumbuluile nguendi, "Nkuma usinganieka nguove yange Kayunda ndi? Vantu vove na vakuluntu va vasasendote vakevo vanahana yove kuli yange. Nkuma vika unalingi?"

36 Yesu uamukumbuluile nguendi, "Vumuene vuange keti vua hano ha mavu, nga vumuene vuange vuapuile vua hano ha mavu, ngue vakuasi vange ngue vanalu kuvingilika kunjihana ku mavoko a vantuama va Vayunda. Vuno honi ngue mucinafuilamo, vumuene vuange keti vua hano ha mavu."

37 Pilato uamuhuile nguendi, "Nkuma yove muene ndi?"

Yesu uamukumbuluile nguendi "Uahandeka nguove nji muene. Ha cuma eci vene mukemo njasemukile, kaha naua ha cuma eci vene mukemo njezile ha mavu mukuhandeka vusunga. Uoshe uje nakundama ku vusunga akevuilila ku lizi liange."

38 Pilato uamuhuile nguendi, "Nkuma vusunga vukevuo vika?"

Hanima yakuhandeka evi vioshe, Pilato uayile naua hambanza ku vantuama va Vayunda nakuvaleka nguendi, "Kunjauanene mulonga uakumuluisa nauo ou yala. 39 Vuno honi kuya ku cilika ceni, njapandele kumihumisila umo cinzinda ha litangua lia Paseka. Nkuma mutonda linga njimihumisile Muene ua Vayunda ndi?"

40 Vatambakanene cikuma na kumukumbulula nguavo, "Keti ou yala, vuno honi mbalambasa!" Honi mbalambasa uapuile muhuza.