1 Tele kanda ciuano ca Paseka cihete, Yesu uazivukile nguendi ntsimbu yendi yakuhuma ha mavu nakuya kuli Ishe inahete. Ha kuzanga vendi vaje vakele ha mavu, uavazangele nakumamanusuilo.

2 Kaha ha kulia ca cinguezi, liyavolo tele nakovela laja mu mutima ua Yundasa Sakaliote, muna Simoni, uje akamuenda vungungu, 3 Yesu ha kuzivuka nguendi Ishe namuhana vioshe mu mavoko endi, muomu uahumine kuli Njambi kaha naua ali nakuhiluka kuli Njambi, 4 uakatukile ku mesa, uashuluile cikovelo cendi cahelu, kaha ualikutile ntanga yendi mu mbunda. 5 Hanima yevi Yesu uetilile mema mu lilonga, nakuputuka kutanesa viliato via vandongisi vendi, kaha uavahundile na ntanga ije ya likutile mu mbunda. 6 Uezile kuli Simoni Petulu, kaha Petulu uahandekele nguendi, "Muene, nkuma ukatanesa viliato viange ndi?"

7 Yesu uamukumbuluile nguendi, "Vinjilina kulinga kumuvizivuka ha ntsimbu ino, vuno honi kulutue muka vizivuka."

8 Petulu uahandekele kuli ikeye nguendi, "Ku ukatanesaho viliato viange."

Yesu uamukumbuluile nguendi, "Nga kunjikutanesa, ku ukapu naua ndongisi uange."

9 Ambahoni Simoni Petulu uahandekele kuli ikeye nguendi, "Muene, keti utanese lika viliato viange vuno honi utanese na mavoko ange na mutue uange!"

10 Yesu uahandekele kuli ikeye nguendi, "Uoshe uje natana katela kutana naua, kuvanga lika ku viliato viendi, vuno honi muvila uendi una lele laja, kaha neni mualele, vuno honi keti muva voshe." 11 Muomu uazivukile uje akamuenda vungungu, ha cuma eci mukemo uahandekele nguendi, "Keti muva voshe munalele."

12 Omo Yesu uamanusuile kuvatanesa ku viliato viavo, kaha uambatele kazaku kendi nakuzala, uahilukile nakukatumama ku mesa, kaha uahandekele kuli vakevo nguendi, "Nkuma muazivuka vinjinalingi kuli yeni ndi?" 13 Mukanjitumbula ngueni, "Mulongisi na Muene, eyo mukahandeka muacili, muomu omu mukemo vene munjafua. 14 Nga yange vene Muene ueni na Mulongisi ueni, njamitanesa ku viliato vieni, neni naua munapande kulitanesa umo na mukuavo ku viliato vieni. 15 Muomu yange njamihana cimueso, linga neni mulinge munjinalingi kuli yeni. 16 Cilivene muavusunga njimileka nguange, ngamba kapulakana muene uendi, cipue kanganda kasa kupulakana uamutumine. 17 Nga muazivuka evi viuma, kaha mupua vakukuisula nga muvilinga.

18 "Kunjesi nakuhandeka muva voshe, njazivuka ava njinahangula. Vuno honi linga visoneka vilishulisise vije vihandeka nguavio, ‘Uje ualile mbolo yange lelo na njitengulukila.’ 19 Njimileka eci ha ntsimbu ino kanda vilingiue, ngeci omo vikalingiua linga mukatsiliele ngueni, ‘Yange vene ikeye.’ 20 Cilivene muavusunga njimileka nguange, uoshe uje atambula uje injituma natambula yange, kaha uoshe anjitambula atambula uje uanjitumine."

21 Hanima yakuhandeka evi, Yesu uakele na vusiua mu Cimbembesi, kaha uahandekele nguendi, "Cilivene muavusunga njimileka nguange, umo ueni akanjenda vungungu."

22 Vandongisi vendi valitalele umo na mukuavo, kuvazivukile uje yahandekele. 23 Umo ua vandongisi vendi uje yazangele cikuma Yesu, uajendamenene cikuma ha ntulo ya Yesu, 24 nankuma Simoni Petulu uayevetele kuli ikeye nguendi, "Muihule atuleke uje yali nakuhandeka."

25 Muomu uajendamenene cikuma kuli Yesu, uamuhuile nguendi, "Muene, nkuma iya honi?"

26 Yesu uamukumbuluile nguendi, "Uje vene injikahana eyi mbazuvuila ya mbolo hanima yakuitanta mu lilonga." Kaha omo naitanta, uaihanene Yundasa, muna Simoni Sakaliote. 27 Hanima yakutambula ije mbazuvuila ya mbolo, Satana uakovelele muli Yundasa. Kaha Yesu uahandekele kuli ikeye nguendi, "Linga vuasi vije viutonda kulinga." 28 Naumo uahi kuje ku mesa uazivukile vika Yesu uahandekelele evi kuli ikeye. 29 Vamo vasinganiekele nguavo, muomu Yundasa uapuile muka kuniunga cikuama ca vimbongo, Yesu uamulekele nguendi, "Landa vije vitondeka ha ciuano," cipue ahaneko vimo kuli vihutu.

30 Hanima ya kutambula mbazuvuila ya mbolo, hajevene uahumineho. Tele vutsiki.

31 Omo Yundasa uahumineho, Yesu uahandekele nguendi, "Vuavuno Muna Muntu vamuhana vumpau, kaha kuhitila muli ikeye naua na Njambi vaka muhana vumpau. 32 Nga Njambi vamuhana vumpau kuhitila muli ikeye, na Njambi naua akamuhana vumpau kuhitila muli ikeye vavenia, nakumuhana vumpau ha ntsimbu imo. 33 Vana vavandende, njili neni mu kantsimbu kakandende lika. Mukanjitonda, ngue muje munjahandekele ku vantuama va Vayunda mukemo naua njihandeka kuli yeni nguange, ‘Kunjilina kuya, kumukasa kuyako.’ 34 Njimihana lishiko lialiha: lizangeni umo na mukuavo. Ngue munjina mizangelamo, neni naua munapande kulizanga umo na mukuavo. 35 Hakulinga eci vantu voshe vakazivuka nguavo mu vandongisi vange, nga muli na cizango hali umo namukuavo."

36 Simoni Petulu uahandekele kuli ikeye nguendi, "Muene, kuli ulinakuya?" Yesu uamukumbuluile nguendi, "Oku njilinakuya kumuasa kunjikava ha ntsimbu ino, vuno honi mukanjikava munima."

37 Ambahoni Petulu uahandekele kuli ikeye nguendi, "Muene, nkuma vika kunjasela kukukava ha ntsimbu ino? Njikatula muono uange hali yove."

38 Yesu uakumbuluile nguendi, "Nkuma ukasa kutula muono uove hali yange ndi? Muavusunga vene njikuleka nguange, ntsimbu kanda ndemba atambeke ukanjiviana lutatu.