1 Yesu uahandekele nguendi, "Muavusunga vene njimileka yeni Vafaliseho nguange, uoshe uje akovelela ku cikolo ca limba lia vampanga napu kaniungi ua vusunga, vuno honi uje alikuasesa ngila yeka napu muizi cipue muhuza, 2 vuno honi uje akovelela ku cikolo napu kaniungi ka vampanga. 3 Muka kuniunga ku cikolo akamushokuelela cikolo, kaha vampanga vakevu lizi liendi. Akavasana vampanga vendi ha lizina naku vatuamenena mukutuhuka. 4 Omo nga natuhuisa voshe, akai kulutue luavo, kaha vampanga vaka mukavangeya muomu vazivuka lizi liendi. 5 Kuvekukava mungenzi, vuno honi vakamuteua muomu kuvazivuka lizi lia uje mungenzi."

6 Yesu ualikuasesele visimo evi kuli vakevo, vuno honi kuvevuisisile vije viakele nakuhandeka kuli vakevo.

7 Nankuma naua Yesu uahandekele kuli vakevo nguendi, "Muavusunga njimileka nguange, yange cikolo ca vampanga. 8 Voshe vaje vezile kulutue luange vapuile vezi na mihuza, vuno honi vampanga kuvevuililile kuli vakevo. 9 16 Yange cikolo, uoshe akovela kuhitila muli yange, akovoka, kaha akakovela nakutuhuka na kuuana muila uacili. 10 Muizi akeja lika mukuiva, na kutsiha na kupihisa, yange njezilile ngeci vakale na muono muvuingi.

11 "Yange kaniungi uacili. Kaniungi uacili akatsila vampanga vendi. 12 Uakukumuna uje keti kaniungi naua kakele na vampanga, omo amona kangunga kaha aseza vampanga na kuteua, kaha uje kangunga akuata vaje vampanga na kuvashandola. 13 Uje uakukumuna ateua muomu kazangele vaje vampanga. 14 Nji kaniungi uacili, njizivuka vampanga vange kaha naua navo vanjizivuka, 15 ngue muje Tate anjizivuka nange naua njizivuka Tate, kaha njitsila vampanga vange. 16 Kaha njilina vampanga veka, vaje keti va mulimba lino, njapande kuvaneha naua, kaha vakovuilila lizi liange. Nankuma vakapua vutanga vumo, na kaniungi umo.

17 "Mucifua eci vene Tate uanjizanga, muomu njihana muono uange, linga njikauambate naua. 18 Naumo uahi akauambata kuli yange, vuno honi njihana muono uange mukulihana. Njilina nzili yakama yaku utula, naua njilina nzili yakama yaku uambata, eci kushika njinacambata kuli Tate."

19 Kaha naua vantuama va Vayunda valihangunuine muomu ya mezi aua. 20 Vuingi vuavo vahandekele nguavo, "Ali na lihamba naua nazaluka, nkuma vika muli naku muvuililila?"

21 Vakuavo vakele nakuhandeka nguavo, "Aua keti mezi a muntu uje ali na lihamba. Nkuma lihamba asa kuimuisa kapuputua ndi?"

22 Yapuile ntsimbu ya cisika, tele ciuano ca Kukundika cakele ku cihela ca Yelusalema, 23 na Yesu uakele nakuenda mu vimbalaka via njivo ya Njambi, mu mbalanda ya Solomoni. 24 Kaha vantuama va Vayunda vamuzengelekele nakuhandeka kuli ikeye nguavo, "Nkuma vintsimbu vingahi ukatuseza mu citanga? Nga yove Kilistu tuleke vusunga."

25 Yesu uavakumbuluile nguendi, "Njamilekele vuno honi ku mutsiliela. Vipangi vije njikapanga mu lizina lia Tate, vihandeka vukaleho hali yange, 26 vuno honi kumuvitsiliela, muomu kumuakundamene ku vampanga vange. 27 Vampanga vange vakevu lizi liange, kaha njivazivuka naua vaka njikavangeya. 28 Njikavahana muono uayaye, naua kuvakanongo. Naumo uahi akavahumisa mu livoko liange. 29 Vije viananjihana Tate vinapu viakama kupulakana vioshe, kaha naumo uahi asa kuvihumisa mu livoko lia Tate. 30 Tate nange tunapu umolika."

31 Vantuama va Vayunda vambatele mavue linga vamuashe. 32 Yesu uavakumbuluile nguendi, "Njamipangela vipangi viacili viavingi viakuhuminina kuli Tate, hali vioshe evi njinalingi nkuma cilihoni cije munjashela mavue?"

33 Vantuama va Vayunda vamukumbuluile nguavo, "Keti nguavo ha vipangi viacili tukuashela mavue, vuno honi yove uli nakushaula Njambi, muomu yove u muntu lika vuno honi ulinakulipuisa ngue u Njambi."

34 Yesu uavakumbuluile nguendi, "Nkuma kuvacisonekele mu lishiko lieni nguavo, ‘Njahandekele nguange, mu vanjambi ndi?’ 35 Nga kuli vaje lizi lia Njambi liezile vavatumbuile nguavo ‘vanjambi’ (naumo uahi asa kuhaka kumukulo vije vivihandeka visoneka), 36 nkuma muhandeka ngueni uje Tate yanalelesa nakumutuma ha mavu alinakushaula Njambi muomu njahandekele nguange, ‘Nji Muna Njambi ndi?’ 37 Nga kunjesi nakupanga vipangi via Tate, kaha keti munjitsiliele, 38 vuno honi nga njilina kuvipanga, cipue vene kumunjitsiliela, tsilieleni vipangi, linga mukazivuke na kuvua ngueni Tate ali muli yange kaha nange naua njili muli Tate."

39 Kaha vesekele kumukuta vuno honi uapusunukile mu mavoko avo.

40 Kaha uahilukilile naua musinia lia ndonga ya Yundau ku cihela cije Yiuano uakele nakumbuitikila ha kulivanga, kaha uakakele kuje. 41 Vavengi vezile kuli ikeye nakuhandeka nguavo, "Yiuano kalingile vimueso vuno honi vioshe vije Yiuano uahandekele hali ou yala viapuile via vusunga." 42 Kaha vavengi vamutsilielele.