1 Cimene mene ha litangua lia calumingu tele kuacizivala, Maliya Mangandalena uayile ku cihilo, kaha uamuene livue vana lihumisa ku cihilo. 2 Kaha uashatukilile kuli Simoni Petulu na kuli ndongisi mukuavo uje yazangele Yesu cikuma, kaha uavalekele nguendi, "Muene uetu vana muhumisa mu cihilo kaha kutuzivuka oku vanamuhaka!"

3 Hajevene Petulu na uje ndongisi mukuavo vayile ku cihilo. 4 Kaha voshe vavali vakele nakushatuka hamo, vuno honi uje ndongisi mukuavo uashatukile cikuma kupulakana Petulu, kaha uapuile uakulivanga kuheta ku cihilo. 5 Uemanene na kutalezeka mu cihilo, kaha uamuene vintanga via liniu, vuno honi kakovelelemo. 6 Simoni Petulu uje uamukavele munima na ikeye uahetele, hajevene ikeye uakovelele mu cihilo uamuene lika vintanga via liniu vili ha mavu, 7 na ntanga ije yakele ku mutue ua Yesu kuyakele hamo na vintanga via liniu vuno honi ikeyo yakele kualikaliayo lika. 8 Kaha uje ndongisi mukuavo ualivangele kuheta ku cihilo, nendi naua uakovelelemo, kaha uamuene nakutsiliela. 9 Cipue ngocovene kuvovuisisile visoneka vije viahandekele nguavio Yesu napande kusanguka ku vatsi. 10 Kaha vaje vandongisi vahilukile ku membo avo.

11 Vuno honi Maliya uemanene ku cihilo nakulila kaha omo tele ali nakulila uakotamene nakutala mu cihilo, 12 uamuene tungelo vavali vanazala vuzalo via kutoka vanatumama kuje kuakele muvila ua Yesu, umo ku mitue mukuavo ku viliato. 13 Vahandekele kuli ikeye nguavo, "Mpuevo, nkuma vika ulinakulila?"

Kaha uahandekele kuli vakevo nguendi, "Vanambata Muene uange, kaha kunjizivuka oku vanamuhaka!"

14 Omo tele acili nakuhandeka vioshe evi, uatalele kunima kaha uamuene Yesu nemana kuje, vuno honi kazivukile nguendi Yesu. 15 Yesu uamuhuile nguendi, "Mpuevo, nkuma vika ulinakulila iya utonda?"

Maliya uasinganiekele nguendi ndimi, kaha uahandekele kuli ikeye nguendi, "Muene, indi yove unamuambata, njileke oku kunamuhaka, linga njikamuambateko."

16 Yesu uahandekele kuli ikeye nguendi, "Maliya!"

Kaha Maliya uatengulukile nakuhandeka nendi mu Cihevelu nguendi, "Lavoni!" (Kulumbununa Mulongisi)

17 Kaha Yesu uahandekele kuli ikeye nguendi, "Keti unjikuate omo kanda njilonde kuya kuli Tate. Vuno honi ya kuli vamuanetu ukavaleke nguove njilina kuhiluka kuli Tate ikeye uje ishueni, kuli Njambi yange ikeye uje Njambi yeni."

18 Maliya Mangandalena uayile nakuleka vandongisi nguendi, "Njinamono Muene." Kaha Maliya Mangandalena uavalekele nguendi Yesu ikeye nahandeka viuma evi kuli ikeye.

19 Omo capuile cinguezi ca litangua lia calumingu, vandongisi valikunguluilile hamolika mu njivo ije vikolo viapuile viakupata muomu vakele na liova lia kuteua vantuama va Vayunda, kaha Yesu uezile nakuimana navo nakuhandeka nguendi, "Ciyulo cikale neni." 20 Omo uamanusuile kuhandeka evi, uavamonesele mavoko endi mukati na helu, kaha vandongisi vendi vavuahelelele kumona Muene uavo. 21 Yesu uahandekele kuli vakevo naua nguendi, "Ciyulo cikale neni. Ngue muje muanjitumine Tate nange naua njimituma." 22 Omo uamanusuile kuhandeka evi, uavahuiminine nakuhandeka kuli vakevo nguendi, "Tambuleni Cimbembesi Uakulela. 23 Nga mukonekela vipi viavakueni, kaha vanavakonekela, nga kumuvakonekela, kaha kuva kavakonekela."

24 Vuno honi Tomasi (uje ivatumbuile nguavo mpasa), uje umo ua vaje likumi na vavali kakele hamo navo omo Yesu uezile. 25 Kaha vandongisi vakuavo va Yesu vamulekele nguavo, "Tuamono Muene."

Kaha ikeye uahandekele kuli vakevo nguendi, "Kunjitsiliela kuvanga njinamono muje muvamutuvile vimbambo nakukuatamo na munie uange, nakukuata na livoko liange kuje kuvamutuvile likunga."

26 Hanima ya sondo kaha vandongisi vendi naua vakele mu njivo, kaha Tomasi uakele hamo navo. Cikolo capuile cakupata, vuno honi Yesu uezile nakuimana hakati kavo nakuhandeka nguendi, "Ciyulo cikale neni." 27 Ambahoni uahandekele kuli Tomasi nguendi, "Kuata munie uove mu livoko liange, tala mavoko ange kaha humisa livoko liove nakulihaka ku vimpati viange linga keti ukale navimpata vuno honi utsiliele."

28 Tomasi uamukumbuluile nguendi, "Muene uange, na Njambi yange!"

29 Ambahoni Yesu uahandekele kuli ikeye nguendi, "Nkuma uatsiliela muomu uanjimono ndi? Vakukuisula vaje kuva njimuene vuno honi vanatsiliela."

30 Kaha Yesu ualingile vimueso viavingi ha mesho a vandongisi vendi, vije kuvasonekele mu livulu eli. 31 Vuno honi evi vanavisoneka linga mutsiliele ngeci Yesu ikeye Kilistu, Muna Njambi, kaha mukutsiliela mukakala na muono kuhitila mu lizina liendi.