1 Hanima yevi, Yesu uayile ku nganda ya Yelusalema ku ciuano ca Vayunda. 2 Kuje ku Yelusalema kuyehi na Cikolo ca Vampanga kuakele cisali cakele na mambalanda atanu, cije mu Cihevelu vacitumbula nguavo Mbetezasa. 3 Civunga cakama ca vaka mishongo ya vupuputua, vilema, na vaka kalepa vakosele kuje. 4 Muomu kangelo ua Muene ha ntsimbu yoshe uashulukilile muje mu cisali na kutupuisa mema. Kaha uoshe uje muka kuvavala alivanga kukovelamo, akanguka ku mushongo uendi. 5 Kuakele yala umo kuje uje uavavalele ha miaka makumi atatu na miaka itanu na itatu (38) 6 Omo Yesu uamumuene nakosa kuje nakuzivuka nguendi uje yala nakala kuje ntsimbu yalaha, uahandekele kuli ikeye nguendi, "Utonda kukanguka ndi?"

7 Uje yala uakuvavala uamukumbuluile nguendi, "Muene, kunjesi naumo uakunjikovelesa mu cisali omo mema atupuka, omo njeseka nguange njikovelemo, ueka naua alivangamo."

8 Yesu uahandekele kuli ikeye nguendi, "Katuka, ambata citala tala cove kaha enda." 9 Hajevene uje yala uakangukile, uambatele citala tala cendi nakuputuka kuenda.

Honi lije liapuile litangua lia Sapalalo. 10 Nankuma, Vayunda valekele uje yala ivakanguisile nguavo, "Lino linapu lia Sapalalo, eci cinapu kuluisa lishiko omo unambata citala tala cove."

11 Vuno honi uavakumbuluile nguendi, "Yala uje nanjikanguisa ikeye nanjileka nguendi, ‘Ambata citala tala cove, enda!’"

12 Vamuihuile nguavo, "Nkuma iya ou yala nakuleka nguendi, ‘Ambata citala tala cove kaha enda?’"

13 Honi uje yala kazivukile indi iya uamukanguisile, muomu Yesu uavombolokele mu civunga cije cakele kuje.

14 Hanima yevi, Yesu uamuuanene ali mu Njivo ya Njambi kaha uahandekele kuli ikeye nguendi, "Tala, unakanguka! Keti ukalinge vupi naua, kuteua viavipi vikalingiua kuli yove."

15 Ambahoni uje yala uayile nakuleka vaje vantuama va Vayunda nguendi Yesu ikeye uamukanguisile. 16 Nankuma, vaputukile kupakesa Yesu, muomu uakanguisile muntu ha litangua lia Sapalalo. 17 Vuno honi Yesu uavakumbuluile nguendi, "Tate alinakupanga ntsimbu yoshe, nange naua njilina kupanga."

18 Vihandeka evi vialingisile cikuma vantuama va Vayunda linga vamutsihe, muomu keti lika uapokuele lishiko lia ha litangua lia Sapalalo, vuno honi uahandekele naua nguendi Njambi ikeye Ishe, mu ngila eyi ualipuisile mumo na Njambi.

19 Yesu uahandekele kuli vakevo nguendi, "Muavusunga njimileka nguange: Muana kasa kupanga halikaliendi lika, vuno honi akalingi lika vije amona Ishe avilinga, muomu vije vioshe viakalingi Ishe, vikevio naua vialinga Muana. 20 Muomu Ishe uazanga Muana kaha amumuesa vioshe vije viakalingi, amumuesa vipangi viakama kupulakana evi, linga muka likomokele. 21 Ngue muje Ishe akasangula vatsi nakuvahana muono, mucifua cimo vene naua Muana akahana muono kuli vaje atonda. 22 Ishe kekusompa muntu uoshe vuno honi nahana cisompelo kuli Muana, 23 linga voshe vasingimike Muana ngue muvakasingimika Ishe. Uoshe uje kasingimika Muana kasingimika Ishe uje uamutumine.

24 "Muavusunga njimileka nguange, uoshe evua lizi liange na kutsiliela kuli uje uanjitumine alina muono uayaye, naua kuvakamusompo vuno honi nahumu ku kutsa nakovela ku muono.

25 "Muavusunga njimileka nguange, ntsimbu ilinakuija, naua inahete laja, omo vatsi vakevua lizi lia Muna Njambi, kaha voshe vaje valivua vakayoya. 26 Ngue muje Ishe uakala na muono muli ikeye vavenia, mukemo vene napuisa na Muana kukala na muono muli ikeye vavenia, 27 naua namuhana nzili yakama ya cisompelo, muomu ikeye napu Muna Muntu. 28 Keti mulikomokele hali eci, muomu ntsimbu ilinakuija omo voshe vaje vali mu vihilo vakevua lizi liendi 29 kaha vakahumamo, voshe vaje vapangele muacili vaka sangukila ku muono na vaje voshe vapangele vupi vaka sangukila ku cihiso.

30 "Kunjasa kulinga cimo mu nzili yange vavenia. Njikasompo lika muje muanjilekelamo Njambi, cisompelo cange naua capua lika ca vusunga, muomu kunjekulilingila cizango cange vuno honi cizango cauje uanjitumine.

31 "Nga njiliambulula yange vavenia, vukaleho vuange keti vua vusunga. 32 Kuali ueka uje akambulula vukaleho vuange, njazivuka nguange vukaleho vuje vua kambulula hali yange vukapua vua vusunga. 33 Muatumine tunganda kuli Yiuano, uavalekele vusunga. 34 Keti ngue vukaleho vunjitambula vuahumu ku muntu, vuno honi njilina kuhandeka evi viuma linga muovoke. 35 Yiuano uapuile ndeya yakushukuma na kutua ceke, neni muahanguile muka ntsimbu lika kuvuahelela mu ceke cendi. 36 Vuno honi yange njilina vukaleho vuakama kupulakana vukaleho vuje vuambuluile Yiuano. Muomu evi vikevio vipangi viananjihana Tate linga njivimanusule, vipangi evi vene vinjilina kulinga, vilina kuhandeka hali yange kumuesa ngue Tate ikeye nanjitumu. 37 Na Tate uje uanjitumine alinakuhandeka vukaleho hali yange. Kanda muvueho lizi liendi, cipue kumona cihanga cendi, 38 naua yeni kumuekuniunga mezi endi mu mitima yeni, muomu kumuatsilielele kuli uje yatumine. 39 Muli nakulilongesa visoneka muomu muyongola ngueni mu vikevio muuanamo muono uayaye, nkuma visoneka evi vene vikevio viambulula vukaleho vuange. 40 Vuno honi yeni muviana kuija kuli yange linga mukale na muono.

41 "Yange kunjitondo linga vantu vanjishangazale. 42 Vuno honi njazivuka nguange kumuesi na cizango ca Njambi muli yeni. 43 Njineja mu lizina lia Tate, vuno honi yeni kumuanjitambuile, nga ueka eja mu lizina liendi lika, muka mutambula. 44 Nkuma muasa kutsiliela vati? Yeni mukatambula vumpau kuli umo na mukuavo kuakuhona kutonda vumpau vuje vuhuminina kuli umo lika ikeye Njambi. 45 Keti muyongole ngueni njikamivangeya kuli Tate, Mosesa vene uje imuatsilielele ikeye akamivangeya. 46 Nga muatsilielele kuli Mosesa, nange naua ngue muanjitsiliela, muomu ikeye uasonekele viange. 47 Vuno honi nga kumutsiliela vije viasonekele, nkuma vatihoni mukatsiliela vinjihandeka?"