1 "Yange vushuka vua viniu vua vusunga, kaha Tate ikeye ndimi. 2 Ikeye akatete mintango muli yange ije kuyimi vushuka. Kaha muntango uoshe uje uima vushuka aunonga linga uime vushuka vua vuingi. 3 Vamilelesa laja na lizi lije njahandeka kuli yeni. 4 Kaleni muli yange ngue muje yange njakala muli yeni. Muomu muntango kuuasa kuima vushuka hali kaliauo vuno honi kuvanga ukale ha muti ua vushuka vua viniu, neni naua kuvanga mukale muli yange.

5 "Yange muti ua vushuka vua viniu, kaha yeni munapu mintango kaha vaje vakakala muli yange nange njikakala muli vakevo. Kaha vakema vushuka vua vuingi, muomu kuakuhona yange nacimo cahi muasa kulinga. 6 Uje uoshe kakala muli yange vaka mumbila ngue muntango kaha akoma, kaha mintango ya cifua eci vaka yihaka hamo nakuyumbila mu tuhia nakuitsimika. 7 Nga mukala muli yange, na mezi ange akala muli yeni, kaha mukalomba vioshe vimutonda, kaha vakamihanavio. 8 Mucifua eci, Tate vaka muhana vumpau cikuma omo nga mukema vushuka vua vuingi na kupua vandongisi vange. 9 Ngue muje muanjizanga Tate, nange vene njamizanga, kaleni mu cizango cange. 10 Nga muniunga mashiko ange, mukakala mu cizango cange ngue muje yange munjaniungila mashiko a Tate nakukala mu cizango cendi.

11 "Njahandeka viuma evi kuli yeni linga kuvuahelela cange cikale muli yeni, kaha kuvuahelela ceni cikapuemo. 12 Eli likelio lishiko liange, lizangeni umo na mukuavo ngue munja mizangela. 13 Naumo uahi alina cizango cakama ngue eci, cakutsila va vusamba vendi. 14 Muva vusamba vange nga mulinga vije vinjimishika. 15 Kunji kamisana vandungo naua, muomu vandungo kuvekuzivuka vije via kalingi Muene uavo, vuno honi njamisana vavusamba vange, muomu njamizivukisa vioshe vije vinjovuile kuli Tate. 16 Kumuanjihanguile vuno honi njamihanguile. Kaha njamihanguile ngeci mukeme vushuka, vushuka vuje kuvukahu, linga vioshe vije vimukalomba Tate mu lizina liange akamihanevio. 17 Njili nakumihana aua mashiko linga mukalizange umo na mukuavo.

18 "Nga vaka mavu vaka mizinda, muzivuke ngueni vazindile yange tele kanda vazinde yeni. 19 Nga muakundamene ku vaka mavu, ngue vaka mavu vaka mizanga ngue muvavo. Muomu kumuakundamene kuva ka mavu, vuno honi njamihangula kuhuma kuli vaka mavu, nankuma vaka mavu vamizinda. 20 Vulukeni lizi lije linjahandekele kuli yeni nguange, ‘Vandungo kuvasa kupulakana vimiene vavo.’ Nga vanjipakesele, kaha neni naua vaka mipakesa, nga vaniungile lizi liange, kaha neni naua vakaniunga mezi eni. 21 Vuno honi vakalinga vioshe evi kuli yeni muomu ya lizina liange, muomu kuvazivuka uje uanjitumine. 22 Nga kunjezile nakuhandeka kuli vakevo ngue kuvakele na vupi, vuno honi kuvesi nacimo cije casa kuvohiela ku vupi vuavo. 23 Uoshe uanjizinda, uazinda Tate naua. 24 Nga kunjalingile vipangi vije naumo uahi uavilinga hakati kavo, nga kuvesi na vupi, vuno honi vanavimono, kaha vananjizindi nakuzinda Tate. 25 Capuile kushulisisa lizi lije livasoneka mu lishiko liavo nguavo, ‘Vanjizindile kuakuhona mulonga.’

26 "Vuno honi omo Mukuasi akeja, uje injikatuma kuli yeni kuhuminina kuli Tate, cipue Cimbembesi ua vusunga uje akahuminina kuli Tate, akahandeka vukaleho vuange. 27 Neni naua mukahana vukaleho muomu munakala nange hume hambangelo.