1 Tele Yesu alinakuenda, uamuene yala uje ua semukile vupuputua. 2 Vandongisi vendi vamuihuile nguavo, "Mulongisi, nkuma iya ualingile vupi, ou yala indi visemi vendi, linga asemuke vupuputua?"

3 Yesu uavakumbuluile nguendi, "Voshe kuvalingile vupi, uasemukile vupuputua linga vipangi via Njambi visholoke muli ikeye. 4 Tuapande kupanga vipangi viendi uje uanjitumine tuyeni tupange ntsimbu kucili mutania, omo vutsiki vukeja tukahona kupanga. 5 Ntsimbu njicili ha mavu, njinapu ceke ca vaka mavu."

6 Omo Yesu uamanusuile kuhandeka evi, uajekuililile ha mavu kaha uambatele livu naku lipandakana na malenzi naku ahaka ha mesho a uje yala, 7 nakuhandeka kuli ikeye nguendi, "Ya, ukatane ku mesho ove mu cisali ca Siloame" (Siloame ilumbunuka Vanamutumu) Kaha uayile nakutana omo uahilukile uaputukile kumona.

8 Vandambo vendi na vaje vamumuene laja tele acili muka kulomba vukuasi, vaputukile kuihula nguavo, "Ou keti ikeye uje yala uakele nakutumama na kulomba vukuasi ndi?"

9 Vamo vaputukile kuhandeka nguavo, "Ikeye vene." Vamo vahandekele nguavo, "houe, vuno honi muntu lika ueka uakulifua nendi."

Kaha ikeye uahandekele nguendi, "Yange vene uje yala."

10 Vuno honi vatualeleleho kumuihula nguavo, "Nkuma mesho ove anemuka vati?"

11 Uavakumbuluile nguendi, "Yala ivatumbula nguavo Yesu uambatele livu nakunjihaka ha mesho, nakuhandeka kuli yange nguendi, ‘Ya ku Siloame ukatane.’ Kaha njaile nakutana mukemo njaputukile kumona."

12 Vahandekele kuli ikeye nguavo, "Nkuma ali kuli honi?"

Uahandekele nguendi, "Kunjizivuka."

13 Vanehele uje yala uapuile kapuputua kuli Vafaliseho. 14 Liapuile litangua lia Sapalalo lije omo Yesu uemuisile uje yala. 15 Kaha Vafaliseho naua vaputukile kumuihula nguavo, cineja vati linga umone. Uahandekele kuli vakevo nguendi, "Uanjihakele livu ha mesho ange. Kaha njataneneko, mukemo njili nakumona."

16 Vamo va Vafaliseho vahandekele nguavo, "Ou yala kahumu kuli Njambi, muomu kekuniunga litangua lia Sapalalo."

Vuno honi vakuavo vahandekele nguavo, "Muka vupi asa vati kulinga vimueso evi?" Kaha vali hangunuine hakati kavo.

17 Nankuma Vafaliseho vahandekele naua kuli uje kapuputua nguavo, "Uhandekaho vika hali ikeye? Mesho ove akeo anemuisile."

Uahandekele nguendi, "Ikeye Kananguizi."

18 Vakuluntu va Vayunda kuvatsilielele nguavo uapuile kapuputua kaha ali nakumona naua, kuvanga noho vasanene visemi va uje yala ivemuisile 19 nakuvehula nguavo, "Nkuma ou ikeye vene muneni, uje imuahandekele ngueni nasemuka vupuputua ndi? Cija vatihoni linga amone?"

20 Visemi vendi vakumbuluile nguavo, "Tuazivuka vene nguetu ou ikeye munetu, naua ikeye vene uje uasemukile vupuputua, 21 vuno honi kutuazivukile cije canehesa linga amone, kaha kutuazivukile naua nauje nemuisa mesho endi. Muihuleni, mukuluntu alihandekela ikeye vavenia." 22 Visemi vendi vahandekele eci muomu vateuele vantuama va Vayunda vaje valitavasanene nguavo uoshe ahandeka nguendi Yesu ikeye Kilistu vaka musheka mu njivo ya malombelo. 23 Nankuma visemi vendi vahandekele nguavo, "Nakolo, muihuleni."

24 Nankuma vasanene uje yala uapuile kapuputua lua mucivali, kaha vahandekele kuli ikeye nguavo, "Hana vumpau kuli Njambi, handeka vusunga! Tuazivuka nguetu ou yala napu muka vupi."

25 Uakumbuluile nguendi, "Kunjizivuka indi muka vupi indi houe. Cuma cimo cinjizivuka lika nguange njapuile njikapuputua, vuno honi hano njimona."

26 Vahandekele kuli ikeye nguavo, "Vika nalingile kuli yove? Nkuma nakuimuisa vati?"

27 Uavakumbuluile nguendi, "Njamilekesa laja, vuno honi ku muanjivuilile. Vika mutondela naua kucivua? Nkuma neni naua mutonda kupua vandongisi vendi ndi?"

28 Kaha vaputukile kumutuka nakuhandeka nguavo, "Yove ndongisi uendi, vuno honi yetu tuvandongisi va Mosesa. 29 Tuazivuka nguetu Njambi uahandekele kuli Mosesa, vuno honi hali ou yala, kutuazivukile kuje kuahuma."

30 Uje yala uakumbuluile nguendi, "Eci cinapu cuma cakukomouesa! Kumuazivukile kuje ahuminina, vuno honi nemuisa mesho ange. 31 Tuazivuka nguetu Njambi kekuivuilila ku vaka vipi, vuno honi akevuilila kuli uje muka kumulemesa na uje muka kuononoka cizango cendi. 32 Hume havatangelele mavu, naumo uahi uevua muntu uje emuisa muntu uasemukile vupuputua. 33 Nga ou yala kahumine kuli Njambi, ngue nevi viali nakulinga vene viahi."

34 Vamukumbuluile nguavo, "Yove uasemukililile mu vupi, nkuma utonda kutulongesa ndi?" Kaha vamushekele mu njivo ya malombelo.

35 Yesu uevuile nguavo vanamusheke, kaha omo uamuuanene, uahandekele nguendi, "Nkuma uatsiliela muli Muna Muntu ndi?"

36 Uamukumbuluile nguendi, "Nkuma napu iya, Muene? Njileke, linga njimutsiliele."

37 Yesu uahandekele kuli ikeye nguendi, "Uamumono, kaha ikeye vene ou ali nakuhandeka kuli yove."

38 Uje yala uahandekele nguendi, "Muene, njitsiliela." Kaha uamulemesele.

39 Yesu uahandekele nguendi, "Njezile hano ha mavu mu kusompa linga vaje kuvamono linga vamone, naua navaje vamona linga keti vamone."

40 Vamo va Vafaliseho vaje vakele hayehi nendi vovuile eci vahandekele kuli ikeye nguavo, "Nkuma cili vene netu naua tutupuputua ndi?"

41 Yesu uahandekele kuli vakevo nguendi, "Nga muapuile tupuputua, ngue kumuesi na vupi. Vuno honi muhandeka ngueni, ‘Tumona,’ vupi vueni hanga vuakala."