1 Honi omo Muene uazivukile nguendi Vafaliseho vanovu nguavo Yesu alinakunganiala nakumbuitika vandongisi vavengi kupulakana Yiuano 2 (cipuevene nguavo keti Yesu uje uakele nakumbuitika vuno honi vandongisi vendi vacilingile) 3 Omo Yesu uevuile vije vivakele nakuhandeka, kaha uahumine ku Yundeya nakuhiluka ku Ngalileya. 4 Vuno honi mu vungenzi vuendi vuakuya kuje uahitile mu Samaliya.

5 Nankuma, mu Samaliya uahetele ku nganda ivatumbuile Sikali, muyehi na lihia lije Yakomba uahanene kuli munendi Yosefa. 6 Lisima lia Yakomba liakele kuje, Yesu uatumamene kuyehi na lisima muomu uahonene cikuma kuenda. Ntsimbu yapuile litangua tele lili hakati ka mutue.

7 Mpuevo ua Kasamaliya uezile nakutekula mema, kaha Yesu uahandekele kuli ikeye nguendi, "Njihaneko mema njinue." 8 (Eci calingiuile tele vandongisi vendi vaile mu nganda nakulanda via kulia)

9 Uje mpuevo ua Kasamaliya uamukumbuluile nguendi, "Nkuma cija vatihoni yove Kayunda ulombe mema akunua kuli mpuevo ua Kasamaliya?" (Muomu Vayunda kuvekulitambosona viuma hamolika na vaka Samaliya)

10 Yesu uamukumbuluile nguendi, "Nga uazivukile vuana vuje Njambi vualinavuo hali yove, nou ali nakuhandeka kuli yove nguendi, ‘Njihaneko mema akunua,’ ngue unamulombo, kaha ngue nakuhana mema a muono."

11 Uje mpuevo uahandekele kuli ikeye nguendi, "Muene, kuuesi na cuma cakutekuisa mema, na lisima lialovo. Kulihoni ukauana mema a muono? 12 Nkuma yove u uakama kupulakana kuku yetu Yakomba, uje uatuhanene lisima eli, nakunuinamo ikeye vavenia na vana vendi na vimuna vendi vaje vanuinininemo ndi?"

13 Yesu uamukumbuluile nguendi, "Uoshe anua ku mema aua akevua naua mpuila, 14 vuno honi uoshe akanua ku mema aje anjikamuhana kakevu naua mpuila. Mema aje anjikamuhana akapua lisima lia livuelu vuelu muli ikeye lije likamuhana mema a muono na kumuhana muono uayaye."

15 Uje mpuevo uahandekele kuli ikeye nguendi, "Muene, njihaneko ouo mema, linga keti njikovueho naua mpuila cipue keti njikeje eje naua kuno nakutekula mema."

16 Yesu uahandekele kuli ikeye nguendi, "Ya ukasane yala liove, kaha uhiluke kuno."

17 Uje mpuevo uamukumbuluile nguendi, "Kunjesi na yala." Yesu uahandekele kuli ikeye nguendi, "Unahandeka muacili omo unahandeka nguove, ‘Kuuesi na yala’, 18 muomu unashomboka ku vamala vatanu, honi ou yuli nendi hano keti yaliove. Viunahandeka via vusunga!"

19 Uje mpuevo uahandekele kuli ikeye nguendi, "Muene, njamono nguange u kananguizi. 20 Vakukuluila vetu valemeselele ha munkinda ou, vuno honi yeni muhandeka ngueni cihela cije vantu vanapande lika kulemeselani mu Yelusalema."

21 Yesu uahandekele kuli ikeye nguendi, "Ove mpuevo, njitsiliele, ntsimbu ilinakuija omo kumukalemesela Tate ha munkinda ou cipue mu Yelusalema. 22 Yeni vaka Samaliya mukalemesa uje kumuzivuka, vuno honi yetu tukalemesa uje ituzivuka, muomu kuovoka cahuma kuli Vayunda. 23 Vuno honi ntsimbu ilinakuija, naua inahete laja, omo vaka kulemesa va vusunga vakalemesa Tate mu Cimbembesi na mu vusunga, muomu Tate uatonda vantu ava kumulemesa. 24 Njambi ikeye vene Cimbembesi, na voshe vaje vamulemesa vanapande kulemesa mu Cimbembesi na mu vusunga."

25 Uje mpuevo uahandekele kuli ikeye nguendi, "Njazivuka nguange Mesiya ali nakuija" (uje ivatumbula Kilistu) "Omo akeja, akatulumbunuina viuma vioshe."

26 Ambahoni Yesu uamukumbuluile nguendi, "Yange vene ikeye, uje ali nakuhandeka nove."

27 Hajevene vandongisi va Yesu vezile. Valikomokelele cikuma hakuuana Yesu ali nakuhandeka na mpuevo, vuno honi naumo uahi uahandekele kuli ikeye nguendi, "Uli nakutonda vika?" Cipue kuihula Yesu nguavo, "Nkuma vika uli nakuhandekela nendi?"

28 Ambahoni uje mpuevo uasezele njava yendi nakuhiluka ku nganda. Uakalekele vantu kuje nguendi, 29 "Ijeni mukamone yala uje nanjileka viuma vioshe vinjalingile! Nkuma ou asa kupua Kilistu ndi?" 30 Kaha vahumine mu nganda nakuya kuli Yesu.

31 Tele vandongisi vakele nakumulambelela nguavo, "Mulongisi, liako viakulia."

32 Vuno honi uahandekele kuli vakevo nguendi, "Njilina viakulia vije kumuzivuka."

33 Nankuma, vandongisi vaputukile kulihula umo na mukuavo nguavo, "Nkuma kuli umo namunehela viakulia ndi?"

34 Yesu uahandekele kuli vakevo nguendi, "Viakulia viange vinapu kupanga cizango cendi uje uanjitumine nakumanesa cipangi cendi. 35 Nkuma kumue kuhandeka ngueni, ‘Kuasala lika vingonde viuana, kaha tukateja ndi?’ Vuno honi njimileka nguange, taleseseni muacili, taleni muje vimbuto muvinahilamo linga vaviteje. 36 Muka kuteja natambula laja fueto yendi, naua ali nakukungulula vushuka vua muono uayaye, linga muka kukuna na muka kuteja voshe vavuahelele hamolika. 37 Nankuma, lizi eli liapua lia vusunga ngualio, ‘Umo akuna kaha mukuavo akateja.’ 38 Njinakutumu kuteja vije kuuapangele. Vakueni vapangele, kaha yove unauanenamo vimo ha vipangi viavo."

39 Vaka Samaliya vavengi vamu nganda ije vatsilielele kuli Yesu muomu uje mpuevo uahandekele nguendi, "Nanjileka viuma vioshe vinjalingile." 40 Nankuma, omo vaka Samaliya vezile kuli ikeye, vamulombele linga akale navo, kaha Yesu uakele kuje matangua avali.

41 Vavengi vatsilielele kuli ikeye muomu ya mezi endi. 42 Vantu valekele uje mpuevo nguavo, "Keti nguove muomu ya viuma vi unahandeka vikevio viatunehesa linga tutsiliele, vuno honi tualiuvuila yetu vavenia, tuazivuka nguetu ou muavusunga vene ikeye Muyoyesi ua vaka mavu."

43 Omo Yesu uakele kuje matangua avali, kaha uahumineko uayile ku nganda ya Ngalileya 44 (muomu ikeye vavenia uahandekele nguendi naumo uahi kananguizi ivasingimika mu cifuti cendi) 45 Omo uahetele mu nganda ya Ngalileya, vaka Ngalileya vamutambuile muacili, muomu vakamuene vioshe vije vialingile mu Yelusalema ku ciuano ca Paseka, muomu navakevo vaile ku ciuano.

46 Ambahoni Yesu uahilukile ku Kana mu nganda ya Ngalileya, kuje uatenguluile mema kupua viniu. Kuje kuakele mukuluntu ua vaka kusuana uakele na munendi ua yala uje uakele na kuvavala mu Kapenauma. 47 Omo uevuile ngeci Yesu nahumu ku Yundeya neja ku nganda ya Ngalileya, uayile kuli ikeye nakumulomba ngeci eje ku Kapenauma nakukanguisa munendi, uje uatondele kutsa. 48 Kaha Yesu uahandekele kuli ikeye nguendi, "Naumo uahi hakati keni atsiliela kuvanga mumone vimueso na vikomoueso."

49 Uje mukuluntu uahandekele nguendi, "Muene tuye mumo ntsimbu kanda munange atse."

50 Yesu uahandekele kuli ikeye nguendi, "Ya, munove akayoya!"

Uje yala uatsilielele mezi a Yesu, kaha uayile. 51 Omo uakele nakuya kuimbo, ualiuanene na vangamba vendi vaje vamulekele nguavo munove ali nakuyoya.

52 Nankuma, uavehuile ntsimbu muka munendi uayoyele, kaha vamukumbuluile nguavo, "Izau tele mutania, lisika sika lia muhumine." 53 Ishe uavulukile ngeci ikeyo ntsimbu ije Yesu uamulekele nguendi, "Munove akayoya." Nankuma, ikeye hamo na ntanga yendi voshe vatsilielele muli Yesu.

54 Eci cikeco cimueso ca mucivali cije ca lingile Yesu omo uahumine ku Yundeya kuija ku Ngalileya.