1 Kuakele yala uje uakele nakuvavala ua lizina lia Lazalu uaku Mbetaniya, kuimbo lia Maliya na munaina Mata. 2 Ou ikeye Maliya uje uavuavesele Muene na mazi akunika aseho nakumuhunda ku viliato na vinkambu viendi, ikeye uje munaina Lazalu uje uakele nakuvavala. 3 Nankuma vamunaina vatumine mezi kuli Yesu nguavo, "Muene, uje kavusamba kove iuazanga ali nakuvavala."

4 Omo Yesu uacivuile uahandekele nguendi, "Eci kuvavala keti ca kutsa, vuno honi cinapu ca vumpau vua Njambi, linga Muna Njambi vamujundule kuhitila muli cikeco."

5 Honi Yesu uazangele Mata na Maliya hamo na Lazalu. 6 Omo uevuile nguavo Lazalu ali nakuvavala, uatumameneko naua matangua avali kuje kuakele. 7 Ambahoni hanima yakuvua ou muzimbu uahandekele kuli vandongisi vendi nguendi, "Tuyeni ku nganda ya Yundeya naua."

8 Vandongisi vendi vahandekele kuli ikeye nguavo, "Mulongisi, vantuama va Vayunda vatondele kukuasha mavue, nkuma uciyako naua ndi?"

9 Yesu uavakumbuluile nguendi, "Nkuma keti vintsimbu likumi na vivali vije viakala mu litangua ndi? Vaje vakakuenda mutania, kuvekutsuntsuka muomu ceke ca ha mavu cikavatuila. 10 Vuno honi vaje vakakuenda vutsiki vakatsuntsuka, muomu ceke kucesi muli vakevo." 11 Munima yakuhandeka eci, uavalekele nguendi, "Kavusamba ketu Lazalu nakosa tulo, vuno honi njiya naku muhindula mutulo."

12 Vandongisi vendi vahandekele kuli ikeye nguavo, "Muene, nga nakosa tulo, kaha akakala lika muacili."

13 Yesu uahandekele kutsa ca Lazalu, vuno honi vakevo vasinganiekele nguavo nahandeka nguendi nakosa tulo lika. 14 Ambahoni Yesu uavalekele vusunga nguendi, "Lazalu natsi. 15 Muomu yeni njavuahelela ngeci kunjakeleko, linga mutsiliele. Vuno honi tuyeni kuli ikeye."

16 Tomasi, ivatumbuile nguavo Mpasa, uahandekele kuli vandongisi vakuavo nguendi, "Netu tuyeni, linga tukatse nendi."

17 Omo Yesu uahetele, uauanene Lazalu tele ali na matangua auana mu cihilo. 18 Mbetaniya yapuile kuyehi na nganda ya Yelusalema ntunda ya makilomita atatu lika, 19 kaha vuingi vua Vayunda vezile kuli Mata na Maliya mukuva simpisa muomu hakutsa ca munaina Lazalu.

20 Omo Mata uevuile nguavo Yesu ali nakuija, uamusheshele, tele Maliya ali mu njivo. 21 Mata uahandekele kuli Yesu nguendi, "Muene, nga unakele kuno, muanetu ngue katsile. 22 Vuno honi cipue ntsimbu ino njazivuka nguange vioshe ulomba kuli Njambi, akakuhanavio."

23 Yesu uahandekele kuli ikeye nguendi, "Muanoko akahinduka naua."

24 Mata uahandekele kuli ikeye nguendi, "Njazivuka vene nguange akahinduka ha ntsimbu ya kusanguka ha litangua lia mamanusuilo."

25 Yesu uahandekele kuli ikeye nguendi, "Yange kusanguka na muono, voshe vaje vatsiliela muli yange, cipue vakatsa, vakayoya naua, 26 kaha uoshe ayoya nakutsiliela muli yange kakatsiho. Nkuma utsiliela eci ndi?"

27 Uahandekele kuli ikeye nguendi, "Eyo, Muene, Njatsiliela nguange yove Kilistu Muna Njambi, uje akeja hano ha mavu."

28 Munima yakuhandeka evi, Mata uayile nakusana munaina Maliya, uamusanene kuali kaliendi na kumulekesa nguendi, "Mulongisi uno alikuno, ali nakukusana." 29 Kaha omo Maliya uacivuile, uakatukile vuasi vuasi nakuya kuli Yesu. 30 Honi Yesu tele kanda ahete hembo, vuno honi uakele ku cihela kuje kualiuanene na Mata. 31 Omo Vayunda vaje vakele nendi mu njivo nakumusimpisa, vamuene Maliya akatuka vuasi vuasi nakuya hambanza, vamukavele muomu vasinganiekele nguavo alinakuya ku cihilo naku kalililako.

32 Omo Maliya uahetele kuje kuakele Yesu, kaha omo uamumuene uauililile ku viliato viendi nakuhandeka nguendi, "Muene, nga unakele kuno ngue muanetu katsile."

33 Omo Yesu uamumuene alinakulila, na vaje Vayunda vezile navo na vakevo vakele nakulila, uakele na vusiua cikuma mu Cimbembesi. 34 Kaha uahandekele nguendi, "Nkuma mua mutsindi kuli?"

Vahandekele kuli ikeye nguavo, "Muene, ija umone."

35 Yesu ualilile. 36 Kaha Vayunda vahandekele nguavo, "Haaa! Taleni mua muzangelelemo!"

37 Vuno honi vamo vavo vahandekele nguavo, "Nkuma ou keti ikeye uje uemuisile uje yala uakapuputua ndi, vikahoni kalingililile ou yala linga keti atse?"

38 Kaha Yesu naua uakele na vusiua cikuma, kaha uayile ku cihilo. Capuile cihilo cakucokola mu livue, kuakele livue ku cikolo ca cihilo. 39 Yesu uahandekele nguendi, "Humiseniko eli livue."

Mata munaina ya uje yala uatsile, uahandekele kuli ikeye nguendi, "Muene, ntsimbu ino alinakunika, muomu ali na matangua auana mu cihilo."

40 Yesu uahandekele kuli ikeye nguendi, "Nkuma kunjakulekele nguange nga uatsiliela ukamona vumpau vua Njambi ndi?" 41 Kaha vahumisileko livue. Kaha Yesu uandukile nakuhandeka nguendi, "Tate, njatsantselako ha kunjivua. 42 Njazivuka nguange ukanjivu ntsimbu yoshe, vuno honi njahandeka evi ha mesho a vantu ava vanemana hano, linga vatsiliele ngeci yove uanjitumine." 43 Hanima yakuhandeka evi, uatambakanene nguendi, "Lazalu, humamo!" 44 Uje uatsile uahindukile, oku mavoko na mikono yendi yakukuta na vintanga, na cihanga cendi vacizengele na ntanga. Yesu uahandekele kuli vakevo nguendi, "Muzituleni, kaha mueceleni aye."

45 Vuingi vua Vayunda vaje vezile na Maliya omo vamuene vije vialingile Yesu, vatsilielele muli ikeye, 46 vuno honi vamo vayile kuli Vafaliseho nakuvalekesa vialingile Yesu. 47 Nankuma vakuluntu va vasasendote na Vafaliseho valiuanene na vaka mpunga nakuhandeka nguavo, "Nkuma vika vitunapande kulinga? Muomu ou yala alinakulinga vimueso viavingi. 48 Nga tumuecelela muje vene, kaha muntu uoshe akatsiliela muli ikeye, kaha Valoma vakeja naku pihisa njivo ya Njambi na cifuti cetu."

49 Vuno honi umo uavo, Kayafase, uje uapuile kasasendote uakama ha muaka uje, uahandekele kuli vakevo nguendi, "Navimo viahi vimuzivuka! 50 Kumuevuile nguavo cacili muntu umolika kutsila vantu, kupulakana cifuti coshe kunonga." 51 Kahandekele eci mu nzili yendi lika, vuno honi hakupuako kasasendote uakama ha muaka uje, uahandekele vunanguizi nguendi Yesu napande kutsila vantu, 52 kaha keti vantu lika vuno honi kukungulula vana va Njambi na vaje valishandokela ku mafuti eka.

53 Kuhuma ha litangua lije vatondele ngila ya kumutsihilamo. 54 Nankuma Yesu kalisholuele citona mesho naua kuli Vayunda, vuno honi uahumine kuje nakuya ku nganda ije ivatumbuile Efalime ku mutambela uje uakele kuyehi namu mpambo, kaha uakakele kuje na vandongisi vendi.

55 Tele Ciuano ca Paseka ya Vayunda cakele muyehi, vavengi vahumine mu cifuti nakuya ku Yelusalema ntsimbu kanda Paseka ihete nakulilelesa vakevo vavenia. 56 Vakele nakutonda Yesu kaha vakele naku lihozola umo na mukuavo oku tele vali mu vimbalaka via njivo ya Njambi nguavo, "Musinganieka vika? Nkuma cilivene keja kuno ku ciuano ndi?" 57 Honi vakuluntu va vasasendote na Vafaliseho vashikile nguavo uoshe uje azivuka kuje kuali Yesu avaleke, ngeci vamukuate.