Pensamentos

8 Kwa kuhyomolela, walongo wa nenga, muviki mawachilo gha mwenga kumighalu hyogha yenikuwela gha chakaka na yeni kutundamilisa na yeni kupalwa na Sapanga na maha na gha kuhekelesa na hyogha yeni kuwayeghela sifwa gha maha.

2 Mkotoho kughola handa waigholile wandu wa mlima wogha hau, ila mumlekeseli Sapanga awawesesi kughalambula vila mnguliwachila, ndiwa mtewesa kumanya na kughola mighalu aipalile Sapanga kuhuma kwa mwenga.

Ngalilu gha mhaghulwa kwaikiva gha Sapanga

13 Kwa nagha, myandali mawachilo gha mwenga kwa lihengu na mlikali kutali na lumatamata lula lumhekelesa ng’ogha Sapanga na mviki litumaini lya mwenga wogha kumanemu ghala mteyapokela lipindi Yesu Kilisito paatehighiliswa.

20 Sapanga anguwesa kughola mighalu mikulunga kupiti vila tunguluwa na kuliwachila, kupitila makakala ghaki yeni kughola mahengu mghati gha twenga. 21 Tungupala wandu wogha wa Sapanga wamanyi yiwa Sapanga kamkulu, na kila mweni kumkwinila Kilisito amuyinuli mweni machuwa hyogha bila mwihu! Hina.

12 Kwaikiva lilando lya Sapanga ni lyeni ukomu na makakala, ni likalipa kupiti lipanga lila lyeni kudumula mbandi ivili haku na haku, linguyingila hata kuwesa kulekanisa moyu na mpumulo na hata vikongonu na uloto wa kumihupa. Hilahila lingumanya lukani na mawachilo gha mundu.

20 Akayendelela kulonga, "Kihumilile mghati gha mundu ndiwa, kingumghola akotoho kudahilwa na Sapanga.

21 Kwa ikiva, mmoyu mwa mundu huhuma mawachilo mahakata na ungongola na uwihi na kukomana, 22 Ughoni na umwimi na uhakata na uhwangi na lumatamata na wifu na malighu na ukwinakwina na usihisihi. 23 Mahakata hagha hyogha yahumila mghati gha mundu, na yeni yangumghola mundu akotoho kudahilwa kuulongolo gha Sapanga."

25 Kwa nagha, ninguwalongela yiwa mkotoho kughasikila ngalilu gha mwenga, yiwa mtelyegha niki au kunywegha niki, au mtevala niki, ghuli, ngalilu ni gha kughasikilwa ng’ogha kupiti mulyo, na mhigha wa kughasikilwa kupiti nguu?

7 Mwenga pamyupa, mkotoho kulongela milando yenikuwela ng’ogha gha maha handa wandu wammanya ng’ogha Sapanga. Weni wanguliwachila yiwa wateyughanilwa kwaikiva gha milando itangala wailonga.

Yesu akalipila milando gha mbindingu

1 Lipindi wandu watangala nesu pawawelili walikungulili hata watimbanganili, Yesu akatumbula kuwalongela wavulwa ghaki, "Mjilole na simika gha Mafalisayo, twenga tukema umbindingu." 2 Kyokyose kigubikilwi kitegubutuliwa, kila kihighilwi kiteghalambuliwa. 3 Kwa nagha milando hyogha muitangasile kulwisa wandu watehyoghanila pamuhi mhana. Hilahila milando hyogha muipepwa mghati mwa kyumba na milyango itatilwi, yatelongelwa kunani gha lighuta.

Yula mungupalwa kumtila

4 "Ninguwalongela mwenga waghanja ghangu, Mkotoho kuwatila wala wakoma higha, wawesang’ogha kughola kindu ghangi kangi wakomela baha hela." 5 Nitewalangiha yula avile mngupalwa kuwela na holu kwa mweni, Mumtili yula avile badili gha kukoma kana ulongosi wa kumdanga mundu kulyoto lya kumambi. Hina, ninguwalongela mumtili hayu.

6 "Ingumanyika mbongu wawakema Shomolo waitano wanung’una, wanguhemelwa kwa mapesa mayaghani ikumi hela au ng’ogha? Ila kuulongolo kwa Sapanga hamuisemwi hata mmonga wa weni." 7 Kangi hata hwila gha mutu wa mwenga uvalangilwi wogha. Mkotoho kuwela na holu, hinu mwenga mngupalwa nesu kupiti shomolo watangala.

Kumkwinila au kumkanila Kilisito

8 "Ninguwalongela unagha, kila mundu anikwinila kuulongolo gha wandu, Mwana wa Mundu na mweni atelongela kuulongolo gha watumikila wa kundumba wa Sapanga yiwa mundu hayu ni mvulwa ghangu." 9 Ila mundu yeyose anikanili kuulongolo gha wandu, na mweni Mwana wa Mundu atemkanila kuulongolo gha watumikila wa kundumba wa Sapanga.

10 "Yeyose angulongela lilando lya kumkingama Mwana wa Mundu atemlekesela mahakata, ila yula amlighu Mpumulo wa Sapanga hayu Sapanga atemlekesela ng’ogha mahakata."

11 "Lipindi pawawakola na kuwayegha mwenga kuutoso kulighuta lya kukonganika Wayahudi kuulongolo gha walongosa na gha wakulu, mkotoho kuwela na holu kwa milando mtelitetela au ghala mteyanga, 12 kwaikiva Mpumulo wa Sapanga lipindi hali atewavula milando mngupalwa kulonga."

Mlandano wa mundu avile na hindu msihisihi

13 Hinu mundu mmonga kulila lipinga lya wandu akamlongela, "Mvula, umlongele mlongo ghangu tupeghani kila mmonga na ghaki ulihi atulekesilili tati."

14 Yesu akamuyanga, "Ghanja ni ghani anivikili nenga kuwoneka mtosa au mpatanisi wa kuwapegha wogha paghati mwa mwenga?" 15 Kangi Yesu akawalongela wandu wogha, "Mulole, mjikingami na lumatamata lwogha lwa hindu kwa ukomu, kwaikiva hindu iwesa ng’ogha kugholokela ukomu wa mundu, hata akavile kana hindu nesu."

16 Kuulongolo akawalongela mulandano hau, "Kuwelili na mundu mmonga mnahisa hayu litawa lyaki liwesa kulela mabeno yatangala. 17 Mundu yula awelili na hindu akaliwachila mumoyu ghaki, ‘Niteghola kyani na nenga nahela mahala ghangi pakuvika mabeno ghangu.’ 18 Akajilongela, ‘Niteghola nagha,’ ‘Nitebomola ngoko ghangu na kuchenga ngulu nesu, na nenga nitevika mula ngano ghangu hyogha na hindu ghangu.’ 19 Hinu nitewesa kuilongela mpumulo ghangu, ‘Hinaa uvile na mabeno yatangala na uvile na ngoko itangala. Hinaa utami nuu, na upumulili na kunywegha na kuhekelela.’ 20 Ila Sapanga akamlongela, ‘Msihisihi wenga, lelu lelu uhiku mpumulo. Na hinaa, vindu havi vyogha ujitengelili vitewele vya ghani?’ "

21 Yesu akamalila kwa kulonga, "havi ndiwa itewela kwa yula mundu ajivikila hindu ngoo ila kavika ng’ogha hindu kwa Sapanga."

Kumlindila Sapanga

22 Hinu Yesu akawalongela wavulwa ghaki, kwaikiva gha hai ninguwalongela, "Mkotoho kuwela na holu kwa mulyo muupala ili mbati kulama, hata nguu mzipala kwaikiva gha higha gha mwenga. 23 Kwaikiva kulama ni maha kupiti mulyo, na higha ni maha kupiti nguu. 24 Mtole kumlandano wa kughulu, wangutulila ng’ogha na wangubena ng’ogha na hata wavile ng’ogha na ngoko yoyose. Hata nagha , Sapanga huwapegha mulyo. Na mwenga mngupalwa nesu kupiti wambongo. 25 Ni ghani paghati mwa mwenga anguwesa kuyongesa mayaghani utali wa ukomu wa ghaki? 26 Hinu, ikiva muwesa ng’ogha kughola mghalu msokombi handa hau, kwa kyani kuvile na holu kwa ghala ghangi? 27 Mlole ulua vila ungumela. Ughola ng’ogha lihengu kupokela msahala na kupota ng’ogha nguu kwa kuvala. Ila ninguwalongela, hata Selemani mweni na ukulu ghaki wogha apatili ng’ogha kuvikwa maheli handa limonga lya hau ulua wa mlitawa. 28 Hinu ikiva, Sapanga hulivika nagha lihamba lya mlitawa lila lelo lya baha na kilau hudangilwa kulyoto, ghuli, atewavika ng’ogha maheli nesu mwenga mvile na kukwinila kusokombi msokombi?

29 Hinu, mkotoho kughasika yiwa mtelyegha kyani au mtenywegha kyani mkotoho kuvile na holu kwa hagha. 30 Kwaikiva wandu wawela ng’ogha Wayahudi wangughasikila hagha kumlima wogha. Ila Tati wa mwenga wa kundumba angumanya yiwa mngupala vindu havi. 31 Hinaa mngupalwa mtumbuli kughasikila Unkosi wa Sapanga, na hagha hyogha mtepeghwa kwa nyongesa.

Hindu gha kundumba

32 Mkotoho kuwela na holu, mwenga lipinga mayangani. Kwaikiva Tati wa mwenga wa kundumba kapala kuwapegha Unkosi. 33 Muwusi hindu gha mwenga mkawapeghi wandu wakapuku hagha mapesa. Mjigholeli mihaku ihakala ng’ogha haku ndiwa kuvika ngoko kundumba, na haku itewesa ng’ogha kupungula. Kangi haku mwihi awesa ng’ogha kuhikila, hata nondo kuyalamisa. 34 Kula mnguvika ngoko ghako ndiwa na moyu ghako utelikala.

Watumikila walikali mihu

35 Mliyandali kunitumikila na malimbamba gha mwenga yayaki. 36 Mvile handa watumikila wangumlindila bambu wa weni ahuyi kuhuma kumhambu wa uposo, ili wamuwoposeleli mlyango pakatova mlyango. 37 Wahighilwa wala watumikila wavile mkulu ghao paahika atewalola walikala mihu. Ninguwalongela chakaka, hayu bambu ateliyandala, na kuwakema kulihinda na kuwapegha mulyo. 38 Hata ikiva bambu hayu atehuya uhiku wa mandandu au malawila pee na kuwalola wangugholokela mihu, wahighilwa watumikila hagha. 39 Mmanyi yiwa ikiva mweni lighuta angalimanya lisaa mwihi atehika, angalikala mihu, na hata kuleka lighuta lyaki libomolwe. 40 Hinu na mwenga hilahila mngupalwa mlikali mihu, kwaikiva Mwana wa Mundu atehika lisaa mulimanya ng’ogha."

Mtumikila mlungwana na mtumikila mlungwana ng’ogha

41 Petelo akamlongela, "Bambu, mlandano hau ungutulongela twenga weka, au unguwalongela wandu wogha?"

42 Bambu akayanga, "Ni ghani, avile mtumikila mlungwana na avile na luhala, na bambu ghaki atemvika kuwagholokela watumikila ghaki angupalilwa awapeghi mulyo lipindi lya maha?" 43 Kahighilwa mtumikila yula, avile bambu ghaki paahika atemlola akighola nagha. 44 Chakaka ninguwalongela, mkulu ghaki atemvika mtumikila hayu avile mgholokela wa hindu ghaki hyogha. 45 Ila ikiva mtumikila hayu akijilongela mmoyu, "Bambu ghangu kalikala lipindi litali kuhuya," hinu akatumbula kuwatova wayaki, watumikila walumi na watumikila wadala, hilahila angulyegha na kunywegha na kulowela, 46 hinu bambu wa mtumikila hayu atehika lichuwa limanyika ng’ogha, na lisaa limanyika ng’ogha. Na mweni atemtova nesu na kumuhakili na kumvika kwa wandu wakotoho kukwinila.

47 "Mtumikila yula avile angumanya nesu kila akipala bambu ghaki, ila kaleka kuliyandala kughola vila apalilwi kughola, atetovwa hyatu nesu." 48 Ila mtumikila yula kaghola yala kwa kumanya ng’ogha, atetovwa hyatu mayaghani. Na yoyose apeghilwi kughola lihengu likulunga na mkulu ghaki atepalwa kuhipa vindu ngoo.

Yesu angulekanisa wandu

49 "Nihika kukosa lyoto kumlima wogha, na nenga luhujulu lwangu ningalilola yiwa uyaka kala. 50 Na nenga nivile na ubatiso na mahakilo yala ningupalwa kuyapokela na niteyendelela kughasika mmoyu mbaka yatimile. 51 Mnguliwachila nihika kuyegha kuponga kumlima wogha? Ninguwalongela mwenga ng’ogha nagha, nihika kuyegha malekano. 52 Na hata nagha, kulighuta lya walongo waitano watelekanika, waitatu watengingama na waivili, waivili watengingama na waitatu. 53 Tati atengingama na mwana ghaki, na mwana atengingama na tati ghaki. Nyongo atengingama na biti ghaki, biti atengingama na nyongo ghaki. Nyongo mkwahanu atengingama na mdala wa mwana ghaki, na mdala yula atengingama na nyongo mkwahano ghaki."

Kughalambula lipindi

54 Hilahila Yesu akalilongela kangi lipinga, "Pamlola mahindu yakihuma upandi hula lihongela lijuwa, mngujilongela, ‘Ndonya itetonya,’ na chakaka itetonya." 55 Hilahila pamlola liyegha likiwumba kuhuma upandi wa kusini, mwenga mngulonga, "kutevile na lihuki," na ndiwa itevile nagha. 56 Mwenga wambindingu, mnguwesa kumanya kulongelela lipindi lya mlima wogha na kundumba, ghuli mnguwesa ng’ogha kumanya hagha yahumila hinaa.

Ulaghani na mhakata ghako

57 Kwa kyani muwesa ng’ogha kutosa mweni lila lya maha? 58 Kwaikiva msitaki ghako angukuyegha kunjengakaya, ni maha uyomoli na mweni hula uhakata munjila, ili akotoho kukuyegha kwa mundu wa kutosa na mweni akakuyegha kwa watovangondo, na weni wakakuvika mlighuta lya wawopwa. 59 Ninguwalongela uchakaka utewesa ng’ogha kuhuka mula mbaka uhipi ligwala hyogha ungupalwa kuhipa.

3 Kwaikiva gha umaha nipeghilwi na Sapanga ninguwalongela kila mmonga paghati gha mwenga, mkotoho kujiwachilila mwenga maweni yiwa ni wamaha kupiti vila ingupalwa na kuilola yiwa mwenga mwawakulu kupiti vila iwela.

Kulekana mghati gha lipinga lya wandu wamkwinila Kilisito

10 Walongu wa nenga, kuukulu wa lihina lya Yesu Kilisito pepahi ninguwaluwa, mjumilani kumighalu hyogha munguilongela ili pakotoho kuwela na mlekaniko paghati gha mwenga, nesunesu muweli na lukani limonga na liwachilo limonga.

11 Kwaikiva kwahela mundu mweni kuwesa kumanya mawachilo gha mundu ghangi ila ni mpumulo weka weni kulikala mghati mwaki mweni. Hilahila kwahela mweni kumanya mawachilo gha Sapanga ila ni Mpumulo wa Sapanga ghaki.

18 Mkotoho kuingonga wenibaha. paikawela mundu yeyosi paghati gha mwenga akaliwachila yiwa kana luhala handa luhala lwa mlima wogha hau, ni mbaha aweli ndyungi ili apati luhala lwa chakaka.