1 Lichuwa limonga, Yesu awelili kagholoka mmbali gha lihiwa Genesaleti hilahila walikema lihiwa galilaya na wandu watangala wawelili wakimtindila kunu wakihukumulana hukumulana ili wahyoghanili lilando lya Sapanga. 2 Akalola whatu ivili zivile na hindu ng'ogha mmbali mwa lihiwa, na walopola homba weni wakiva wahukili, wanguhonjola nyafu zyao. 3 Yesu akayingila kuhila whatu imonga iwelili gha Simoni. Yesu akamkonya alikukuli kumlima kutali mmbali mayaghani gha lihiwa. Hinu akatama mula na kuvula wandu. 4 Paayomolili kuvula, akamlongela Simoni, "Uyendesi whatu mbaka kumasi yatangala na mdangi nyafu zyenu ili mlopole homba." 5 Simoni akamyanga, "Bambu tuyesili kulopola uhiku wogha ng'ogha kupokela hindu ila kwaikiva ulongile lilando wenga nitedanga nyafu." 6 Hinu pawadangili nyafu, wakalopola homba ngoo hata nyafu zyao zitumbulili kubaluka. 7 Wakawapungila mawoko wawopola waghangi wawelili kuwhatu ghangi wahiki kuwatanga. Wakahika na kuzimemesa whatu zyogha ivili homba, hata ziyesili kujumbukila mlihiwa. 8 Simoni Petelo paalolili mighalu igholeka nagha, akamtundamilila manunguna Yesu na kulonga, "Bambu, ukotoho kutama pabehi na nenga, kwaikiva nenga ni mundu mweni sambi." 9 Simoni pamonga na wogha wawelili pamonga wakangazilwi nesu kwaikiva gha homba ngoo wawalopolili. 10 Yakobu na Yohanawana wa Zebedayo wawelili walopola pamonga na mweni Simoni, wakangazilwi hilahila. Na Yesu akamlongela Simoni, "Ukotoho kutila, kuhumila lelo uteghola lihengu lya kuwayegha wandu kwa Yesu handa mlopola anguyegha homba ukaya." 11 Hinu, badili gha kuyegha whatu mmbali mwa lihiwa, wakaleka vyogha kumlima, wakamkovekela Yesu.

12 Yesu paakiva kummbwani mmonga, kukahuma mundu mmonga amemesilwi na ukalawa higha wogha, na mweni paamlolili Yesu, akayinama wuso mbaka pahi, akamlongela akimluwa, "Bambu ningumanya, unguwesa kunilamisa nikaghululika." 13 Yesu akalangiha liwoko, akamyavisa na kumlongela, "Ningupala, ulamiswe." Na bwitu mundu yula akalamiswa ukalawa ghaki. 14 Yesu akamlaghila, "Ukotoho kumlongela mundu yeyose, ila uyende ukajilangihi kwa mtambika, ukayeghi litambiku kwaikiva gha kughululika kwa wenga handa alaghilili Musa kuwahighilisila wandu yiwa ulamili." 15 Ila mighalu gha Yesu iyendeleleli kulandala kila mahala. Wandu mapinga ngoo walikungulili ili kumuhyoghanila na kulamiswa mavina ghao. 16 Ila mweni ayendili mahala pakumanyahi na kuyupa kula.

17 Lichuwa limonga Yesu awelili akivula, Mafalisayo na wavula wa laghililo lya Musa kuhuma kukila mahala ku Galilaya, Yudasia na Yelusalemu, wawelili watama pala. Makakala gha Bambu yawelili pamonga na mweni kwa kulamisa wavina. 18 Wandu wakahika, wakimyegha mundu mmonga vikongonu ghaki vipolili, awonjili kukindanda, wakayesa kumuyingisa mghati, ili wamviki kuulongolo kwa Yesu. 19 Ila, wawesa ng'ogha kwaikiva kuwelili na wandu watangala, wasindilwi kuyingila mghati. Hinu, wakakwela kumyegha kunani gha lighuta, wakamatula mhanga, wakamghulusa yula mundu vikongonu ghaki vipolili pamonga na lihinda kyaki, wakamvika kuulongolo gha Yesu.Mundu angughuluswa kunani gha lipaghala 20 Yesu paalolili vila kukwinila ghao mkulunga, akamlongela yula mundu, "Ghanja, ulekeselwa sambi syako." 21 Wavula wa laghililo na Mafalisayo watumbulili kujikonya, "Ni ghani hayu angumlighu Sapanga? Ni ghani anguwesa kumlekesela mundu sambi ila ni Sapanga weka hela." 22 Yesu amanyili mawachilo gha weni, akawakonya, "Kwa kyani mnguliwachila havi mumioyu gha mwenga? 23 Kindu ghani kivile kiyuyuhu, kulonga, ‘sambi syako ulekeselwa,’ au kulonga, ‘Ugholoki, utyangii’? 24 Hinu ningupala mmanyi yiwa nenga Mwana wa Mundu nivile na ulongosi wa kulekesela sambi baha kumlima wogha." Hinu akamlongela mundu yula vikongonu ghaki vipolili, "Ningukulongela, ugholoki, utoli lihinda lyako na uhuyi ukaya." 25 Bwitu mundu yula akagholoka kuulongolo gha wogha, akatola lihinda lyaki akayenda ukaya kwa mweni kunu akimyinula Sapanga. 26 Wandu wogha wakangasilwi na kukolwa na holu, wakamyinula Sapanga wakilonga, "Tulola makangaso lelo."

27 Badili gha yala, Yesu akahuka panji, akamlola mtola usulu mmonga lihina lyaki Lawi, atamili kulighuta lya kutola usulu. Yesu akamlongela, "Nikovekeli." 28 Na mweni akaleka hyogha na kumkovekela. 29 Hinu, Lawi akamtengela Yesu mhambu mkulunga kulighuta ghaki. Na lipinga likulunga lya watola usulu na wandu ghangi wawelili watama pamonga na mweni. 30 Mafalisayo na wavula wa laghililo lya Musa wakawang'ung'ulikila wavulwa wa Yesu wakilonga, "Ghuli mngulyegha na kunywegha pamonga na watola usulu na wavili na sambi ghangi?" 31 Yesu akawayanga, "Walamili wampala ng'ogha mlamisa, wampala ni wala wavina. 32 Hilahila nihikili ng'ogha kuwayandala wandu maha kwa Bambu, ila wala wavile na sambi, wawese kulekeselwa sambi."

33 Wandu ghangi wakamlongela Yesu, "Wavulwa wa Yohana Mbatisa uwopa mulyo mihanja itangala na kuyupa, hata wayitikila wa Mafalisayo ughola hilahila. Ghuli wavulwa ghako wangulyegha na kunywegha?" 34 Yesu akawayanga, "Ghuli, iwesekana wala wayeghilwi kumhambu wa kuposa wawopa mulyo ikiva bambu wa kuposa kapamonga na weni? 35 Ila lipindi litehika bambu wa mhambu wa uposo atehumiswa paghati gha weni. Kulipindi lila ndiwa watewopa." 36 Yesu akawalongela mlandano hau, "Wandu wadumula ng'ogha kilaka kya lihabiti hyonu na kukivika kulihabiti lya dahile, ikiva waghola nagha, watevile waiyalamila hai lihabiti hyonu, na haki kilaka kitelandine ng'ogha na hai lihabiti lya dahile. 37 Hilahila kwahela mundu anguvika divai hyonu mghati mwa mhaku wa ngosi wadahile. Ikiva kaghola nagha, hila divai hyonu itebalula hula mhaku wa ngosi, divai itemwaika na mhaku wa ngosi uteyalamila. 38 Divai hyonu huvikwa kumhaku wa ngosi kyonu. 39 Kwahela mundu angupala kunywegha divai hyonu badili gha kunywegha divai gha dahile kwaikiva ulonga hila gha dahile ni maheli nesu."