1 Mhambu wa mabumunda yavikilwi ng'ogha simika, ingukemwa Lichuwa lya Pasaka, liwelili ipabehi kuhika. 2 Watambika wakulu na wavula wa ulaghilo wanguhakula njila gha kumkoma Yesu, ila wakawela na holu gha wandu.

3 Hinu, Lihyukana likamuyingila wangumkema Yudasi Isikalioti, mmonga wa wala wavulwa ikumi na waivili. 4 Yudasi akayenda akalongelana na watambika wakulu na wagholokela wa lighuta lya Sapanga. akalongela na weni vila watemkamula Yesu. 5 Na weni wakahekelela na kumlongela yiwa watempegha mapesa. 6 Yudasi akayitikila na akavile akihakula njila gha maha gha kumyegha kwa weni wandu wakotoho kumanya.

7 Hinu, lichuwa lya mabumunda yavikilwi ng'ogha simika likahika. Hali ndiwa mhambu livile mwanakondolu wa Pasaka huhinjwa handa litambiku. 8 Hinu Yesu akawalaghila Petelo na Yohana, akawalongela, "Myendi mkatutengeli ili tuwese kulyegha mhambu wa Pasaka."

9 Na weni wakamkonya, "Ungupala tuitengeli kugha?" 10 Akawalongela, "Mhyoghanili, pamvile mnguyenda kumbwani, mtekongana na mlumi apapili lindeleku lya masi. Mumkovekeli mbaka mghati gha lighuta ateyingila. 11 Mumlongeli mweni lighuta, ‘Mvula angukukonya, kya kugha kila kyumba atelyeghela mhambu wa Pasaka na wavulwa ghaki?’ 12 Na mweni atewalangiha kyumba kikulu kunani gha mlighuta kivile kitamikiliwi vindu vya mhambu maha mtengeli hamu."

13 Hinu wakayenda wakalola kila kindu handa Yesu awalongile, wakatengela pala mulyo wa pasaka.

14 Lisaa palihikili, Yesu akatama kulyegha mulyo pamonga na wandumindumi ghaki. 15 Akawalongela, "Imbendeze nenga kulyegha mhambu wa Pasaka hai pamonga na mwenga pambila gha kuhakilwa kwa nenga. 16 Hinaa ninguwalongela, niteulyegha ng'ogha kangi mhambu wa Pasaka mbaka pala itehumila ku Unkosi wa Sapanga."

17 Hinu akatola kitekelu kya divai, akashukwile, akalonga, "Mtoli haki mnyweghi wogha. 18 Hinaa ninguwalongela, nitenywegha ng'ogha kangi divai gha zabibu mbaka Unkosi wa Sapanga utekahika."

19 Hinu akatola libumunda, akashukwile, akaumegha, akawapegha akilonga, "Hau ndiwa higha wa nenga utolwa kwaikiva gha mwenga. Mgholi nagha kwa kunikumbwike nenga." 20 Hilahila badili gha kulyegha, akatola kila kitekelo kya divai akalonga, "Kitekelo haki ni lilaghano lya hyonu lihighiliswa mwahi gha nenga, inguyitika kwaikiva gha mwenga."

21 "Ila, mloli, yula atenihyuka kabaha mlihinda pamonga na nenga. 22 Ni chakaka Mwana wa Mundu anguyenda kukomwa handa lukani lwa Sapanga , ila chondi yula mundu atenihyuka."

23 Hinu wakatumbula kukonyana weni kwa weni ni ghani paghati gha twenga ateghola mghalu hau.

24 Kangi yakahumila masindano paghati gha wala wandumindumi yiwa ni ghani awachilwili kuvile mkulu kupiti ghangi. 25 Yesu akawalongela, "Wankosi wa wandu wawela ng'ogha Wayahudi wanguwalongosa wandu kwa makakala na wala wavile na ukulu kwa wandu hagha wangujikema maghanja wa wala wanguwalongosa." 26 Ila mwenga mkotoho kughola handa wala ila yula avile mkulu kwa mwenga na alikali handa mnung'una kwa wogha kulongosa handa mtumikila. 27 Kwaikiva, ni ghani avile mkulu, yula angulikala mmesa na kulyegha mulyo au yula mweni kuwagholela wandu handa mtumikila? Ninguliwachila ni yula angulikala kumesa kulyegha mulyo. Hata nagha, nenga na baha paghati mwa mwenga handa mtumikila.

28 Mwenga ndiwa mhighalili na nenga lipindi lyogha lya mayeso gha nenga, 29 na handa vila Tati gha nenga anipeghili Unkosi, hilahila na nenga ninguwapegha mwenga Unkosi. 30 Ili mpati kulyegha na kunywegha mmesa gha nenga kumhambu wa Unkosi wa nenga na kulikala kuvikalilo vya kinkosi, mkiva mkitosa makabila ikumi na ivili gha Izilaeli.

31 "Simoni, Simoni, uhyoghanili Lihyukana lipalili kuwayeyesa mwenga handa mundu anguyeyesa ngano. 32 Ila nenga Simoni nikuyupila kwa Sapanga ili kukwinila ghako kukotoho kupungula. Na wenga paunihyukila na kunikwinila uwapeghi moyu walongo ghako."

33 Na mweni Petelo akamuyanga, "Bambu, nenga nijivika kala maha kuyenda pamonga na wenga kuyenda kulighuta lya wawopwa na hata kuhova."

34 Yesu akamuyanga, "Ningukulongela wenga Petelo, pambila gha njogholu kutova lilowi lelo utevile unikanila mihanja itatu yiwa ungunimanya ng'ogha nenga."

35 Hinu Yesu akawakonya wavulwa ghaki, "Paniwalaghilili mvile ng'ogha na mhaku wa mapesa na ng'ogha mhaku wa nguu na ng'ogha hilatu, mlepelelwili na kindu chochose?"

"Wakalonga ng'ogha."

36 Yesu akawalongela, "Ila hinaa, yula avile na mhaku wa mapesa na atole na yula avile na mhaku hilahila atole. Na yula kahela lipanga, awusi lihabiti ghaki akahemeli lipanga. 37 Kwaikiva ninguwalongela, liyandiko hali lingupalwa ligholeki kwa nenga, yiwa, ‘Avalangililwi pamonga na wahakata’ kwa chakaka yala yayandikiliwi yanilongelela nenga yangupalwa yagholeki."

38 Wavulwa ghaki wakamlongela, "Bambu, lola, tuwela na mipanga ivili baha."

39 Yesu akahuka akayenda kulitumbi lya Mizeituni handa iwelili akighola, na wavulwa ghaki wakamkovekela. 40 Paahikili kula akawalongela, "Myupi, ili mkotoho kuyingila mmayeso."

41 Hinu akawaleka, akayenda utali wa mundu kuwesa kudanga liganga, akatova manung'una, akayupa kwa Sapanga. 42 "Tati, ikiva ungupala, ukihumisi kitekelo haki kya maghaso, hata nagha, mapalo ghako yatimili," 43 Bahala mtumikila wa kundumba wa Sapanga akamuhumila, akamvika makakala. 44 Na mweni akiva kulutungu mkulunga, akayupa kwa kuyangalayi na lihuki lyaki likavile handa mwahi lingughuluka pahi kulutupi.

45 Kuulongolo paayomola kuyupa, akawahuyila wavulwa ghaki, akawalola wawonja, kwaikiva wawelili wana utungu mmoyu. 46 Na mweni akawakonya, "Kwa kyani muwonja? Mulamuki muyupi ili mkotoho kuyingila mumayeso."

47 Yesu lipindi akiyendelela kulonga, lipinga likulunga lya wandu likahika, likilongoswa na Yudasi Isikalioti, akiva awelili mmonga wa wala wavulwa ikumi na ivili. Akamhikila Yesu ili amjambusi kwa kumkusukila. 48 Ila Yesu akamlongela, "Yudasi, ghuli, ungumhyuka Mwana wa Mundu kwa kumkusukila?"

49 Wala wavulwa ghaki pawalolili ghala wakalonga, "Bambu, tutumili mapanga ghetu?" 50 Mmonga wa wala wavulwa akamtova mtumikila wa Mtambika mkulu, akamdumula lipulikilo lya mbandi gha liwoku lya kulihila.

51 Pala, Yesu akalonga, "Uleki, hai ingubaka." Akaliyavisa lila lipulikilo lya yula mtumikila wa mtambika, akalilamisa.

52 Hinu Yesu akawalongela watambika wakulu na wakulu wa wagholokela wa Lighuta lya Sapanga na wagogolo ghangi wa Kiyahudi wahikili kumkamula, "Ghuli, mhika na mapanga na mimbonga kunikamula yiwa nenga na mpokola? 53 Paniwela pamonga na mwenga machuwa hyogha mlighuta lya Sapanga mnikamula ng'ogha. Ila, hali ndiwa lipindi lya mwenga nesu, ndiwa lipindi lya ulongosi wa lwisa."

54 Hinu wakamkamula Yesu, wakamtola na kuyenda pamonga na mweni lighuta kwa Mtambika Mkulu. Petelo akiva angumkovekela kuyetu kwa utali. 55 Wandu wala pawahika ukaya kwa mtambika mkulu wakakosa lyoto paghati gha lyugha na weni wawelili walikala pamonga na mweni Petelo akalikala pamonga na weni. 56 Mtumikila mmonga mdala paamlolili Petelo kalikala pabehi na lyoto, akamkwinjilila mihu, akalonga, "Mundu hayu hilahila awelili pamonga na Yesu."

57 Ila Petelo alikanili akilonga, "Aku, Nimmanya ng'ogha nenga."

58 Kuulongolo mayaghani, mundu ghangi akamlola Petelo, akalonga, "Wenga ni mmonga wa wala."

Ila Petelo akayanga "Mundu wenga, ng'ogha nenga."

59 Kuulongolo handa lisaa limonga havi, mundu ghangi akayendelela kulonga, "Kwa chakaka hayu awelili pamonga na Yesu, kwaikiva mweni kangi ni Mgalilaya."

60 Petelo akayanga, "Wenga mundu, nenga nimanya ng'ogha kiulonga," na palapala ambila akilonga, njogholu akatova lilowi. 61 Bambu akaghalambuka na kumhyukila Petelo na mweni Petelo akumbwikile ghala milando awelili kalongelwa na Bambu Yesu, "Lelo pambila njogholu katova lilowi ng'ogha, utenihyuka mihanja itatu." 62 Pala Petelo akahuma panji, akalila nesu.

63 Wala wandu wawelili wangumgholokela Yesu wakatumbula kumpughanya na kumtova. 64 Wakamuwopa nguu kumihu na kumkonya, "Utulongeli ghani kakutova?" 65 Wakayendelela kumlighu kwa malighu yatangala.

66 Paihika malawila wakonganikili wagogolo vilongosi wa Izilaeli na Watambika wakulu na wavula wakamyegha kuulongolo gha njengakaya ghao. 67 Wakamkonya, "Ikiva wenga ndiwa Kilisito, utulongeli." ila Yesu akawalongela hata nikiwalongela mtekwinila ng'ogha. 68 Na nenga paniwakonya lilando mteniyanga ng'ogha. 69 Ila kuhuma hinaa, "Mwana wa Mundu atelikala mbandi gha liwoku lya kuliyila wa Sapanga avile na makakala."

70 Wogha wakamkonya wakalonga ndiwa kulonga wenga ni Mwana wa Sapanga?

Mweni akawayanga ni chakaka vila mngulongela yiwa ni Mwana wa Sapanga.

71 Hinu wakalonga, "Tupala ng'ogha ulangihi kwaikiva twaweni tuhyoghanila milando kuhuma mumlomo ghaki."