1 Hinu Yesu paalola kwa umaha, akawalola wandu wanaisa vila wawelili wakivika litambiku kulisanduku lya luhanja kulighuta lya Sapanga. 2 Hilahila akamlola nyongo mmonga ahovitiliwi na mlumi ghaki akivika mula gwala ivili isokombi. 3 Ndiwa Yesu akalonga, "Chakaka ninguwalongela, hayu nyongo ahovitiliwi na mlumi ghaki na avile na hindu ng'ogha kavika mula litambiku lipiti wandu ghangi wogha. 4 Hagha ghangi wogha wavika litambiku kwa Sapanga kwa ikiva wavile na hindu ngoo wavika mayaghani kwa vila vitangala wapokelili, ila hayu nyongo ahovitiliwi na mlumi ghaki pamonga ni mundu avile na hindu ng'ogha, kavika mlisanduku kila kindu akidahila kuukomu ghaki."

5 Wamonga wa wavulwa ghaki wayesili kumulangiha vila Lighuta lya Sapanga walichengili kwa maganga maheli na kwa vindu vitolilwi handa litambiku kwa Sapanga. 6 Yesu akalonga, "litehika lichuwa limonga havi vindu mnguvilola vitebomolwa, hinu litesyehila ng'ogha liganga kunani gha ghangi, kila kindu kitebomolwa."

7 Wavulwa hagha wakamkonya, "Mvula, mighalu hai itehumila ligha? Ni kilangihi liki kitelaghiha yiwa yavile pabehi kugholeka?" 8 Yesu akawayanga, "Mlikali mihu ili mkotoho kulongelwa uhwangi. Kwaikiva wandu watangala watehika kwa lihina lya nenga, wakipala kulonga, ‘Nenga ndiwa Kilisito,’ na ‘Mwihu wa mlima wogha upabehi kuhika. Ila mwenga mkotoho kuwakovekela.’ 9 Hinu, pamtehyoghanila lilando lya ngondo na maghaso, mkotoho kutila, kwaikiva ingupalwa hagha yatumbuli kuhumila, ila mwihu wa mlima wogha umbila." 10 Kuulongolo akayendelela kulonga, "Mlima kwa mlima ghangi itetovana, na unkosi mmonga utetovana na unkosi ghangi." 11 Kila mahala patevile na mihihimilo gha lindakali kogha na kogha, njala ikalipa na kuvina mahakata nesu. Kutevile na mighalu gha kutila nesu handa vilangihi kuhuma kundumba. 12 Ila yambila kuhumila hagha hyogha, wandu watewakamula wamonga gha mwenga na kuhakilwa. Watewayegha kumawoko gha wakulu wa maghuta gha kukonganika Wayahudi na kuwopwa kumaghuta gha wawopwa, na mwenga mteyeghwa kuulongolo gha wankosi na walongola kwaikiva gha lihina lyangu. 13 Hai itevile njila gha mwenga kuwalongela Habali Maha. 14 Ila kumioyu gha mwenga mkotoho kutila kindu yiwa mtelonga kyani haku. 15 Kwaikiva nenga baha nitewapegha milando na luhala lula kwahela hata mhakata wa mwenga mmonga atewesa kusindana na hau na hata kuingingama. 16 Walela wa mwenga, walongo, walongo wa mmbali pamonga na waghanja wa mwenga watewahyuka mwenga na wamonga gha mwenga mtekomwa. 17 Wandu wogha watewapala ng'ogha mwenga kwaikiva gha lihina lya nenga. 18 Ila patewela ng'ogha ghwila imonga gha mutu gha mwenga iteyalamila. 19 Ila kwa kuyendelela kugholoka kwa kukamala mtelokola mpumulo gha mwenga.

20 Pamlola mmbwani wa Yelusalemu utindilwa na watovangondo, hinu mmanyi yiwa kuyalamika kwaki kupabehi. 21 Lipindi hali, wala wavile kumlima wa Yudasia wabhutukili kumatumbi na wala wavile kummbwani Yelusalemu wahuki hamu na wala wavile kumatawa wakotoho kuyingila kummbwani. 22 Kwaikiva hali litevile lipindi lya matovo kuhuma kwa Bambu ili hyogha yayandikiliwi kumayandiko gha Sapanga yahumile. 23 Chondi kwa wavile na ndumbu na wala watevile wakiyongesa kumachuwa ghala. Kutevile na lung'ai ngulu kumlima wogha na lilaka lya Sapanga litewahikila wandu hagha. 24 Ghangi watekomwa kwa lipanga na ghangi watetolwa kuhusutu kumlima ghangi na wandu wawela ng'ogha Wayahudi wateulongosa Yelusalemu kwa makakala na kuwahakila wandu ghaki, mbaka lipindi lyao litetimila.

25 "Kutevile na kilangihi kulijua na mwehi na ndondwa. Milima hyogha kumlima wogha yatevile na lung'ai kwaikiva gha holu ihumila na mlindimo wa mawimbi gha bahali." 26 Wandu watehyunga mpumulo kwa holu ngulu na kuilola mighalu ihumila kumlima wogha, kwaikiva makakala gha vindu vya kundumba yatetikanyika. 27 Lipindi hali ndiwa watemlola Mwana wa Mundu akihika kumahindu pamonga na makakala na ukulu mkulunga. 28 Lipindi mighalu hai paitetumbula kugholeka, mgholoki na myinule mutu, kwaikiva ukombola wa mwenga utama pabehi.

29 Hinu Yesu akawalongela mlandano hau, "Muwachilile libiki lilela tini na mibiki ghangi." 30 Pamlola yiwa itumbula kuhipula mahamba, mnguwesa kumanya lipindi lya kutukutula lihika pabehi. 31 Hilahila, pamlola mighalu hai ihumila, mmanyi yiwa Unkosi wa Sapanga utama pabehi. 32 Chakaka ninguwalongela, wandu wa kiwelekwa haki kitehuka ng'ogha pambila gha hagha hyogha kuhumila. 33 Kundumba na mlima wogha viteyenda, ila lilando lyangu liteyenda ng'ogha.

34 "Mlikali mihu, mioyu gha mwenga ili mkotoho kukolwa na mighalu gha mlima wogha handa kuyananga hindu na ulowela na mighalu hyogha gha ukomu hau. Kwaikiva lichuwa lila litewahikila bwitu. 35 Kwaikiva itewahikila handa vila mteghu paukamula, ndiwa lichuwa lila litewahikila wandu wogha walikala kumlima wogha kogha. 36 Mlikali mihu, na myupi lipindi lyogha ili muwese kupokela makakala gha kutyanga maha kumighalu hai hyogha itehumila na kugholoka kuulongolo gha Mwana wa Mundu." 37 Kila lelo pamuhi Yesu awelili akivula Mlighuta lya Sapanga na lumihi paihikili, ayendili kulitumbi lya Mizeituni na kulikala kula uhiku wogha. 38 Wandu wogha wawelili wakiyenda ku Lighuta lya Sapanga malawila pee, ili wawese kumuhyoghanila Yesu.