1 Lichuwa lya Kupumulila, Yesu ayendili kulyegha mulyo ukaya kwa mmonga wa wakulu wa Mafalisayo, na wandu watamili pala wayesili kumlolesa kwa pabehi ili walole kila ateghola. 2 Bahala, kuulongolo ghaki Yesu kuwelili na mundu mmonga awelili na uvina wa kututumuka higha. 3 Yesu akawakonya wavula wa laghililo lya Sapanga ampeghili Musa na Mafalisayo, "Ghuli, malaghililo yangutulekesela kulamisa wandu lichuwa lya Kupumulila au ng'ogha?"

4 Ila weni wakalikala nuu. Hinu Yesu akamkola liwoko yula mvina na kumlamisa, akamlekesela ahuki ukaya ghaki. 5 Hinu Yesu akawakonya, "Ni ghani paghati gha mwenga ikiva mwana ghaki na vilavila ng'ombi ghaki akidubukila mlyohu, atemuhumisa ng'ogha ikiva ni lichuwa lya Kupumulila?"

6 Na wandu hao wawesa ng'ogha kumyanga lilando.

7 Yesu paalolili vila wala wahenja wapokelilwi wanguhaghula mahala pautundamilu lipindi lya kulyegha, akawalongela mlandano hau. 8 "Ikiva mundu akikukema kumhambu, ukotoho kutama mahala pautundamilu, kwaikiva iwesekana kapokelwa mundu ghangi mkulu apiti wenga. 9 Ikiva akaghola nagha yula mwenekaya wa mwenga waivili atehika na kukulongela, ‘Umlekeli hayu haku.’ Hinu bahala utelihola kuulongolo gha wandu wogha na kupalwa uyendi kutola mahala pakuyetu. 10 Badili ghaki, paupokelwa kumhambu, utami mahala pakuyetu, ili yula mwenekaya wa wenga paakulola atehika na kukulongela, ‘Ghanja ghangu, uhiki haku kuulongolo pautundamilu nesu.’ Kwa nagha utevile upokela utundamilu kuulongolo gha wahenja wayako wogha. 11 Kwaikiva yula ajigholili mkulu ateghuluswa na mundu yula ajigholili mnung'una ategholwa kuvile mkulu."

12 Hinu Yesu akamlongela yula awakemili, "Pauyandala mhambu wa mulyo wa pamuhi na wa lumihi, ukotoho kuwapokela waghanja ghako hilahila walongo ghako wa pabehi au wavile na hindu ngoo hela, paughola nagha naweni wanguwesa kukupokela kumhambu kwa weni, na wenga ukahipwa kila ukigholili. 13 Badili ghaki, pauyandala mhambu, uwapokeli wandu wavile na hindu ng'ogha au walemafu au wangali maghulu au mawoko na wangali mihu, 14 na wenga utehighiliwa, kwaikiva hagha wawesa ng'ogha na kya kukuhipa. Hinu Sapanga atekupegha hupo ghako lipindi wandu wa maha watehinduka."

15 Mmonga paghati gha wala wawelili pamonga na Yesu akalonga, "Kahighiliwa mundu yula atelyegha mulyo kumhambu wa Unkosi wa Sapanga."

16 Yesu akamyanga, "Mundu mmonga agholili mhambu mkulu, akawakema wandu watangala." 17 Lipindi lya mhambu palihika akamlaghila mtumikila ghaki akawalongele wala wandu wawapokelili, "Mhiki kwaikiva kila kindu kiyandalilwi kala." 18 Ila wogha, kila mmonga, akatumbula kuluwa yiwa kana lihengu ili awesi kuhuka. Wa mtumbula akalonga, "Nihemelili litawa, hinu ningupalwa niyendi kuilolela, pepahi unilekiseli." 19 Mundu ghangi akalonga, "Nihemela mapinga maitano gha ng'ombi wa kutukutulila hinaa ninguyenda kuwayesa, nakuluwa pepahi unilekiseli." 20 Na ghangi akalonga, "Nihuma kuposa machuwa hagha, hinu nitewesa ng'ogha kuhika."

21 Mtumikila yula akahuya na kumlongela bambu ghaki mghalu hula. Yula mwenikaya akahyoma, na kumlongela mtumikila ghaki, "Uyendi kwa kuloposela kunjila zya mmbwani na mmbekumbeku gha vimbwani, uwayeghi wandu wakapuku, walemafu na wangali mihu pamonga na wangali maghulu." 22 Yula mtumikila akahuya na kulonga, "Bambu, yala unilaghilili niyaghola kala, ila pambila kumema." 23 Yula bambu akamlongela mtumikila ghaki, "Uyendi kunjila gha panji gha mmbwani na mmbekumbeku uwagholi wandu wayingile ili lyugha lya nenga limemi." 24 Hinu ninguwalongela, kwahela hata mmonga wa wala wapokelilwi atewesa kulyegha mhambu wa nenga hata mayaghani.

25 Lipinga likulunga lya wandu liwelili na mwanja pamonga na Yesu, na mweni akawaghalambukila, akawalongela, 26 mundu yeyose ahika kwa nenga awesa ng'ogha kuvile mvulwa wa nenga ikiva anipala ng'ogha nenga kupiti tati ghaki na nyongo ghaki, mhumbu ghaki na wana, walongo ghaki na wahaja ghaki, hata kulama kwaki mweni. 27 Yeyose katola ng'ogha lipingika ghaki na kunikovekela atewesa ng'ogha kuvile mvulwa wa nenga.

28 "Kwa nagha ni ghani paghati mwa mwenga avile paapala kuchenga lilingo, kalikala ng'ogha pahi na kuvalanga vingupalwa niki na niki ili aloli yiwa mapesa ghaki yanguwesa kuyomola lihengu?" 29 Ikiva utewesa ng'ogha kughola nagha, unguwesa kutumbula kikalilo, ila ukasindwa kuyomola lighuta. Pausindilwi kuyomola, kila mundu atekuheka. 30 Wakilonga, "Mundu hayu atumbulili kuchenga, ila kawesa ng'ogha kuyomola."

31 "Au, ni nkosi ghani anguwesa kuyenda kutovana na nkosi ghangi, kalikala pahi ng'ogha kuliwachila yiwa atewesa, kwa uweso wa watovangondu ghaki ielufu ikumi, kulitova na yula ahika na watovangondu ielufu ishilini?" 32 Ikiva atelola anguwesa ng'ogha kutovana, hinu lipindi yula nkosi ghangi akiva ambila kutali, mweni ateyegha laghililo kwa kutumila watumikila ghaki wayendi kwa yula nkosi na kumluwa wagholi malongelano gha kuponga. 33 Vilavila, yeyose paghati mwa mwenga akiva kawesa ng'ogha kuleka vyogha avikolili, anguwesa ng'ogha kuvile mvulwa wa nenga.

34 "Munyu wa maha, ila pauyalamisa umunyu ghaki, kwahela njila gha kuighola ivile munyu kangi. 35 Yamaha ng'ogha kwa lutupi hata kwa mbolea, hinu hudangwa hela. Yula avile na mapulukilo gha kuhyoghanila na ahyoghanili."