1 Lichuwa limonga, Yesu awelili mahala kutenu akimyupa Sapanga. Paayomola kuyupa, mmonga wa wavulwa ghaki akamlongela, "Bambu, utuvuli kuyupa handa vila Yohanaawavulili wavulwa ghaki."

2 Yesu akawalongela, "Pamyupa mlonge,

‘Tati Lihina ghako litundamilwe,

Unkosi ghako uhiki.

3 Utupeghi mulyo wa twenga kila lelo.

4 Utulekeseli sambi sya twenga,

kwaikiva twenga tunguwalekesela wandu wogha watugholela mahakata,

kangi ukotoho kutuvika kumayeso, ila utughulusi kuhuma kwa yula mhakata.’ "

5 Hinu akawalongela, "Kwa mlandano mmonga wa mwenga kawela na ghanja, akayenda kwa mweni uhiku wa mandandu, akamlongela, ‘Ghanja, pepai nikopesi mibumunda miitatu, 6 kwaikiva ghanja ghangu kapitila kwa nenga akiva kumwanja na nenga nivile ng'ogha na mulyo wa kumpegha.’ 7 Na mweni kamghati ghaki amyangi, ‘ukotoho nighasa. Niwopa kala mlyango. Nenga na wana ghangu tughonja, niwesa ng'ogha kuyimuka nikupeghi .’ 8 Kwa unagha ninguwalongela yiwa ateyimuka ng'ogha kumpegha mibumunda kwaikiva mweni ni ghanja ghaki hela, ila kwaikiva gha yula mundu kuyendelela kuluwa ailolile honi, ateyimuka na kumpegha vyogha angupala.

9 Na nenga ninguwalongela, muluwi na mwenga mtepeghwa, muhaki na mwenga mtepokela, mkuwi mlyango mtewoposelewa mlyango. 10 Kwaikiva kila mundu ailuwa angupeghwa, yula kanguhaka angupokela, na mundu yeyose akuwili mlyango anguwoposolewa mlyango. 11 Ni Tati ghani paghati mwa mwenga anguwesa kumpegha mwana ghaki njoka ikiva kamluwa homba? 12 Na ikiva kamluwa lihumbi, ghuli, atempegha mng'ongolo wamkema inge? 13 Hinu ikiva mwenga mwawahakata mngumanya kuwapegha wana wa mwenga vindu vya maha, ni unagha yiwa, Tati wa mwenga wa kundumba atewagholela mwenga ipiti, atewapegha Mpumulo wa Sapanga wala wamluwili."

14 Lichuwa limonga Yesu awelili akimuwinga mundu lihoka yula amgholili mundu kuvile angalikulonga. Hinu, hayu lihoka paamuhukili, yula mundu akawesa kulonga, hata na lipinga lya wandu likangasili. 15 Ila wamonga wa wandu wala wakalonga, "Anguwawinga mahoka kwa uweso wa mkulu wa mahoka, yula wamkema Belizebuli."

16 Na ghangi wapalili kumuyesa wakimluwa awalangihi kilangihi kihighilisa yiwa uweso ghaki uhuma kundumba kwa Sapanga. 17 Ila Yesu, akiva kamanya mawachilo ghao, akawalongela, "Unkosi wowose pautovana weni kwa weni utelekana utewesa ng'ogha kuyendelela, hilahila, wandu wa lipinga limonga lolose livile na ngondo liteyalamila." 18 Hinu ikiva Lihyukana likijingingamisa lyeni, unkosi ghaki uteyendelela ng'ogha. Ningulonga nagha, kwaikiva mwenga mngulonga yiwa ninguwawinga mahoka kwa uweso wa Belizebuli. 19 Hinu ikiva nenga ninguwapunga mahoka kwa uweso wa Belizebuli, hata wavulwa wa mwenga hilahila wanguwapunga kwa uweso ghaki kwa ikiva gha nagha wavulwa wa mwenga watewatosa yiwa mnguwachila maheli ng'ogha.

20 Ila ikiva ninguwinga mahoka kwa uweso wa Sapanga, hinu mmanyi yiwa Unkosi wa Sapanga uhikili kala kwa mwenga. 21 "Mundu avile na makakala paagholokela lyugha lyaki kwa migoha, hindu ghaki hyogha itesyehila kwa kuponga." 22 Ila paahika mundu avile na makakala nesu akampondanga na kumsinda, hayu humpokola migoha ghaki alikwinilili na kutola vindu avikolili.

23 Mundu yeyose akonganika na nengang'ogha, anguningingama, na yeyose akungula ng'ogha pamonga na nenga, angulandala.

24 "Lihoka paliwingwa kwa mundu, hutindilatindila mahala lipala akihakula mahala pakupumulila. Paapatili ng'ogha mahala pakupumulila, hujilongela, ‘Nitehuya kuukaya ghangu kula nihumili.’ 25 Paahika na kulola lila lighuta lipyahililwi na vindu kuvikwa maha, 26 Hinu, huyenda na kuwatola mahoka ghangi isaba wavile wahakata wapiti mweni, wogha huyenda, wakamuyingila mundu hayu. Hinu, lung'ai lwa mundu hayu hinaa utevile uhakata upiti pala mtumbula."

27 Yesu paawelili akilonga yala, mdala mmonga kulila lipinga lya wandu, akalonga kwa lilowi ngulu, "Kahighilwa mdala akulela na kukuyongesa."

28 Yesu akalonga, "Ila wahighilwa nesu wala wandu wangulihyoghanila lilando lya Sapanga na kulikola."

29 Lipinga lya wandu paliyendelelili kuyongeseka, Yesu akawalongela, "Kiwelekwa haki kihakata. Kingupala kilangihi, ila kitepeghwa ng'ogha kilangihi kyokyose ila kila kilangihi kya Yona." 30 Kwaikiva vila Yona awelili kilangihi kwa wandu wa Ninawi, vilavila Mwana wa Mundu atevile kilangihi kwa wandu wa kiweleka haki. 31 Kilongosi mkulu mdala wa sheba atehumila lipindi kiwelekwa haki pakitetoswa, na mweni atehighilisa yiwa ni unagha mvile na mahakata. Kwaikiva mweni awelili na mwanja kuhuma kutali mwihu wa mlima wogha, kuhyoghanila milando gha luhala lya Selemani, na lelo pavili na mkulu kupiti Selemani. 32 Kwa lichuwa lya utoso, wandu wa Ninawi wategholoka na watehighilisa yiwa ni uchakaka mvile na mahakata, kwaikiva weni wahyukili na kulekiselwa mahakata ghao pawahyoghanilili mavulo gha Yona, na lelo kuvile na yula mkulu kupiti Yona.

33 "Kwahela mundu angukosa limbamba na kuligubika kwa lidebi, ila hulivika kunani kwa mmbaku mlighuta ili wandu pawayingila mghati wapati kulola mhana. 34 Mihu gha wenga ni limbamba lya higha ghako, mihu ghako pailola maha, higha ghako wogha utevile kumhana. Mihu ghako pailola maha ng'ogha, na higha ghako kangi utevile kulwisa. 35 Ujilole umweni ili mhana wa mghati mwa wenga ukotoho kuhyuka kuvile lwisa. 36 Hinu, ikiva higha gha wenga wogha uvile na mhana, na ukotoho kuvile na mahala popose pavile na lwisa, higha hau uteng'ala maha handa vila limbamba kwa mhana ghaki."

37 Yesu paawelili akilonga, Mfalisayo mmonga akamluwa kwa kumulyo ukaya ghaki. Na Yesu akayenda, akatama kulyegha mulyo. 38 Hayu Mfalisayo alikangasili kulola yiwa Yesu angulyegha mulyo kunu kaghulula ng'ogha mawoko handa waigholili weni machuwa hyogha. 39 Bambu akamlongela, "Mwenga Mafalisayo mngughulula kikombi na sahani kwa panji, ila mwenga mghati mmema makalaghanyiko na mahakata." 40 Wasihisihi mwenga. Ghuli, mmanya ng'ogha Sapanga agholili panji ndiwa kaghola na mghati hilahila? 41 Hinu muwapeghi wavile na hindu ng'ogha na ikiva mghola nagha kila kindu mkighola kitemhekelesa Sapanga.

42 Chondi kwa mwenga, mwenga Mafalisayo. Mngumtolela zaka Sapanga hata kwa mahamba gha kuungila mulyo, mahamba gha ngundi na malikolu hyogha kangi mnguwalongela wandu uhwangi ila mngupughanya mighalu ipalwa na Sapanga. Mighalu hai mpalilwi muigholi na hata kukotoho kuyaleka ghala ghangi hilahila.

43 "Chondi mwenga Mafalisayo, kwa ikiva mngupala kutama kuulongolo mahala kwa kutundamilwa kumaghuta gha kukonganika Wayahudi, na kujambuswa kwa kutundamilwa kuulongolo gha wandu. 44 Chondi mwenga Mafalisayo, kwaikiva mvile handa mamambi yavile ng'ogha na kilangihi kuvile lipala, wandu hutyanga kunani ghaki wakiva wamanya ng'ogha kya mghati."

45 Mmonga paghati gha wavula wa laghililo lya Musa akamlongela, "Mvula, milando ghako ingutupughanya na twenga hilahila."

46 Yesu akamuyanga, "Na mwenga wavula wa laghililo lya Musa, chondi mwenga, kwaikiva mnguwapapisa wandu mihigu iwesilwi ng'ogha kupapwa, ikiva mwenga weni mlangihi ng'ogha hata kyala kuwatanga." 47 Chondi mwenga, kwaikiva mnguchenga mamambi gha walota wa Sapanga wa Sapanga wala wagogolo wa mwenga wawakomili. 48 Kwa nagha mwenga weni, ni walangihi na munguyitikilana na mighalu gha wagogolo wa mwenga. Kwaikiva wala wawakomili wala walota wa Sapanga, na mwenga mnguwalongela wandu kwa kujumila kila wagholili. 49 Kwa nagha, Sapanga ailongile kwa luhala ghaki, "Nitewayeghela walota wa Sapanga na wandumindumi, ila watewakoma wamonga gha weni, na kuwahakili ghangi." 50 Hinu kiwelekwa haki kitetoswa kwa ikiva gha mwahi gha walota wa Sapanga wogha wakomilwi kuhuma kumtumbula wa mlima wogha. 51 Kuhuma kujita kwa mwahi gha Abeli mbaka kwa Zakalia avile wamkomili paghati gha kihanja na Lighuta lya Sapanga. Hina, chakaka kiwelekwa haki kitetoswa kwa matendu ghaki.

52 "Chondi kwa mwenga mweni wavula wa laghililo, kwaikiva mhighili hula ufunguu wa mlyango wa kumanya lilando lya Sapanga, mwenga weni myingila ng'ogha na muwakanila wawelili wakiyingila wakotoho kuyingila."

53 Paawelili akihuka pala, wala Mafalisayo na wavula wa laghililo watumbulili kumkingama kwa lilaka na kumbabanika na kumkonya milando itangala, 54 wakilindila kumtegha ili aghomeli kwa milando ghaki.