1 Lichuwa limonga Yesu paawelili akivula wandu kulighuta lya Sapanga na kutangasa Habali Maha, watambika wakulu na wavula wa laghilo, pamonga na vilongosi wagogolo wa Wayahudi wakamuhikila. 2 Wakamkonya, "Utulongeli, ungughola mighalu hai kwa ulongosi wa ghani? Na ghani kakupegha ukulu hau?"

3 Na Yesu akawalongela, "Na nenga nitewakonya lilando. 4 Ukulu wa Yohanawa kubatisa uhumili kundumba au kwa wandu?"

5 Wakalongelana weni kwa weni wakilonga, "Ikiva tukilonga, ‘Uhumili kundumba,’ mweni atetukonya, ‘Kwa kyani mumkwinila ng'ogha?’ 6 Na patulonga ukulu uhumilili kwa wandu, wandu wogha baha watetutova maganga, kwaikiva wogha wangulikwinila yiwa Yohanaawelili mlota wa Sapanga." 7 Hinu wakayanga, "Tumanya ng'ogha ukulu hau uhumili kugha."

8 Yesu akawalongela, "Hata nenga nitewalongela ng'ogha ningughola mighalu hai kwa ulongosi wa ghani."

9 Yesu akayendelela kuwalongela wandu mlandano hau, "Mundu mmonga atukutulili litawa lya mizabibu, akawapegha watukutula ili kuulongolo awahomosi, hinu akatumbula mwanja mbaka mlima wa kutali, akalikala haku kwa lipindi litali. 10 Lipindi lya kubena, mundu hayu akamyegha mtumikila ghaki kwa wala watukutula, ili awese kutola homoso ghaki lya mizabibu. Ila wala watukutula wakamtova mtumikila yula, akahuya mawoko lipala. 11 Kangi mweni litawa akamlaghila mtumikila ghangi, hayu na mweni wakamtova, wakamuwinga na akahuya mawoko lipala. 12 Akamlaghila kangi mtumikila wa itatu, na hayu hilahila wakamtova na kumuhakila wakamdanga panji gha litawa. 13 Yula bambu mweni litawa lya mizabibu akaliwachila, ‘Niteghola kyani? Nitemlaghila mwana ghangu nimpala mani watemtundamila.’ 14 Wala watukutula pawamlola yula mwana, wakalongelana, ‘Hayu ndiwa mlihi. Hinu, tumkome ili ulihi ghaki uvile wa twenga.’ 15 Hinu, wakamuhumisa panji gha lila litawa lya mizabibu, wakamkoma." Yesu akakonya, "Yula bambu mweni litawa atewaghola kyani wala watukutula? 16 Atehika kuwakoma watukutula hagha na kuwapegha watukutula ghangi hali litawa lya mizabibu."

Wandu pawahyoghanila milando hila wakalonga, "Lilando hali likotoho humila kwa twenga."

17 Ila Yesu akawakwenjulila mihu akalonga, "Mayandiko hagha gha Sapanga yangumanisa liki?

‘Liganga lila walikanili wachenga,

livile liganga likulunga lya mmbali?’

18 Mundu yeyose paaguila kunani gha liganga hali atetenyukatenyuka na palimguwila mundu yeyose, litemtimbanga."

19 Wavula wa laghililo na watambika wakulu wamanyili yiwa mlandano hula walongelilwi weni na hinu wakapala kumkamula palapala, ila wakawela na holu wandu. 20 Kwa nagha wakulu hagha wawelili wangumnyatila Yesu wamkamuli. Wakawapegha wandu swinda. Na wakayegha wandu kumkonya Yesu milando. Wandu hagha wakajighola yiwa ni wa maha. Ila wawelili wakihakula njila gha kumkamula Yesu kwa milando ghaki ili wayende kumsitaki kwa kilongosi wa kilumi. 21 Hinu wamonga gha wala walaghililiwi wakamkonya, "Mvula, tungumanya yiwa wenga ungulonga na kuvula ghala gha chakaka. Hilahila wenga uloli ng'ogha ukulu wa mundu, ila unguvula vila wandu wangupalwa watami handa Sapanga angupala. 22 Hinu utulongeli yiwa tungupalwa kuhipa usulu kwa Kaisali au ng'ogha?"

23 Ila Yesu amanyili mteghu ghao, akawalongela, 24 "Mnilangisili hali ligwala, ghuli, wuso na kilangihi ni vya ghani?" Na weni wakamuyanga, "Ni gha Kaisali." 25 Yesu akawalongela, "Hinu, gha Kaisali mumpeghi Kaisali na gha Sapanga mumpeghi Sapanga."

26 Wakawesa ng'ogha kumkamula kwa yala milando ayalongile kuulongolo gha wandu na weni wakakangaswa nesu na kula kuyanga kwaki, wakanyamala jii.

27 Hinu wamonga wa Masadukayo wala wangulonga yiwa kwahela uhinduki wa yula ahovili, wakamhikila Yesu na kumkonya, 28 "Mvula, Musa atuyandikilili yiwa ikiva mlongo wa mundu mlumi paahwegha na kumleka mdala ghaki kahela mwana, hinu angupalwa hayu mlongo amposi yula mdala ahovitiliwi ili amleleli mhacha ghaki wana. 29 Hinaa pawelili na walongo isaba. Yula wa mtumbula aposili na kuulongolo akahova na kaleka ng'ogha mwana. 30 Hinu yula wa ivili akamlihi hayu mdala ahovitiliwi na mweni akahova kangi kaleka ng'ogha mwana. 31 Na mlongo wa itatu hilahila akamlihi. Milando igholeka hunagha kwa wogha isaba wogha wahovili na kuleka ng'ogha wana. 32 Kumwihu na yula mdala ahovitiliwi akahova. 33 Hinaa, ghuli lichuwa lya wandu kuhindulilwa hayu mdala atevile mdala wa ghani? Kwaikiva aposiliwi na walongo wogha isaba."

34 Yesu akawayanga wandu walikala hinaa huposa na kuposwa kumlima wogha hau. 35 Ila wandu wala Sapanga kailolela yiwa wangupalwa kupokela fwasi kumlima wogha hula na kuhindulilwa kukihu weni wateposwa ng'ogha hata kuposa. 36 Hagha wawesa ng'ogha kuhova kangi, kwaikiva weni ni handa watumikila wa kundumba wa Sapanga. Weni ni wana wa Sapanga, kwaikiva wahindulilwa. 37 Hata Musa ahighilisili yiwa wahovili watehinduka, ailongile hagha kumayandiko gha Sapanga pala kukila kiputila kiwelili kikiyaka lyoto. Pala Sapanga ailongile mweni ni Bambu "Sapanga wa Ibulahimu na Sapanga wa Isaka na Sapanga wa Yakobu." 38 Hinu, "Mweni ka ng'ogha Sapanga wa wala wahovili, ila ni Sapanga wa wala wakomu kwaikiva kwa mweni wogha wangulama."

39 Wamonga wa wala wavula wa laghililo lya Musa wakalonga, "Mvula uyangili maheli nesu." 40 Wakalonga nagha kwaikiva wawesa ng'ogha kumkonya kangi lilando ghangi.

41 Hinu Yesu akayendelela kuwalongela, "Iwesekana ghuli wandu walongi yiwa Kilisito ni mwana wa Daudi? 42 Daudi mweni ayandikili kukihitabu kya zabuli,

‘Bambu amlongelili Bambu wa nenga,

ulikali kuliwoku lyangu lya kuliyila’

43 mbaka nikugholi uwasindi wahakata ghako na kuwalongosa wavile pahi gha ulongosi ghako." 44 "Ikiva Daudi angumkema, Kilisito ni Bambu ghaki, hinu, itevile ghuli mwana ghaki?"

45 Wandu wogha lipindi wangumuyoghanila Yesu akawalongela wavulwa ghaki kuulongolo gha wandu, 46 "Mlikali mihu na wavula wa laghililo gha Musa wala wangupala kutyangatyanga wakiva wavala lihabiti na hupala kujambuswa na wandu kwa kutundamilwa kumasoku na hulikala mahala pautundamilu kulighuta lya kukonganika Wayahudi na kulikala mahala pautundamilu kumhambu. 47 Huwapokola wadala wahovitiliwi na walumi hata kumaghuta ghao, ikiva wangujilangusila yiwa wandu wa maha kwa kuyupa mayupo matandamahu. Hagha watepokela utoso ukalipa."