1 Badili gha hagha, Bambu awahaghulili ghangi isabini na ivili, akawalaghila waiviliwaivili, wamlongoleli kukila kimbwani na mahala kula mweni baha apalili kuyenda. 2 Akawalongela, "Mabeno yatangala, ila wabena ni mayaghani. Hinu, mumluwe mweni mabeno ayeghi wabena kulitawa ghaki." 3 Hinaa muyendi, mmanyi, ninguwayegha handa wanakondolu paghati gha wahakata ghaki kondolu handa ghalu mwitu. 4 Mkotoho kupapa mhaku kya mapesa na ng'ogha muhaku na ng'ogha hilatu na mkotoho gholoka mnjila mkayalamisa lisaa kwa kumjambusa mundu. 5 Pamuyingila kulighuta lolose, mtumbuli kwa kuwajambusa nagha, "kuponga kutami kulighuta hali" 6 Ikiva kuvile na mundu mpala kuponga, kuponga gha mwenga itetama na mweni, ikiva kwahela mpala kuponga, kuponga itewahyila mwenga. 7 Mlikali kulighuta hali mkilyegha na kunywegha vila wawapegha, kwaikiva mghola lihengu angupalwa apokeli msahala. Mkotoho kuhuka huka lihanja limonga lighuta hali na lihanja ghangi lighuta ghangi. 8 Na kumbwani kokose muteyingila, wandu pawawapokela, mlyeghi na kunywegha kila watewapegha. 9 Mlamisi wavina wavile haku, muwatangasili wandu, "Unkosi wa Sapanga upabehi kwa mwenga." 10 Hinu pamuyingila kumbwani kokose, ikavile wawapokela ng'ogha, mhuki, na mwenga pamtyanga kunjila zya weni mlonge, 11 "Hata lifu lya mmbwani mwa mwenga lijikolili mumaghulu gha twenga tungulipumunda kwa mwenga ivile kilangihi kya mahakata gha mwenga. Ila, mmanyi yiwa Unkosi wa Sapanga upabehi." 12 Ninguwalongela unagha yiwa kwa lichuwa lya kulamula mmbwani hau utelamulwa nesu ipiti uhakata wa wandu wa Sodoma.

13 "Chondi wandu wa Kolazini, chondi wadu wa Betisaida, kwaikiva makangaso yagholekili kwa wenga yangaligholeka kummbwani wa Tilo na mmbwani wa Sidoni wandu ghaki wangalileka mahakata dahile kwa kuvala magunila na kujipakala malifu ili kuwonesa waleka mahakata ghao. 14 Hata nagha, lichuwa lya kutosa mwenga mtepokela utoso mkulunga upiti gha wandu wa Tilo na wandu wa Sidoni. 15 Na mwenga wandu wa Kapelinaumu, ghuli, mnguliwachila yiwa mteyinulwa mbaka kundumba kwa Sapanga? Ng'ogha nagha, mtehuluswa mbaka kumlima wa wandu wahovili." 16 Hinu Yesu akayendelela kuwalongela wavulwa ghaki, "Yula awahyoghanila mwenga, angunihyoghanila nenga, yula awapokela ng'ogha mwenga, kanipokela ng'ogha nenga, na yula kanipokela ng'ogha nenga, kanipokela ng'ogha Sapanga."

17 Kuulongolo, wala wavulwa isabani na ivili wahuyili wakiva wamema luheku, wakilonga, "Bambu, hata mahoka watuyitikila patuwalaghila kwa lihina lyako." 18 Yesu akawalongela, "Niliwonili Lihyukana vila liwelili likighuluka kuhuma kundumba handa lumuli lwa umemi. 19 Mlole hinaa, niwapeghili uweso wa kutimba njoka na inge na ukulu wa kumsinda yula mhakata Lihyukana, kwahela kindu chochose kitewahakila. 20 Hata nagha, mkotoho kuhekelela kwaikiva mahoka wawayitikila, ila muhekeleli kwaikiva mahina ya mwenga yayandikilwi kundumba ili mvile wandu wa Sapanga."

21 Lisaa lilalila, Yesu akahekelela kwa uweso wa Mpumulo wa Sapanga, akalonga, "Ningukushukwile ee Tati, Bambu wa kundumba na mlima wogha, kwaikiva uwahigha wavile na luhala na wavile na mavulo mighalu hai, ukawagubutulila wanung'una. Hina Tati, havi ndiwa ungupala wenga." 22 "Tati wa nenga, uvikili vindu vyogha kumawoko gha nenga. Kwahela mundu angummanya Mwana ila Tati, kangi kwahela ammanya Tati ila Mwana na yeyose yula Mwana atempala kumugubutulila." 23 Hinu akawalola wavulwa ghaki akawalongela, "Wahighilwa wala wayalola yala mnguyalola mwenga. 24 Kwaikiva ninguwalongela, walota wa Sapanga watangala na wankosi wapalili kulola mighalu munguilola mwenga, ila wayalola ng'ogha, na kuhyoghanila milando mnguihyoghanila mwenga, ila waihyoghanila ng'ogha."

25 Kuulongolo mvula mmonga wa laghililo lya Musa akagholoka na kumkonya Yesu kwa kumuyesa, "Mvula, nighole niki ili nipokeli ukomu wa machuwa hyogha bila mwihu?" 26 Mweni akamkonya, "Kiyandikwa niki kukihitabu kya laghililo lya Bambu? Ungumanya niki?" 27 Akamyanga, "Umpali Bambu Sapanga ghako kwa moyu ghako wogha, kwa mpumulo ghako wogha, kwa makakala ghako hyogha na kwa mawachilo ghako lyogha. Na, umpali mundu wa pabehi ghako handa ujipala lamweni." 28 Yesu akamlongela, "Uyanga maha. Ughole nagha, na wenga paughola nagha utelikala ukomu uyendelela." 29 Ila mweni akipala kujihighilisila yiwa wa maha akamkonya Yesu, "Na mundu wa pabehi wa nenga ni ghani?" 30 Yesu akamuyanga, "Mundu mmonga awelili akighuluka kwa kuhuma Yelusalemu kuyenda Yeliko. Paawelili kunjila, wapokola wakampundangila na wakampokola hindu ghaki na kumtova, na wakamleka kaghonja pala pabehi na kughwegha. 31 Kukahumila mtambika mmonga akighuluka kunjila hilahila. Akamlola, akapitila mmbali. 32 Hilahila Mlawi mmonga akahika mahala pala, na mweni paamlolili mundu yula awelili kapundangilwa akapitila mmbali na kujiyendela. 33 Ila Msamalia mmonga awelili na mwanja, akahika pala yula mundu awelili, na mweni paamlolili, akamwonela luhungu. 34 Akamuyendela, akampakala mtela kuvilonda ghaki kwa njila gha kumvika mahuta na divai na kuwopa litambala, hinu akamkwelesa kunani gha punda ghaki, akamyegha kulighuta lya wahenja na kumlola maha. 35 Kilau ghaki akatola vipandi viivili vya madini gha feza akampegha yula mweni lighuta, akamlongela, ‘Umuhungi mundu hayu, na chochose utetumila kumyongesela, nitekuhuyisila panihuya.’ " 36 Hinu Yesu akamkonya, "Paghati gha hagha wogha waitatu, ni ghani alangilili yiwa ni mundu wa pabehi ghaki kwa yula apondangililwi na wapokola?" 37 Mweni akayanga, "Ni yula amuwonelili luhungu." Yesu akamlongela, "Uyendi ukaghole hilahila."

38 Yesu na wavulwa ghaki pawawelili kumwanja Yelusalemu, wayingilili kukimbwani kimonga na mdala mmonga wamkema Malita, akampokela kuukaya ghaki. 39 Malita awelili na mhaja ghaki wamkema Malia, Hayu atamili pabehi na Yesu akihyoghanila mavulo ghaki. 40 Ila Malita awelili na mahengu yatangala gha mayandalilo kukihinja. Hinu akamuyendela Yesu na kumlongela, "Bambu, ulola ng'ogha yiwa mhaja wa nenga kanileka nigholi mahengu gha kukihinja wekayangu hela? Umlongeli anitangi." 41 Ila Bambu akamuyanga, "Malita, Malita, ungughasika na kuhakilika kwaikiva gha vindu vitangala." 42 Bambu akamuyanga ila livile lilando limonga hela lya maha lipiti hyogha na mlando hau ni kunihyoghanila nenga. Malia ndiwa kahaghula, mghalu uwesa ng'ogha kuhumiswa kwa mweni na mundu.